1
Nu pa kara nai kutja kombunda ja nao, Jesu ua tuurungire ovihuro novirongo avihe ama hongonona noku zuvarisa Ombuze Ombua jOuhona ua Mukuru. Nu imba omurongo navevari vari puena Je,
2
No vakazendu vorive uina, mba kuturirue kozombepo ozombi na komihihamo; Maria nguja isaneua Magdalena, mu mua pitisirue ozombepo ozombi hambombari,
3
Na Johana omukazendu ua Kuza, omutarere uondjiuo ja Herodes, na Suzana, novakuao mbe Mu unguririre nouini uao oveni.
4
Nu tji pa uongarere otjimbumba otjinene tjovandu, mbe ere ku Je okuza movihuro avihe, Eje ua serekarera omasasanekero:
5
Omukune ua pitire okuka kuna ondui je. Nu eje tjija kunu ozondui tjiva za uira mene ro ndjira, nozo za jaterua mehi, nozondera zejuru zeja nu a ze zeri.
6
Nu tjiva za uira kombanda joruuua, nu ozo za pita tjimanga nunguari aze kukuta tjimanga, mokutja ka pari notjeme.
7
Nu tjiva za uira mokati ko makuija, no makuija aje hapa puena zo, nu a jeze sina.
8
Nu zemue za uira mehi eua, nu aze hapa, aze jeta ovihape, aihe esere. Nu tja zire noku hungjira ovina imbi ua ravaerere, Nguna omatui okuzuva ngazuve.
9
Nu ovahongeua Ve ve Mu purire nave tja,otjiisasanekero ihi matji heje tjike?
10
Nu Eje uatja, pa jandjeua kuene okutjiua oviundikua vio uhona ua Mukuru, nunguari ku varue o novisasanekero, kutja, a mavetara ave ha munu, a mave zuu ave ha pangununa.
11
Nambano otjisasanekero otjo tji: Ondui embo ra Mukuru.
12
Inda zomene rondjira ovo imba mbe zuva; kuzambo ape ja Omunauvi nua hakana embo indi momitima viao, kutja ave ha kambura nu ave ha jamua.
13
Nu inda zokambanda joruuua, ovo imba mbe zuva nu ave jakura embo nondjoroka, nunguari ave hina muze, mbe kambura oka ruveze okasupi, nu omarorero tji je ja ave jaruka ombunda.
14
Nu inda nda uira mokati ko makuija, ovo imba tji vazu noku zuva embo, mbe kaenda, nu mena romerikendero, no tutumbo neviaro rohupo indji, ave ha kengeza nu ave ha ningi ovihape.
15
Nunguari inda zomehi eua, ovo imba zuva embo nomutima omuua nomutakame, nu ave takamisa ro, nu mena romuretima ave ruku ovihape.
16
Kapena omundu tjazu noku kamburisa erambe ngu vandeka ku ro otjitjuma poo a hitisa ro kehi jombete, nunguari eje u tua ro pongunde jaro kutja imba mbu mave hiti ve mune ondjerera.
17
Orondu kapena tjimue tjitja horekua tjitji hina ku vandururua; poo tjimue tjitja undikua tji tji hina ku vandururua.
18
Opu muaso ku tjevera kutja mamu zuu vi: orondu auhe ngu notjina ma peua: nu ingui ngu hina tjina ma jekua naitji tji matjimunika tjimuna u natjo.
19
Kuzambo ina no vangu ve otji ve ja ku Je, nu ovo kave pe urire oku vaza ku Je mena rouingi uovandu.
20
Nu Eje ua heua i vemue, mbatja, njoko no vangu voje va kurama pendje mave zeri oku ku muna.
21
Neje ua zira nu atja nai kuvo, Mama novangu vandje ovo mbe zuva embo ra Mukuru nave jenenisa ro.
22
Nu pa kara nai ejuva rimue kutja Eje ua hita mokaskepi puena ovahongeua Ve, nu atja nai kuvo, Ngatu konde hembandina jomuronga, nu arire tji va kumuka.
23
Nu okaskepi ngunda ama ke kaenda Eje arire tja rara. Nu pe ere otjivepo otjinamasa kombanda jomuronga nu okaskepi ka utire oku ura omeva nu ovo otji vari moumba ounene.
24
Nu ovo veja ku Je nu ave Mu pendura, amave tja, Muhona, Muhona, mat utu! Nu Eje ua sekama nu a kandaiza otjivepo nozongazona zomeva, nu arire tji zau pehi nu ku poro.
25
Nu Eje uatja nai kuvo, Ongamburiro jenu ipi? Nu ovo va urumine nave temua narire tjiva purasana nai, Nunguari ingui ouani? Orondu Eje tje pangura ombepo nomeva nu avi zuu ku Je.
26
Nu ovo va hingira okaskepi kehi ra Gadarenes ndari ombarakana na Galilea.
27
Nu tjaza imbo okujenda kehi, Eje ua uana kuena omurumendu uorive, ngua zire motjihuro, ngua karere nozombepo ozombi orure, ngu ha zarere omituaro nu nguja ha kara mondjiuo, nunguari nguja kara mozombongo.
28
Nu tja muna Jesu ua urira kombanda, na uire pehi pomurungu Ue, nu neraka enene atja, Mbina tjike kuena Ove, Jesu, Muna ua Mukuru uOkombandambanda. Me ku ningire ondjihihamisa.
29
Orondu Eje tja pangurire indjo ombepo ombi kutja ngai pite momurumendu. Orondu ptuingi ija I mu hakana. Nu eje otja pandekerue nozoketanga nozongoze. Nu eje ija timbura inga omapando nu a hingirua ijombepo ombi mokuti ongaango.
30
Nu Jesu Ue mu pura, atja, Ena roje otjikuae? Nu eje uatja, Ouami Legione, orondu ozombepo ozombi ozengi tjiza hitire mu je.
31
Nu ozo zeri jarikana ku Je kutja E he ze pangura kutja ze pite ze kahite mourekoto.
32
Nu imbo pari orupanda ruozondu ndu ja ze ri kondundu. Nu ozo ze rijarikana ku Je kutja eze jandjere oku ka hita mozondu. Nu Eje Eze jandjere.
33
Nu tjiza pita momurumendu otjiza kahita mozombinda. Nu indui orupanda otji rua purukuta nomasa nga potjikere nu aze uire momuronga nu zae siniuo meva.
34
Nu imba ovarise vazo tjiva muna itji tji tja tjitua, arire tjiva tupuka a ve i nu a ve ka horora itji kotjihuro na mehi rapo.
35
Nu ovo va pita oku ka muna tji tja tjitua. Nu ovo veja ku Jesu nu ave vaza omurumendu ingui mu mua pitisirue ozombepo ozombi, a a haama pozombaze za Jesu, a a zara, nu ae nozondunge ze azehe: nu arire tjiva uruma.
36
Nu imba mba muna ve ve raera omuano ingui ngua huurirue ijozombepo ozombi mbua verukisiua nauo.
37
Nu otjimbumba atjihe tjehi ra Gadarenes no ngondoroka, tje mu ningirire kutja a zumo mokati kavo, orondu ovo va urumine tjinene. Nu Eje ua hitire mokaskepi nu a jaruka.
38
Nambano omurumendu ingui mu mua zire ozombepo ozombi ue Mu ningirire kutja a kare puena Je. Nunguari Jesu ue mu jarurire, amatja,
39
Jaruka kondjiuo joje omuini, nu uka raise kutja Mukuru ue ku ungurire ovina ovinene vi.Nu eje arire tja kaenda, nu a ka zuvarisa motjihuro atjihe kutja Jesu Ue mu ungurire ovina ovinene vi.
40
Nu pa kara nai, kutja, Jesu tja kotokere ovandu ve Mu jakurire naua, mena rokutja ijave Mu undju.
41
Nu tara, peja omurumendu uena ra Jairus, omunane uosinagoge. Nu eje ua uira pehi pozombaze za Jesu nu erijarikana kutja eje kondjiuo je.
42
Orondu eje uari nomusuko omukuatua erike, uozombura mangara omurongo na mbari, uari momara ae ri popezu nokukoka. Nunguari Eje ngunda ama kaenda ouingi uovandu otjija u ri neere mu Je.
43
Nu omukazendu ngua verere o ruandara ozombura omurongo na mbari, ngua manenene ouini ue auhe mozonganga, nu ngu ha verukisirue ko i imue jazo,
44
Ueja kongotue Je, nua arire tja tunu kotjikoro tjombanda Je. Nu tjimanga omaziziro uombindu je ja kuramisiua.
45
Nu Jesu uatja, Ouani ngue ndji tunu? Nu avehe tjiva patanene, Petrusa na imba mbari puena je va tjere, Muhonge, otjimbumba tje ku uongarere nu matji rineere mu Ove, nu Ove motja ouani ngue ndji tunu?
46
Nu Jesu uatja, Omundu umue ue Ndji tunu orondu Me tjiua kutja omasa ja piti mu Ami.
47
Nomukazendu tja muna kutja jenene oku tara, ua jenda ama zezera nu a uire pehi pomurungu Ue, nu a hongonona ku Je pomurungu uovandu avehe kutja eje ue Mu tunine tjike, nokutja eje ua verukisiua vi tjimanga.
48
Nu Eje uatja nai ku je, Muatje, kara nomutima omuua. Ongamburiro jo je je ku verukisa. Kaende mohange.
49
Ngunda Eje ama hungire peere umue okuza kondjiuo jomunane uosinagoge, amatja ku je, Omusuko uo je ua tu, otji kendisa Omuhona.
50
Nunguari Jesu tja zuva itji, Ue mu zira amatja, O tira, kambura uriri, nu eje ma verukisiua.
51
Nu Eje tja hita mondjiuo ka jandjererere omundu uarue oku hita puena Je pendje na Petrusa, na Jamesa, na Johanesa, nooihe na ina vomusukona.
52
Nu avehe va ririre nu ave mu jarere etando. Nunguari Eje uatja, Amu riri, eje ka tire, nunguari ua rara.
53
Nu ovo ve mujorere nomanjengu, mokutja ija ve tjiua kutja uatu.
54
Nu Eje ue ve pitisa avehe pendje, nu E mu kambura keke, nu a isana amatja, Musukona penduka.
55
Nu ombepo je ja kotokere, neje a penduka motjimanga. Eje ua rakiza kutja nga peu otjina okuria.
56
Nu ovakuate ve va himinue tjinene. Nunguari Eje ua rakiza kutja ngaave raere ko omundu itji tji tja tjitua.