1
Jesu tjaza nokumana inga omambo ue aehe momatui uovandu, Eje ua hita mo Kapernaum.
2
Nu omukarere uomukendurio uorive nguari omusuvera ku je, ua verere nu ua ri pookuta.
3
Nu eje tja zuva ohunga na Jesu, eje ua hindire ku Je ovanene vOvajuuta, ame rijarikana ku Je kutja eje ku verukisa omukarere ue.
4
Nu ovo tji va vaza pu Je, ve rijarikana ku Je tjimanga, amavetja, Ua puirua ijo kuvaterua, ingui ngu uaso ku mu tjitira nai,
5
Orondu eje ua suvera otjiuana tjetu nu ue tu tungira o sinagoge.
6
Nu Jesu ua kaenda puena vo. Nunguari Eje ngunda aeri kokure nondjiuo, omukendurio ua hindire omapanga ue ku Je natja ku Je, Muhona orivarura, orondu ami hi puiririrue ijokutja ove u hite kehi jomututu uandje.
7
Ami opu mbi he ri varere a mbiri omunandengu oku rijera ku Ove; nunguari ove hungira embo nu omukarere uandje ma verukisiua.
8
Orondu ami uina ouami omurumendu ngu mbiri kehi jouvara, ngu mbina ovasorondate kehi jandje, nu mbi tja nai ku umue, Kaende, nua kaenda; ku uarue, Indjo nu eja; nu komukarere uandje, Ungura tji, nu eje a ungura.
9
Nu Jesu tja zuva ovina mbi, arire tja himisiua ije. Nu a tanaukire kotjimbumba tji the Mu kongorerere, nu Atja kutjo, Metja nai kuene, Ami hina pu mba vaza ongamburiro onene nai, kako, na mOisrael.
10
Nu imba mba hindirue, tji va jaruka kondjiuo, va kavaza omukarere ingui ngua verere aa veruka.
11
Nu kombunda ja nao, Jesu uaka hita motjihuro tjija tji isaneua Nain, ovahongeua ve no tjimbumba tjo vandu tja kaenda puena Je.
12
Nambano Eje the ja popezu nomuvero uotjihuro, tara, pari omukoke umue nguja pitisiua, nguari omuzandu omukuatua erike ua ina. Nu otjimbumba otjinene okuza motjihuro tjari puena je.
13
Nu Muhona tje mu muna, ua tondjenda na je, natja ku je, "Oriri."
14
Nu Eje otja riama popezu nu a tunu koruara, nu imba mbe mu tjindire ave kurama noku hina ku njinganjinga. Nu Eje uatja, murumendu omutanda, Me tja ku ove, Sekama!
15
Nu ingui ngua kokere ua kengama nu autu oku hungira. Nu Eje E mu jandja ku ina.
16
Nu ondira ja raukira kombanda ja avehe. Nu ovo va hivirika Mukuru, amavetja, Omuprofete omunene ue kurisiua mokati ketu; Nu Mukuru ua varura ovandu ve.
17
Nu ombuze indji ohunga na Je ja rimbarere mo Judea atjihe, na mehi arihe rongondoroka.
18
Nu ovahongeua va Johanesa ve mu raerere ovina mbi avihe.
19
Nu Johanesa ua isana vevari vovahongeua ve, nu eve hindi ku Jesu, amatja, Tjii oOve Ingui nguaso ku ja, poo ngatu undje uarue?
20
Nu ovarumendu imba tji ve ja ku Je vatja, Johanesa omupapitise ue tu hindi ku Ove, amatja, Tjii oOve Ingui nguaso ku ja, poo ngatu undje uarue?
21
Nu moruveze otjingeruo indo, Eje ua verukisa ovengi komitjise noviverero viao, na kozombepo ozombi; nu kovengimbari ovapotu Eje ua jandja oku muna.
22
Nu kuzambo mezirira Jesu uatja kuvo, Kaendeje nu ka raereje Johanesa imbi mbi mua munu noku zuva; kutja ovapotu mave munu, ovitendu mavi kaenda, ovanalepere mave kohororua, ozomboro maze zuu, ovati mave pendurua, nu kovasiona maku zuvarisiua ombuze ombua.
23
Nu omuningandu ingui ngu hina ku putarisiua mu Ami.
24
Nu ovahindua va Johanesa tji vaza noku kaenda, Eje ua utire oku hungira ohunga na Johanesa kovandu, Mua ira oku ka muna tjike mokuti ongaango? Oruu ndu ma ru singua ijombepo?
25
Nunguari mua ire oku kamuna tjike? Omurumendu ngua zara omituaro omitarazu? Tareje, imba mba zara ozombanda ozombua nu mberi meviaro very mozondjiuo zovahona.
26
Nunguari ene mua ire oku ka muna tjike? Omuprofete? Ii, Metja nai ku ene, Oku kapita omuprofete tjinene.
27
Ingui ongua heerue tjipa tjangerue nai, Tara, Ami me hindi omuhindua uandje pomurungu uoje, ngu ma ka tuna ondjira joje komurungu uoje.
28
Orondu metja nai kuene, Mu imba mba kuatua ijovakazendu kapena umue ngua kapitire Jhanesa omupapitise: Nunguari ingui okatitititi mouhona ua Mukuru ue mu kapita.
29
Nu ovandu avehe mbe muzuvire, novasutise votjisuta tjouhona, va jandjere ousemba ku Muhona, ovo tjiva papitisirue mo mbapitisimo ja Johanesa.
30
Nunguari Ovafarisei nOvahonge vo veta, va nakaurire ombango ja Mukuru ohunga navo, ovo tjive ha papitisirue ije.
31
Nunguari ovandu vondekurona ndji hi ve saneke ku tjike? Nu ovo veri otja tjike?
32
Veri tjimuna ovanatje ava haama mo marandisiro, nu a mave ravaere ko vakuao, nu amave tja, tue mu tonena oviha na muha pundu; tue mu hongononena omutambo na muha riri.
33
Orondu Johanesa keere a e ria omboroto poo ae nua omavinu, nu vetja u nombepo ombi.
34
Omuna uo mundu ueja ae ria na e nua, nu mutja, taree, omurumendu ngu ria tjinene, omunue uo mavinu, epanga ro vasutise votjisuta tjo uhona no rovarunde.
35
Nunguari ounongo u kengamisiua ijo vanatje vauo.
36
Nu umue uOvafarisei ue mu nangere oku karia puan je. Nu Eje ua kahita mondjiuo jOmufarisei ngui nu a kara pehi okuria.
37
Nu tara, omukazendu uotjihuro, nguari omurunde, tja tjivirue kutja Jesu ua haamene potjiriro po jOmufarisei, ua jendere nekende rovinuke viondengu jokombanda,
38
Nu a kurama pozombaze Ze kongotue Je ama riri, nu a utu oku koha ozombaze Ze nomahoze, nu e Ze piena nozondjise zotjiuru tje. Nu eje ua hupitire ozombaze Ze nu e Ze sopora novinuke.
39
Nambano ingui Omufarisei ngue mu nangere tjamuna itji, ue ri hungirira moukoto ue omuini amatja, Omurumendu ingui, andaku omuprofete, itja tjiua kutja ouani, nu omungekaendu ngu me mu tunu, orondu eje omurunde.
40
Nu Jesu Ue mu zirire natja ku je, Simon, mbi na otjina tjimue oku hungira kuena ove. Nu eje uatja, Muhonge, hungira.
41
Pari novarumendu vevari mbari nozondjo zomujazemise uovimariva katjondumba. Umue uari nondjo jomasere jetano, umue uari nondjo jomirongo vitano.
42
Nu tjive hari notjina okusuta eje arire tje ve jesire avejevari. Nambano ndji raera eje une puvo ngu me mu suvere okukapita.
43
Simon ua zirire natja, Me tjangovasi ma rire ingui ngua jesirua ovingi oku kapita. Nu Eje uatja nai ku Je, Ove ua pangura osemba.
44
Nu Eje ua tanaukira komukazendu, natja ku Simon, Mo munu omukazendu ingui? Mba hiti mondjiuo joje nu ove kondjipere omeva uozombaze zandje. Nunguari eje ua koho ozombaze zandje nomahoze ue, nu e Ze piena nozondjise zotjiuru tje.
45
Ove kona pu ue Ndji hupite, nunguari omukazendu ingui, kena pa kurama oku hupita ozombaze zandje.
46
Ove ko soporere otjiuru tjandje nomaze, nunguari omukazendu ingui ua sopora ozombaze zandje novinuke.
47
Opu mezu oku tja nai kove, omauvi ue, ngeri omengi ja jesirua, orondu eje tja suvere tjinene, nunguari ingui ngua jesirua ouvi outiti, eje u suvera katiti.
48
Nu Eje uatja nai kuje, Omauvi uoje ja jesirua.
49
Nu Imba mba haamene periro puena e va utire okutja nai muvo oveni, Ingui ouani ngu jesira omauvi uina?
50
Nu Jesu uatja nai komukazendu, Ongamburiro joje je ku jama; kaende mohange.