¹ Foo Samuele a tsaya lonaka lwa leokwane, a le tshela mo tlhogong ya ga Saulo, mme a mo atla. A re, ''A Modimo Yahaweh ga a go tlotsa go nna mmusi wa boswa jwa gagwe? ² Fa o tswa fa go nna letsatsi leno, o tla bona banna ba le babedi gaufi le lebitla la ga Ragele, mo kgaolong ya Benjamene kwa Selesa. Ba tla go raya ba re, 'Ditonki tse o neng o di batla di bonwe. Jaanong rraago o emisitse go tshwenyega ka ditonki, mme o tshwenyega ka wena, a re, 'Ke dire eng ka morwaake?''' ³ Foo o tla tsamaela kwa pele go tswa foo, mme o tla fitlha kwa mookeng wa Tabore. Banna ba le bararo ba ba yang kwa Modimong kwa Bethele ba tla go kopantsha koo, yo mongwe a tshotse dipotsane tse tharo, yo mongwe a tshotse marotho a le mararo, fa yo mongwe ene a tshotse lekuka la mofine. ⁴ Ba tla go dumedisa ba bo ba go neela marotho a mabedi, a o tshwanetseng go a amogela go tswa mo diatleng tsa bone. ⁵ Morago ga moo, o tla fitlha kwa thabeng ya Modimo, kwa ditlhopha tsa masole a Bafilisitia di leng teng. Fa o fitlha kwa toropokgolong, o tla kopana le setlhopha sa baporofiti se tswa kwa lefelong le le kwa godimo se tshwere harepa, le seletare, le moropana, le fulutu; ba tla bo ba porofita. ⁶ Mowa wa Modimo Yahweh o tla goromela mo go wena, mme o tla porofita le bone, mme o tla fetolwa go nna monna yo o farologanyeng. ⁷ Jaanong, fa dikai tse di tla mo go wena, dira se seatla sa gago se se tshwarang, gonne Modimo o na le wena. ⁸ Tsamaela kwa pele ga me o ye Giligala. Foo ke tla tla kwa go wena ke tla go ntsha meneelo e e fisiwang le setlhabelo sa kagiso. Leta matsatsi a supa go fitlhelela ke tla kwa go wena ke tla ke go bontsha gore o dire eng.'' ⁹ Fa Saulo a hularela Samuele, Modimo a mo neela pelo e nngwe. Foo dikai tsotlhe tse tsa diragala mo letsatsing leo. ¹⁰ Fa ba fitlha kwa thabeng, setlhopha sa baporofiti sa kopana le ene, mme Mowa wa Modimo wa goromela mo go ene mo a neng a porofita le bone. ¹¹ Fa mongwe le mongwe wa batho ba ba mo itsileng pele a mmona a porofita le baporofiti, batho ba rayana ba re, ''Go diragetse eng ka morwa Khishi? A Saulo le ene ke moporofiti jaanong?'' ¹² Monna yo o tswang mo lefelong le le lenggwe le ene a araba a re, ''Raabone ke mang?'' Ka lebaka la se, tiragalo e e ne ya fetoga seane, ''A Saulo le ene ke mongwe wa baporofiti?'' ¹³ Fa a fetsa go porofita, a tla kwa lefelong le le kwa godimo. ¹⁴ Foo malomaagwe Saulo a raya Saulo le motlhanka wa gagwe a re, ''Le ne le ile kae?'' Mme a fetola, ''Go batla ditonki; fa re bona gore ga re kgone go di bona, re ne ra ya kwa go Samuele.'' ¹⁵ Malomaagwe Saulo a re, ''Tsweetswee mpolelele gore Samuele o ne a le raya a reng.'' ¹⁶ Saulo a fetola malomaagwe, ''O ne a re bolelela ka tlhamalalo gore ditonki di bonwe.'' Mme a se ka a mmolelela ka kgang ya bogosi, e Samuele a buileng ka yone. ¹⁷ Jaanong Samuele a biletsa batho fa pele ga Modimo Yahweh kwa Misepha. ¹⁸ A raya batho ba Iseraele a re, ''Se ke se se buiwang ke Modimo Yahweh, Modimo wa Iseraele: 'Ke ntshitse Iseraele kwa Egepeto, mme ka le namola mo seatleng sa Baegepeto, le mo seatleng sa magosi otlhe a a neng a le gateletse.' ¹⁹ Mme gompieno le ganne Modimo wa lona, yo o le bolokang mo matlhotlhapelong otlhe le dipatikesegong tsa lona; mme le mo reile la re, 'Re tlhomele kgosi.' Jaanong itshupeng fa pele ga Modimo Yahweh ka merafe ya lona le dikgotlana tsa lona.'' ²⁰ Jalo Samuele a tsisa merafe yotlhe ya Iseraele gaufi, mme morafe wa Benjamene wa tlhophiwa. ²¹ Foo a tsisa morafe wa Benjamene gaufi ka dikgotlana tsa bone; mme kgotlana ya Bamatiri ya tlhophiwa; mme Saulo morwa Khishi a tlhophiwa. Mme e rile fa ba tswa ba mmatla, ba se ka ba mmona. ²² Foo batho ba batla go botsa Modimo dipotso tse di ntsi, ''A go santse go na le monna yo mongwe yo o tla tlang?'' Modimo Yahweh a araba, ''O iphitlhile mo gare ga dikgetse.'' ²³ Foo ba taboga ba ya go ntsha Saulo koo. Fa a ema fa gare ga batho, o ne a le moleele go feta botlhe go tloga fa magetleng go ya kwa godimo. ²⁴ Foo Samuele a raya batho a re, ''A le bona monna yo Modimo Yahweh a mo tlhophileng? Ga go na ope yo o tshwanang le ene fa gare ga batho!'' Batho botlhe ba goa, ''Tshelela ruri kgosi!'' ²⁵ Foo Samuele a bolelela batho ditsamaiso le melawana ya bogosi, mme a e kwala mo bukeng, mme a e baya fa pele ga Modimo Yahweh. Foo Samuele a romela batho kwa malapeng a bone, monna mongwe le mongwe kwa ntlong ya gagwe. ²⁶ Saulo le ene a ya kwa ntlong ya gagwe kwa Gibea, mme banna bangwe ba dinatla ba Modimo a amileng dipelo tsa bone ba tsamaya le ene. ²⁷ Mme banna bangwe ba ba senang mosola ba re, ''Monna yo o ka re boloka jang?'' Batho ba ba ne ba nyatsa Saulo mme ba se ka ba mo tsisetsa dimpho dipe. Mme Saulo a didimala.