1
Nu pa kara nai Eje tja ire kondjuuo ja umue uOvafarisei ohongora okukaria ko omboroto mesabata, kutja ovo ve Mu tarerere tjinene.
2
Nu Tara, pari omurumendu uorive ngua surire omitui pomurungu Ue.
3
Nu mezirira Jesu ua hungirire kuena ovahonge voveta nOvafarisei, amatja, Tjii oveta ijandjera okuverukisa mejuva resabata?
4
Nu ovo va muina uriri. Nu Eje Ue mu toora, nu E mu verukisa nu E muesa a kaenda.
5
Nu Eje U eve zira amatja, Ouani puene ngu ma kara nokasino poo onduuombe aja uire motjitoto nu a ha nana jo tjimanga mejuva resabata?
6
Nu ovo kave pe urire okumuzira ko rukuao kovina imbi.
7
Nu Eje ua tuapo otjisasanekero ku imba mba nangerue, tjaza nokumuna omuano mbu ja ve ri toororere ovihavero viondongamo, nu Atja kuvo,
8
Tji ua nangeua ijo murumendu auhe korukupo, o haama potjihavero tjondongamo, tjaa umue omunandengu pove ngaa nangua i je nu tjeja,
9
Ingui ngue ku nanga atja nai kove, jandja oruveze ro je komurumendu ingui, nu ovo ojaruka okukahaama kotjihavero tjokombunda a ua tohoni.
10
Nunguari tjiua nangua, ka haame kotjihavero tjomaandero kutja ingui ngue ku nanga tjeja, a tje nai kove, Epanga, indjo kombanda imba. Itji matji ku pe ondengero pomurungu ua imba mba haama periro puena ove.
11
Orondu auhe ngue ritongamisa ma susuparisiua, nu ingui ngue risusuparisa ma tongamisiua.
12
Kuzambo uatja nai ku ingui ngue mu nangere, Tji ua ungura omariro uomapeta poo uongurova, onanga omapanga uo je, poo ovakuatuapamue naove, poo omuhoko uo je poo ovararnganda vo je ovatumbe, ovo tjaa ngaa ve ku nanga ape heje kutja ove ua munu otjisuta tjoje.
13
Nunguari tjimo ungura omukandi, nanga ovasiona, novipu, ovaremane novapotu,
14
Nu ove mo serua ondaja orondu ovo kanaa ve ku sutu; orondu ove mo je ku sutua mombendukiro jovasemba.
15
Nu umue ua imba mba haamene puena Je periro tja zuva ovina imbi ua tja, Omuningandu ingui ngu meje kuria omboroto mOuhona ua Mukuru.
16
Kuzambo Eje Ua tja nai ku je, Omurumendu uorive ua ungurire eriro enene romapeta, nu a nanga ovengi.
17
Nu eje ua hinda omukarere ue oiri jomariro uomapeta okukatja nai kovanangua, Indjeje orondu ovina avihe via tunua.
18
Nu avehe vautire okutuapo omazeua uokuhina kujenda. Omutenga uatja nai ku je, ami mba randere ehi nu mbasokukeri muna,me ningire jakureje okuhin ku karapo kuandje.
19
Umue uatja, Ami mba randere ozonduuombe ndano zotjijoke, mba sokukatara kutja zeri vi, me ningire jakuereje okuhina ku karapo kuandje.
20
Nu omukuao uatja, Ami mba kupire omukazendu, nu otji mbi hina ku jenena okuja.
21
Nu omukarere ingui ua kotoka nu a hepura ovina imbi komuhona ue. Nu omuniondjiuo u tjere nai komukarere, ue aa pindike, Tuende tjimanga mozondjira zomokati kotjihuro, nu uka jete nguno ovasiona, ovipu, ovaremane novapotu.
22
Nu omukarere uatja, pa tjitua otja indi tjiua hee, nu ngunda pena oruveze.
23
Nu ingui omuhona uatja nai komukarere ue, Tuende kovitaova notumbo, nu ve jeta kotjomasa kutja ve hite nu ondjiuo jandje i ure.
24
Orondu Me tja nai ku ove, kapena umue ua imba mba nangerue ngu ma roro ko omariro uandje uomapeta.
25
Nu pe jere ovimbumba ovingi vio vandu puena Je, nu Eje ua tanauka nu atja nai kuvo,
26
Omundu auhe tji me ja ku Ami, nu aha njengua ihe, na ina, nomukazendu ue, novanatje ve, novamuangu ve, nomarumbi ue, novatena, ii, nomuinjo ue omuini, kanaa rire ko omuhongeua Uandje.
27
Nu auhe ngu hina ku toora otjikoroise tje, nu endji kongorere, kanaa rire ko omuhongeua Uandje.
28
Orondu ouani pokati kenu tja tanda okutunga otjiretundu, rutenga ngu hina ku haama pehi, nu tara kutja, matji hepa vingapi, nokutja eje u na mbia jenene okutjimana?
29
Kutja rumue tjazu nokujara omazikameno uatjo, aha urua ijoku tji mana, nu imba mbu mave tjimunu ave ha jaruka okumujora,
30
Amave tja, Omurumendu ingui ua uta okutunga nu uaurua ijokumana.
31
Poo ombara ja pi, tji ma ii kotjirua kuena ombara onguao, ndji ha haama pehi rutenga, nai ripura kutja mai hepa omajovi omurongo poo omajovi omirongo vivari okuhakaena kuena ingui ngue i pirukire.
32
Nu tji i hina ku peura, ngunda indji onguao air i kokure, ma i hindi ovahindua okuka paha omazuvasaneno uohange.
33
Nu momuano otjingeuo, kaaniauhe muene ngu hina ku hanika na itji atjihe tje natjo, eje kanaa rire ko omuhongeua Uandje.
34
Omongua omuua, nunguari omongua tjiua pandjarisa omutjato uauo, ouo mau tjatisiua na tjike?
35
Ouo kautjina ku jenena nangarire okutuua mehi, poo mombumbi, nunguari ovandu ve u nakera pendje. Ingui nguna omatui okuzuva, nga zuve.