1
Nu Saulusa ngunda ija suvana omatirisiro no mazepiro, kombanda jo vahongeua va Muhona jesu, na rire tjai ko mupristeri o munene,
2
Na ka ningira o zombapira ku je ndu ma zei ko zokereka za Damascusa, kutja tja vaza vemue vo Ndjira, kutja o varumendu poo vakazendu mumue, eve pandeke nu eve jete ko Jerusalema.
3
Nu eje ngunda ama kaenda, pa kara nai kutja tje ere popezu na Damaskasa, o ndjerera ndja zire mejuru je mu koverere;
4
Nu eje a uire pehi, na zuu eraka ama ri tja nai ku je, ''Saulusa, Saulusa, Mo Ndji tatumisire tjike?''
5
Nu Saulusa eje ua tja, ''O ove une, Muhona?'' Nu Muhona Ua tja, ''Ouami Jesu ove ngu mo tatumisa;
6
Nu Muhona Ua tja ku je, ''Sekama, nu kahite mu tjihuro, nu ove mo karaerua tji ua soku tjita.''
7
No varumendu mbu ja ve kaenda puena Saulusa va kuramene ngumumu, tjiva zuvire eraka nunguari ave hina ngu mave munu.
8
Nu Saulusa ua jererue oku za mehi, no meho ue tji ja patururua, kena umue ngua muna; Nunguari ovo otji ve mu nana keke nave mu hitisa mo Damaskasa.
9
Neje ua kara oure uo majuva jetatu ae hina ku muna, nu ka rire nu ka nuine ko.
10
Nu pari o muhongeua uorive mo Damaskasa, uena Ananiasa. Nu Muhona Ua tjere nai kuje mo mbunikisiro, ''Ananias!'' Neje atja, ''Ouami ngui, Muhona.''
11
Nu Muhona Ua tja nai kuje, ''Sekama, nu u jende ko ndjira jo tjihuro ndji isaneua o Nderemane, nu ka pahe mo ndjiuo ja Judasa, umue ngu isaneua Saulusa ua Tarsusa, orondu, eje ma kumbu.
12
Nu ua munu mo mbunikisiro o murumendu ngu isaneua Ananias ama hiti na me mu jambeke o make, kutja a mune.''
13
Nu Ananiasa otja zira, ''Muhona, mba zuva movengi ohunga no murumendu ngui, o vina o vingi o virunde mbia tjita ko vajapuke Voje ko Jerusalema.
14
Nu una o uvara o kuza ko vapristeri o vanene oku pandeka avehe mbe isana Ena Roje.
15
Nunguari Muhona Ua tja ku je, ''Kaende, orondu eje o tjitjuma otji toororua ku Ami,,oku tjinda Ena Randje po murungu uo viuana vio zonganda, no zombara, no vanatje va Israera;
16
Orondu Meje ku mu raisira o vina o vingi o vinene mbi meje ku vi hihamisirua mena Rena Randje.''
17
Nu Ananiasa ua ja, na kahita mo ndjiuo ndjo. Nu ue mu jambeka o make na tja ku je, ''Mukuetu Saulus, ingui Muhona Jesu, ngua munikire kove mo ndjira indji ndji ue ere na jo, Ue ndji hindi kove kutja u mune nu u urisiue ijo Mbepo o Ndjapuke.''
18
Nu tjimanga kua uire o vina tjimuna o vitatu ko meho ue, nu tjimanga a jaruka oku muna rukuao, nu otja sekama na papitisiua;
19
Nu tjaza noku ria o vikuria, eje ua hara o masa. Nu Saulusa ua kara puena o vahongeua mo Damaskasa o majuva.
20
Nu tjimanga, eje ua utire oku hongonona Kristu, kutja Eje o Muna ua Mukuru.
21
Nunguari avehe mbe mu zuvire va himinue na ve tja, ''Ingui kaje ingui ngu ja njono imba mbuja ve isana kena indi ko Jerusalema, nu ngue jera ezeva ndi muno, kutja eve tuare po murungu uo vapristeri o vanene a va pandekua?''
22
Nunguari Saulusa ue kuririre ko murungu mo masa, na temisa o Vajuuta mba turire mo Damaskasa, ama raisa, oukahu kutja Ingui Jesu o nguri Kristu.
23
Nu kombunda jo majuva o mengi, o Vajuuta otji va tia kumue ondunge jo ku mu zepa.
24
Nunguari o tjitiero tjao tja tjiukua ku Saulusa. Novo va tjeverere o mijero o mutenja no utuku kutja ve mu zepe.
25
Nu o vahongeua ve otji ve mu toora o utuku, nave ke mu herurira mo tjihanda mo rumbo ruo maue.
26
Nu eje tje ere ko Jerusalema, Saulusa ua harere oku rikuta kuena o vahongeua, nunguari ovo ija ve mu tira avehe, nu ka ave itavere kutja eje o muhongeua.
27
Nunguari Barnabasa ue mu toora ne mu jeta ko vaapostolo, ne ve serekarere omuano Saulusa mbua muna Muhona mo ndjira no kutja Muhona ua hungira kuena je, no muano mbua zuvarisire nao mena ra Jesu no uvande ko Damaskasa.
28
Nu eje ua karere puena vo, ama hiti noku pita mo Jerusalema.
29
Ama zuvarisa mena ra Muhona no uvande, neje ua patasanene kuena o Vajuuta vo Tjihirika; nunguari ovo kunda aave kondjo oku mu kambura kutja ve mu zepe.
30
Nunguari o vakambure tjiva tjivirue tji, ve mu tuara ko Kesarea na ve mu hindi ko Tarsusa.
31
No zokereka nda tungirue nu nda panderere po ku kara nondira ku Muhona mehi arihe ra Judea, na Galilea na Samaria otji za kara mo hange, na mo maingonekero uo Mbepo Nadjapuke, naze njomoka.
32
Nu pa kara nai, Petrusa, tja pitirire muzo azehe oku ze varura, kutja ue ere uina ko vajapuke mba turire mo Lida.
33
Nu ingo u aka vazere o murumendu uorive uena Aeneasa, ngua karere mo mara o zombura hambondatu, ngua remanene.
34
Nu Petrusa ua tjere ku je, ''Aeneas, Jesu Kristu Ue ku verukisa. Sekama nu utune o mbete joje,'' neje mo tjimanga ua sekama.
35
Nu imba avehe mba turire mo Lida na Sharon ve mu muna, na ve tanaukire ku Muhona.
36
Nambano pari o muhongeua umue ko Jopa ngu ja isaneua Tapita,( tjira tanaurua o kutja ''Dorkas.'') Omukaendu ngui eje ue urire o viungura o viua no vitjitua vio tjari mbi ja tjiti ko vahepe.
37
Nu pa kara nai mo majuva ngo kutja eje ua vera na koka; nu tji vaza noku mu koha, ve mu rarisa me tuuo ro kombanda.
38
Nu mokutja o Lida jari posi ja Jopa, ovo tji va zuva kutja Petrusa u ri ngo, nu ovahongeua va hinda o varumendu vevari ku je, amave rijarikana kutja e je kuvo noku hina ku uomba,
39
Nu Petrusa otja sekama na kaenda puena vo, nu tja vaza, arire tjive mu tuara ke tuuo indo ro kombanda, No vahepundu avehe va kuramene mene re amave riri, ama vemuraisire o zombanda no mituaro Dorkasa mbia ungurire ngunda ae ri puena vo.
40
Petrusa ueve pitisa pendje ne tuo avehe, nu otja uora o zongoro, na kumbu; nukuzambo tji ma tanaukire ko rutu, arire tja tja, ''Tabitha, sekama!'' Nu eje ua paturura o meho ue, nu tja muna Petrusa a kengama.
41
Nu Petrusa eje ue mupa eke re nemu jeura; Neje tja za noku isana o vajapuke no vahepundu, ue mu jandja kuvo ae no muinjo.
42
Nu itji tja tjiukua mo Jopa atjihe. Nu ovandu ovengi arire tjiva itavere mu Muhona.
43
Nu pa kara nai kutja, Petrusa ua karere o majuva o mengi mo Jopa, puena Simona ingui o mutuke uo mikova.