¹ No ovaapostolo no vakambure mbari mo Judea, va zuvire kutja o vo viuana va jakurire Embo ra Mukuru uina. ² Nu Petrusa tjeja ko Jerusalema, imba vo masukarero ovo ve mu posisire; ³ Ama ve tja, ''Ove uaka hitire mo varumendu mbeha sukarisirue noka ria puena vo!'' ⁴ Nunguari Petrusa ueve serekarera otjina tji oku uta kombutiro, nu eve zuvisa tjo otja ko ngaendero ja tjo, ama tja, ⁵ ''Ami mbari ko tjihuro tja Jopa ame kumbu, Nu e kara tjimuna ngu mba hipara ne munu o mbunikisiro otjitjuma tjorive tjimuna o nguju ama tji heruka, ama tji ja pehi no vikoro vine oku za me juru. Notjo tja raukira ku ami. ⁶ Ami otji mba huiririka o meho uandje mu tjo, e tara ne munu o vipuka vio vikoti vine vie hi, no vipuka vio kuti, no vihonahone, no zondera ze juru. ⁷ Nu ami mba zuva e raka ama ritja nai ku ami, ''Sekama, Petrusa; zepa nu u rie!' ⁸ Nunguari ami mba tja, ''Aje kako, Muhona; orondu kapena tjina tjimue tji tji zera poo o tjihakohoke, tji tja hitire mo tjinjo tjandje nangarire mo ruveze rumue. ⁹ Nunguari eraka re ndji zira rukuao okuza me juru, 'Tji tja kohororua i Mukuru ove kona ku tji isapo otjizera.' ¹⁰ Nu itji tja tjitua po tutatu, nu avihe avi nanenua ke juru rukuao. ¹¹ Nu tareje, tjimanga o varumendu vetatu otji va kuramene po ndjiuo indji mu tuari; ava hindua ku ami okuza ko Kaesarea. ¹² No Mbepo Ue ndji rakiza oku kaenda puena vo, noku hina mbangu. No vakambure imba o hamboumue mba va kaenda puena ami, nu a tu kahita mo ndjiuo jo murumendu ngui. ¹³ Nu eje ua horora ku ete o muano mbua muna nao o muengeri mo ndjiuo je, ngua kuramene na tja nai ku je, ''Hinda o varumendu ko Jopa nu u isane Simona uo sano ja Petrusa. ¹⁴ Ngu meje ku kuraera o mambo nguma mujamua nao, ove na imba o vo ndjiuo joje.' ¹⁵ Nu tji mba utire oku hungira kuena vo, o Mbepo o Ndjapuke otji ja raukirire kombanda javo, tjimuna kuete ko mbutiro. ¹⁶ Nu otji mba zemburukire Embo ra Muhona, tja tjere, 'Johanesa tjiri ua papitisa no meja; nunguari ene mamu je ku papitisiua no Mbepo o Ndjapuke.' ¹⁷ Nu Mukuru tja jandja kuvo o tjijandjeua otjingetjo tja jandjere kuete, tji tua kamburirire mu Muhona Jesu Kristu, ami tjandje ouami une oku jenena oku tjaera Mukuru. ¹⁸ Novo tjiva zuva o vina mbi va umana, na rire tjiva hivirike Mukuru, ama ve tja, ''Okutja, Mukuru ua jandja omeriverero ko ndanaukiro jo muinjo ko viuana uina. ¹⁹ Nambano, tjiri, imba mba rimbarisirue kuarue ijo mbamisiro ndja kongorera ondiro ja Stefanus, va ja nga ko Foenicia, na ko Siprusa, na Antioka, ama ve zuvarisa Embo ko Vajuuta uriri. ²⁰ Nu tjiva vao, vari o varumendu va Siprusa na Sirene, ovo mbe jere mo Antioka, na ve zuvarisa Mbuze ja Muhona Jesu ko Vahirika. ²¹ Nu eke ra Muhona ra ri puena vo; o tjivarero o tjinene tja kamburire, na tji tanaukire ku Muhona. ²² Nu o mbuze o hunga no vina mbi ja vazere ko matui uo kereka ko Jerusalema. Novo otji va hinda Barnabasa kutja a kaende nga ko Antioka. ²³ Nu tjeja na munu o Tjari tja Muhona, ua tjatererue tjinene, neje ue ve ronga kutja ve pandere pu Muhona no mbango jo mutima uao aihe. ²⁴ Orondu eje ua ri o murumendu o muua ngue urire o Mbepo o Ndjapuke no ngamburiro, no vandu o vengi va ueziua ku Muhona. ²⁵ Nu Barnabasa otja ja ko Tarsusa oku ka paha Saulusa. ²⁶ Nu eje tja za noku mumuna, ue mu jeta ko Antioka. Nu pa kara nai, kuvo kutja ombura aihe va kara mo mbongarero jo kereka, ama ve hongo o vandu o vengi. Nu o vahongeua va isaneua o Vakriste rutenga ko Antioka. ²⁷ Nu mo majuva nga pe ere o vaprofete ko Antioka mba zire ko Jerusalema. ²⁸ Nu umue uavo, uena Agabusa, ua sekamene na tjivisa mo masa uo Mbepo o Ndjapuke kutja ma ku je ku kara o ndjara o nene mehi arihe. Indji ja kara po mo majuva uo mukesare Klaudiasa. ²⁹ Nu o vahongeua, otja pu auhe pa peua, ve rimana oku hinda ombatero ko vakambure vakuao mba turire mo Judea. ³⁰ Nu itji ovo va tjita; na ve hindi otjimariva ko vanene mu Barnabasa na Saulusa.