¹ Nu ami, o mupandekua mu Muhona, opu me zu oku mu ronga kutja mu kaende mo muano mbua puira o maisaneno ngu mua isaneua nauo, ² Mo me risusuparisiro aehe, no ukozu, no muretima, amamu tjindasana mo rusuvero, ³ Amamu kondjere oku takamisa o ruuano ruo Mbepo mo ngutasaneno jo hange. ⁴ Pena o rutu rumue, no Mbepo imue, otja indi tjinga a mua isanenua mo maundjiro jemue mo maisaneno uenu; ⁵ Muhona umue, o ngamburiro imue, o matutumikisiro jemue, ⁶ Mukuru umue, Ihe ua avehe,ngu ri kombanda ja avehe, ngu tuurungira mu avehe na mu ene amuhe. ⁷ Nunguari ku auhe uetu kua jandjeua o tjari otja ko tjisaneke tjo tjijandjeua tja Kriste. ⁸ Eje opu ma tjere nai, Eje tja rondere kombanda ua huurire o mahuuriro nu a jandja o vijandjeua ko vandu. ⁹ (Nu ingui ngua rondere kombanda Eje une pendje na ingui ngua pundire ko tuveze tuo kehi tue hi? ¹⁰ Ingui ngua pundire o tjingeje ingui ngua rondere kombanda kokure uo majuru aehe, kutja E urise o vina avihe.) ¹¹ Nu tjiri Eje ua jandjere ku tjiva oku rira o Vaapostele, na tjiva o vaprofete, na tjiva o vahandjaure vo Mbuze o Mbua, na tjiva o varise no vahonge, ¹² Ko ku puisa o vajapuke, ko tjiungura tjo ukarere, ko ku tunga o rutu rua Kriste: ¹³ Nga atuhe tji tue je mo ruuano ruo ngamburiro, na mo ndjiviro jo Muna ua Mukuru, nga tji tua rire o mundu ngue kura, ko tji saneke tjo ndengu jo meurisiro ua Kriste; ¹⁴ Kutja atu he tji rire o unatje, mbe singua noku tuaererua ijo mbepo aihe jo mahongero, mo vineja mbi zezengua ijo vandu oku pukisa. ¹⁵ Nunguari kutja moku hungirira o uatjiri mo rusuvero, tu kurire mu Je mo vina avihe, Eje nguri o Tjiuru, ingui Kriste; ¹⁶ Ingui o rutu aruhe mu ruza, a rua uanekua noku pamisirua kumue i itji o kanepo akehe tji ke jeta, otja ko majenisiro uo maunguriro uo kanepo akehe, oku jeta o mekuriro uo rutu kutja ru ritunge ku ro o ruini mo rusuvero. ¹⁷ Opu me tjere nai noku hatoira mu Muhona, kutja ene ka mu sere oku kaenda otja imbi o viuana tji vi kaenda, mo uripura o mungandjo, ¹⁸ O vio tji via zorerisiua mo mapangununino ua vio, tji via porua ko muinjo ua Mukuru mena ro ku hinandjiviro ku ku ri muvo mo tjimbe tjo upotu uo mutima ua vio. ¹⁹ Ovio tjinga vi hi tjina nangarire o honi, vie rijandja ko hura, oku tjita o mauhakohoke aehe noku hina meritjaerero. ²⁰ Nunguari ene kamu rihongere Kriste nao, ²¹ Tjeri, kutja ene tjiri mue mu zuva, nu amu hongua i Je, o uatjiri tjinga a uri mu Jesu. ²² Orondu ene mua soku hukura o murumendu ingui o ua rukuru, otja ko ngarero jenu indji o nguru, ingui ngua zundara otja ko zonduma ozo pukise, ²³ Nu peparisiueje mo mbepo jo zondunge zenu. ²⁴ Nu mua soku huikika o mundu ingui o mupe, ingui ngua memenua mo usemba no u japuke ua tjiri otja ko ngaro ja Mukuru. ²⁵ Nu nambano a mua imbirahi o vizeze, o mundu auhe nga hungire o uatjiri kueena o muraranganda ue, orondu auhe uetu o kanepo ko mukuao. ²⁶ Pindikeje nu amu katuka. Amu jandjere ejuva oku hitira kombanda uo mapindi uenu, ²⁷ Nu uina amu jandja o ruveze ko Munauvi. ²⁸ Nu ingui ngu ja vaka a vaka rukuao, nunguari nga kondje, a ungure no make ue o muini, kutja a kare no tjina oku jandja ku ingui nguna o uhepe. ²⁹ Ape ningi embo e hazendu ndi ma ri piti mo tjinjo tjenu, nunguari nga rire indi ndi ri e samba oku tunga, ndi mari jandja o tjari ko vapuratene. ³⁰ Nu amu hihamisa o Mbepo o Ndjapuke ja Mukuru, ndji mua rombua na jo nga ke juva ro marandururiro. ³¹ Oundandi auhe, no mazenge, no mapindi, no maposiro no mahazeraka nga je tu ue kokure naene, pueena o runjengo aruhe. ³² Nunguari karasaneje no unjanutima, no mitima o mipore, amamu jesirasana tjimuna Mukuru tje mu jesira mo tjimbe tja Kriste.