¹ Nu pari no murumendu uorive, Kornelias kena, o mukendurio uo tjimbumba tjo vita tja Itali. ² Uari omurumendu omutakame nu ngua ri no ndira ku Mukuru, na imba o vo ndjiuo je avehe, ngu ja tjiti o vitjitua o vingi vio tjari ko vandu, noku kumba ku Mukuru otuveze atuhe. ³ Mangara mo ire o itja muviu je juva, eje ua muna o mbunikisiro ongahukiro jo muengeri ua Mukuru ngue ja ku je, no muengeri ua tja ku je, ''Korneliasa!'' ⁴ Nu Korneliusa otja tara mu je ua uruma na tja, ''O tjikuae, Muhona?'' No muengeri ua tja ku je, ''O zongumbiro zo je no vitjitua vioje vio tjari vieja po omazemburukiro po murungu ua Mukuru. ⁵ Nambano hinda o varumendu ko tjihuro tja Jopa, nu u isane Simona uo sano ja Petrusa. ⁶ Eje u kara puena umue, o mutuke uo mikova, ngu isaniua Simona, uo ndjiuo ndjiri mene ro muronga.'' ⁷ No muengeri nguja hungire kuena je tjaza noku jenda, Korneliusa eje ua isana o vakarere ve vevari no musorondate o mutakame, mu imba mbuja ve mu kongorere aruhe. ⁸ Nu Korneliusa eje ueve raera ovina avihe, neve hindi ko Jopa. ⁹ Nu mependukirua, imba tjiva toora ondjira nave riama popezu no tjihuro, Petrusa ua rondere ko mututu uo ndjiuo oku ka kumba. ¹⁰ Notja haverua ijo ndjara na zeri oku ria, Nunguari ngunda ama ve tunine eriro, arire tja kara otja ngua hipara, ¹¹ Na munu ejuru amari jezuruka na ku rauka o tjitjuma tjorive, tjimuna onguju onene, ama tjija kehi, ndja kutirue mo vikoro vine. ¹² Nu mutjo muari no vipuka vio vikoti vine avihe vio kombanda jehi, no vipuka vio kuti, no vipuka mbi honahona, no zondera azehe ze juru. ¹³ Ne raka ra hungira kunaje: ''Sekama, Petrusa, zepa nu u rie.'' ¹⁴ Nunguari Petrusa ua zirire, ''Aje kako, Muhona; orondu ami hija rora oku ria o vikuria ovizerikua poo o vihakohoke. ¹⁵ Ne raka ra hungira ku je rukuao o rutjavari: Itji tji tja kohua I Muhona ove kona ku tji isana ko ovizerikua.'' ¹⁶ Itji tja tjitua po tutatu, no tjitjuma atji toorerua kombanda kejuru rukuao. ¹⁷ Nunguari ngunda Petrusa ame ripura mu je o muini kutja o mbunikisiro ndji mai heje tjike, tara, o varumendu imba mba tuminue i Korneliasa tjandji va pura hapo o ndjiuo ja Simona nu va kurama po murungu po mujero. ¹⁸ Nu va ravaerere na ve pura kutja, Simona ingui uo sano ja Petrusa u kara mbo. ¹⁹ Ngunda Petrusa ame ripura no mbunikisiro, o Mbepo Ua tja ku je, Tara, o varumendu vetatu mave ku paha. ²⁰ Sekama, nu heruka, nu kaende puena vo au hina ku ivaiva, orondu Ouami ngu Mbe ve hindi. ²¹ Nu Petrusa otja herukira ko varumendu imba na tja, ''ouami ngu mamu paha. Mue jere tjike? ²² Novo va tja, ''Korneliasa ingui o mukendurio, o murumendu o musemba nu ngu tira Mukuru, nguna o mbuze ombua mo tjiuana atjihe tjo Vajuuta, ua hindirua I Mukuru o muengeri o mujapuke oku mu raera kutja nge ku isanene ko je, kutja aka zuve o mambo move. ²³ Nu Petrusa ue ve isanena moukoto, ne ve pe omara. Nu me pendukirua Petrusa ua kaenda puena vo, no vakambure vemue ve mu tikire okuza ko Jopa. ²⁴ Nu me juva ndi mari pendukirua va hita mo Kaesarea. Nu Korneliasa ue veundjiure; ngua uongerere pamue o muhoko ue no mapanga uo popezu. ²⁵ Nu Petrusa tja uta oku hita mo ukoto, Korneliasa ue mu tjakanena na uire po zombaze ze oku rikotamena kuje. ²⁶ Nunguari Petrusa ue mu jerera kombanda, ama tja, ''Sekama, ami uina o uami o mundu uriri.'' ²⁷ Nu ngunda Petrusa ama hungirire kuena je, ua hita, na vaza ovandu o vengi mba uongara. ²⁸ Neje ua tja kuvo, ''Mamu tjiua kutja pe zera o murumendu o Mujuuta oku uana poo oku riama popezu no uo viuana viarue. Nunguari Mukuru Ue ndji raisire kutja e isana omundu nangarire umue kutja uzera poo o muhakohoke. ²⁹ Nu otji mbe jere kuene ambi hina ku unauna, tji mba utu oku zuva kutja me isaneua. Nambano otji mepura kutja ene mue ndji isanene tjike?'' ³⁰ Nu Korneliasa ua tja, ''O majuva jane nga kapitire i je ritjaere ko vikuria nga ko ire ndji. Nu mo ire o itja muviu ije kumbire mo ndjuo jandje; nu tara, o murumendu uo zombanda o zongenangene otja kuramene po murungu uandje. ³¹ Nu atja, ''Korneliasa, o zongumbiro zoje za zuvirua I Mukuru, no vitjitua vioje vio tjari via zemburukua po murungu ua Mukuru. ³² Nambano hinda o vandu ko Jopa, ve ka isane Simona, uo sano ja Petrusa. U kara mo ndjiuo ja Simona, mene ro muronga.' ³³ Nu ami opu mba zire oku hinda o vandu kove mo hakahana. Nove ua tjiti naua oku ja. Nambano atuhe otji tu ri mba po murungu ua Mukuru oku zuva o vina avihe mbi ua raerua i Mukuru.'' ³⁴ Nu Petrusa otja paturura o tjinjo tje, na tja, ''Tjiri me munu kutja Mukuru ka tenge o mundu. ³⁵ Nunguari mo tjiuana atjihe, ingui ngu me Mu tira na ungura o usemba, eje ma jakurua i Je. ³⁶ Mamu tjiua Embo Eje nda hindire ko vanatje va Israera oku zuvarisa Ombuze jo hange mu Jesu Kristu, Eje Ombara ja avehe- ³⁷ Ene oveni mamu tjiua ovina mbi via kara po, mbia kara mu Judea atjihe, nu nda utire ko Galilea, kombunda jo mbapitisimo ndji ndja zuvarisirue i Johanesa; ³⁸ Ovina ohunga na Jesu ua Nasareta, kutja Mukuru ua soporere vi Jesu no Mbepo o Ndjapuke no masa. Nu Eje ua riangere ama ungura o uua, nu Ama verukisa avehe imba mba huurirue ijo munauvi, Mukuru tjinga ari puena Je. ³⁹ Nu ete o uete o zohatoi zovina avihe Jesu mbia tjitire mehi ro Vajuuta na mo Jerusalema. Ve Mu zepa nave Mu rekarekisa ko muti, ⁴⁰ Nunguari Mukuru Ue Mu pendura me juva o ritjatatu, nu E Mu raisa po rutjandja, ⁴¹ Ku ku heri koandu avehe, nunguari ko zohatoi nda toororerue komeho i Mukuru, okutja, ku ete mbu tua ria noku nua puena Je tjaza noku pendurua mo vakoke. ⁴² Nu Eje Ue tu pangura kutja tu zuvarise ko vandu noku hatoira kutja Eje ongua zikamisiua i Mukuru oku rira Omupangure uo vanamuinjo no vati. ⁴³ Nu ohunga Naje O vaprofete avehe ve hatoirira Ingui, kutja ingui auhe nguma itavere mu Je ma jakura o ndjesiro jo mauvi mena Re.'' ⁴⁴ Ngunda Petrusa ama hungire ovina mbi, o Mbepo o Ndjapuke otji ja uira ku imba avehe mba zuvire Embo ndija hungire. ⁴⁵ No vakambure imba vo masukarisiro, avehe imba mbe jere puena Petrusa, va himinue orondu o tjijandjeua tjo Mbepo o Ndjapuke tja tirahirua kombanda jo viuana uina. ⁴⁶ Ovo tjinga va zuva ovoviuana amave hungire momaraka na mave hivirike Mukuru. Nu Petrusa otja zirire, ⁴⁷ ''Pena umue ngu ma tjaere omeva ko vandu imba kutja aveha papitisiua, mba jakura o Mbepo o Ndjapuke otja ete?'' ⁴⁸ Neje ua pangura kutja ve papitisiue mena ra Jesu Kristu. Novo otji ve rijarikana kuje kutja a kare pu navo o majuva katjondumba.