1
Kuzambo ovasutise votjisuta tjouhona novanauvi avehe va riamene ku Je okumuzuva.
2
Nu omba Ovafarisei novatjange arire tjive Mu unaunine, amave tja, Omurumendu ingui u jakura ovanauvi nu a ri puena vo.
3
Nu Eje Ua serekarera otjisasanekero kuvo, Atja,
4
Ouani omurumendu muene, tje na ozondu esere, nu tja pandjarisa imue ja zo, ngu hina ku jesa inda omirongo muviu na muviu mokuti ongaanga, na kapaha indji ndja pandjara, nga tje i munu.
5
Nu tje i munu me i tua kovituve vie ae nondjoroka,
6
Nu tja vaza konganda, eje ma isanene kumue omapanga ue novararanganda, amatja nai kuvo, Jorokeje puena ami orondu tjimba munu ondu jandje ndja pandjarere.
7
Metja nai kuene, momuano mbua sana ingui, mamu kara ondjoroka mejuru mena romunauvi ngue riverere kondanaukiro kombanda jovandu ovasemba omirongo muviu na muviu mbe hina ku hepa okuriverera kondanaukiro.
8
Poo omukazendu oune, the nvimariva vio vitenda omurongo, nu a pandjarisa tjimue, ngu hina ku jakisa erambe, nu a kombo ondjiuo, nu a paha jotjo tjinene, nga tje tji munu?
9
Nu tje tji munu , eje ma isanene kumue omapanga ue novararanganda, amatja nai kuvo, Jorokeje puena ami orondu tjimba munu otjimariva tjandje tji tja pandjarere.
10
Momuano mbua sana ingui, Metja nai kuene, mamu kara ondjoroka mokati kovaengeri va Mukuru mena romunauvi ngue riverere kondanaukiro.
11
Nu Eje Ua tja, Omurumendu uorive ua ri novanatje ovazandu vevari.
12
Nu ingui omuangu ua tjere ku ihe, Tate ndjipa otjirumatua tjouini uoje, tji tja sokurira otjandje. Nu eje ue ve hanena ouini ue.
13
Nu kombunda uomajuva omasupi, ingui omuangu ua uongera ovina vie kumue, na i kehi rokokure. Nu ingo eje uaka njona ouini ue mohupo jehambaneno.
14
Nu eje tja za nokumana ovina avihe mbia ri navio kua karere ondjara onene mehi ondo, nu eje ua rukire okuhupira mouhepe.
15
Nu eje uaja nu e kerikutisa ku umue uovature vehi indo, nu eje ue mu hinda kovikunino vie okukarisa ozombinda.
16
Nu eje ua zeririre okukutisa ezumo re noutekero mbuja u riua iozombinda, nu kapena ngue mu pere.
17
Nu kombunda eje ue rizemburuka, na tja, Ovakutua vengapi vat ate mbe kara nomboroto ndja jenene nu ave i hupisa, nua ami me tiro ndjara mba.
18
Ami me sekama nu ei ku tate nu e ka tja nai ku je, Tate ami mba katukira Ejuru na pomurungu uoje,
19
Nu hi thina ndengu jokuisaneua omuna uoje. Ndji tjita mbi rire tjimuna umue uovakutua voje.
20
Nu eje ua sekama nu eja ku ihe. Nunguari eje ngunda ae ri kokure tjinene, ihe ue mu muna nu a tondjenda na je, nu arire tja tupuka nu a uire mosengo je nu e mu hupite.
21
Nu ingui omuzandu ua tja nai ku je, Tate ami mba katukira Ejuru na momeho uoje, nu hi thina ndengu jokuisaneua omuna uoje.
22
Nunguari ihe tjere nai kovakarere ve, Eteje nguno ombanda ndjeze kapita azehe, nu muzariseje jo, nu tueje okareinga keke re, nozongaku kozombaze ze.
23
Nu eteje nguno ongominja ndja nunisiua, mu i zepe, nu tu rie nu tu njdande,
24
Orondu omuna uandje ingui ua tire, nu u nomuinjo rukuao, eje ua pandjarere nu ua munika. Nu ovo va utire okunjanda.
25
Nunguari omuzandu ue ingui otjiveri uari kotjikunino. Nu eje tjeja tja riama posi jondjiuo eje ua zuva ozongoma nomihiva.
26
Nu eje ua isana umue uovakarere nu e mu pura kutja imbi mavi heje tjike?
27
Nu eje ua tja nai ku je, Omuangu uo je ueja, nu iho ua zepa ongominja indji ndja nunisiua, mokutja eje ue mu jakura ae hina tjipo.
28
Nu eje otja pindika nu a ha vanga okuhita. Nu ihe opa pitira pendje nu e mu ningire kutja a hite.
29
Nu me zirira eje uatja nai ku ihe, Tara ozombura inda azehe ndu mbe ku ungurira, nu hina ndi mba katukire komatuako uoje nangarire. Nu kona pu ue ndji pere nangarire okangombona kutja mbi njande puena omapanga uandje.
30
Nunguari ingui omuna uoje ingui tjeja, ngua ka njona ouini uoje movakorondu, ove ue mu zepire ondjona ndja nunisiua.
31
Nu eje ua tja nai ku je, Muatje uandje ovo u ri puena ami aruhe, nu ovona viandje avihe ovioje.
32
Nu pari osemba kutja tu njande, nokujoroka, orondu omuangu uoje ingui ua kokere, nu nambano u nomuinjo, ua pandjarere nu ua munika.