1
Kuzambo Jesu ua hongorerua ijOmbepo okujenda mokuti ongaango okukarorua ijo munauvi.
2
Nu tjaza noku ritjaera kovikuria omajuva omirongo vine ua tire ijo ndjara tjinene.
3
Ingui Omurore otjeja kuje natja, tjiuri Omuna ua Mukuru pangura omaue nga kutja je rire omboroto.
4
Nunguari Eje ua zira na tja, patjangua kutja omundu kena ku hupa no mboroto poruajo, nunguari ma hupu nembo arihe ndi marizu motjinjo tja Mukuru.
5
Kuzambo Omunauvi ua tuara Jesu kotjihuro tjo tjijapuke, nu ekemutua ponganda jo Ndemberi,
6
Na tja kujE, tjiuri Omuna ua Mukuru, riumba pehi: orondu tjipatjangua, Eje ua rakiza ovaengeri ve komunda uoje: Nu ovo mavekutjindi momake uao, kutja nangarire moruveze rumue o ha vete ombaze joje meue.
7
Jesu uatja nai kuje, nu patjangua rukuao: kona kurorako Muhona Mukuru uoje.
8
Omunauvi ua toora Jesu rukuao nu emu tuara kondundu onde tjinene nu emu raisireomauhonapare aehe uo mouje no ngenangeno jao,
9
Na tja kujE, ovina mbi avihe me kupe tjiueri uisire pehi nu orikotamene kuami.
10
Kuzambo Jesu otjatja kuje, tuende Saatana: mokutja patjangua, mo rikotamene ku Muhona Mukuru uoje nu Eje erike arire ngu ua ungurire.
11
Nu omunauvi otja zapo puje nu, tara, ovaengeri veja nave mu zeuparisa.
12
Nu Jesu tja zuva kutja Johanesa uaumbua mo ndorongo, ua sekama ai ko Galilea;
13
Eje uaza ko Nasareta, nu eje ku kara mo Karpenaum, tjitjiri po kuvare po miruko via Zebulona na Naftali
14
Kutja ku jenenisiue omambo inga nga hungirirue ijo muprofete Jesaja, tja tjere,
15
Ehi ra Zebulona nehi ra Naftali, posi jo ndjira jo ko kuvare, hembandina ja Jordan, Garireja tjo viuana;
16
Ovandu mba haamene mo ndorera va muna o ndjerera onene, nu kuimba mba haamene mekondua na mo tjizire tjo ndiro ondjerera ja jerere kombanda jauo tjimanga.
17
Okuza moruveze ndo Jesu ua utire okuzuvarisa a matja, tanaukireje omauvi uenu: orondu ouhona ue juru ua tumbuka.
18
Nu ngunda Jesu a makaenda mene ro muruko uo muronga ua Galilea, ua muna ovarumendu vevari oomuangu nerumbi, Simon nguja isaneua Petrusa rukuao, ne rumbi re Andreas, mbuja ve umbu ozombate momeva ovo tjivari ovapate vo mahundju.
19
Neje uatja kuuo ndji kongorereje nu ami me mu ungura ovapate vo vandu.
20
Novo motjimanga va jesa ozombate zao nu ave mukongorere.
21
Nu tja kaenda okuzambo a munu oomuangu nerumbi ovakuao, James omuzandu ua Zebedias na Johanesa omuangu ue averi mo skepi puna ihe jao Zebedias, a mave tunu ozombate zao; nu Eje eve isana.
22
Motjimanga ovo otjiva esa oskepi na ihe nave mu kongorere.
23
Nu Jesu ua rianga mu Galilea atjihe a mahongo mo zombongo zao rukuao a mazuvarisa ombuze jouhona ue juru, nu a mapanga omauvere uo zongaro pekepeke no mitjise vio mihingo pekepeke movandu.
24
No mbuze je ja handjaukire mouje auhe ua Siria: nu otjija veeta kujE avehe imba mbaverere omitjise no zombamisiro pekepeke, na imba mba havererue ijo zombepo ozombi, no vavere vo moukoto, naimba vo kuua orumbamba no viremane nejE ueve verukisa.
25
Neje ua kongorerua ijo vimbumba vio vandu ovengi okuza ko Galilea, nako Decapolis, nako Jerusalem, nako Judea nokuza hembandina ja Jordan.