¹ Mena ra itji, ami Paulus, o mupandekua ua Jesu Kriste, ngumba pandekerua ene imba o voviuana, ² The ri kutja, tjirir, mua zuva o maunguriro uo tjari Mukuru tja jandja ku ami o hunga na ene, ³ Kutja mevandururiro Eje ua tjiukisa ku ami o tjiundikua, otja tji mba tjangere o usupi komeho, ⁴ Tji mua rese mbimbi tjanga mamu jenene oku pangununa o ndjiviro jandje mo tjiundikua tja Kriste, ⁵ Tji tji ha tjiukisirue ko vanatje vo vandu mo tuveze tuarue, otja nambano tji tja vandururua ko vaapostele no vaprofete Ve o vajapuke ijo Mbepo, ⁶ Kutja ovo viuana ve rire o varumate ve ta pamue, no vo rutu rumue, no vanarupa mo makuizikiro Ue mu Kriste mo Mbuze o Mbua: ⁷ Ami dnji mba ungurirua o mukarere, otja ko tjijandjeua tjo tjari tja Mukuru ku ami mo masa uo matjitiro Ue. ⁸ O tjari tji tja jandjeua ku ami, ngu mbi ri o muhinandengu po vajapuke avehe, oku zuvarisa o Mbuze o Mbua jo mautumbe nge ha vazeua ua Kriste mokati ko viuana, ⁹ Noku jeta o ndjerera ku avehe jokutja o rukuatjike indui o ruuano ruo tjiundikua tji tja horekerue oku za ko ngaaruhe mu Mukuru, ngua memene o vina avihe mu Jesu Kriste; ¹⁰ Kutja mu nambano mo tjimbe tjo kereka ku tjiukisiue ko maunane no mauvara mo majuru o unongo ua Mukuru uo tupa o tuingi, ¹¹ Otja ko ndando ja aruhe ndja jenenisa mu Kriste Jesu o Muhona uetu; ¹² Mu Je tuna o uvande no mahitiro noku hina mburuma motjimbe tjo ngamburiro Je. ¹³ Opu me zerire kutja amu ha ngundipara mena ro mauzeu uandje ngu me zarere ene, ngeri o ujere uenu. ¹⁴ Nu opu me zu oku uora o zongoro zandje po murungu ua Ihe uo Muhona uetu Jesu Kriste, ¹⁵ Ingui etundu arihe me Juru na kombanda je hi mu ra rukurua, ¹⁶ Kutja a jandje ku ene otja ko mautumbe uo ujere Ue, kutja mu zeuparisiue ijo Mbepo Je no masa mo mundu ingui uo moukoto, ¹⁷ Kutja mo ngamburiro Kriste a ture mo mitima vienu; kutja ene tji mua hara o mize noku zikama mo rusuvero, ¹⁸ Kutja mu jenene oku tjiua pueena o vajapuke avehe, imbui o uparanga no ure no ukoto no museka, ¹⁹ Noku tjiua o rusuvero rua Kriste ndua kapita o ndjiviro, kutja mu urisiue no meurisiro aehe ua Mukuru. ²⁰ Nambano ku ingui ngu jenena oku tjita kombanda tjinene ja imbi mbi tu ningira poo mbi tu ripura, otja ko masa nge ungura mu ete, ²¹ Ku Je nga rire o ujere mo kereka mu Kriste jesu mo tuveze atuhe aruhe nga ko ngaaruhe.