¹ Nu Agripa otja tja ku Paurusa, ''Ove ua jandjerua oku ri hungirira.'' Nu Paurusa otja uonjonona eke re, nerizirire. ² ''Ami me rivara o muningandu, mbara Agripa, ami tjinga ame je ku rizirira o muini po murungu uoje me juva ndi o hunga no vina avihe o Vajuuta, mu ve ndji vara o munandjo, ³ Tjinene ove otja tjinga uri o munandjiviro o nene jo tuzo no mapurira ngeri mokati ko Vajuuta. Otji me ningire kutja u ndji puratene no muretima. ⁴ Nu tjiri, o Vajuuta avehe ma ve tjiua o muano uo hupo jandje o kuza ko u mutanda uandje, tji ua ri mokati ko tjiuana tjandje o muini na ko Jerusalema. ⁵ Imba mbe ndji tjiua o kuza ko mbutiro, tjiva hatoire, kutja ami ije hupu otja o Mufarisei, mo ngaro indji o ndeu ketupa jo kambumba ko ngamburiro jetu. ⁶ Nambano mba kurama nu me pangurirua o maundjiro uo makuizikiro nga tjitirue i Mukuru koo tate. ⁷ O makuizikiro o tjingeuo o mihoko vietu imbio murongo na vivari mu ja kara no maundjiro, ama vi ungurire Mukuru no upandi o mutenja no utuku, nu mena ro maundjiro nga, mbara, Agripa, o Vajuuta omu mave ndji munu o munandjo. ⁸ Onguae tji pa soku ripurua ae ri o tjina o tjizeu oku kamburua ku ene, kutja Mukuru u pendura o vati?'' ⁹ Ami tjiri mbe ripurire muami o muini, kutja mba sere oku tjita o vina o vingi oku pirura ena ra Jesu ua Nasareta, ¹⁰ Imbi mba tjitire uina mo Jerusalema. Nu mba paterere o vengi vo vakambure mo zondorongo, tjinga mba perue o usemba ijo ovaperisteri ovanene; novo tji ja ve tu ami ije tuapo eraka randje oku itaverasana na itji. ¹¹ Nami mbe ve verereo tuingi mo zosinangonge azehe, nu eve undurire kokutja ve jamburure ena ra Muhona. Nu mba pindikire tjinene o hunga na vo, mbe ve tatumisire nga ko vihuro vio zonganda. ¹² Nu kunda ame tjiti itji, mba kukira oku jenda ko Damaskasa, no uvara no ruhindo oku za ko vapristeri o vanene; ¹³ Nu mondjira joku jenda ingo, mutenja mo kaviriviri, mbara, otji mba muna o ndjerera ndja zire kejuru, ndja kapita o ngenangeneno je juva, a ja jere oku ndji kovera na imba ovarumendu mba ri puena ami. ¹⁴ Nu tji tuaza noku uira pehi atuhe, ami mba zuva eraka ama ri hungire kuena ami nama ri tja meraka ro Tjiheperi, ''Saurusa, Saurusa, mo Ndji tatumisire tjike? O tjina o tjizeu kove oku veta o makuija.' ¹⁵ Nu ami mba tja, 'Oove une, Muhona?' Nu Muhona Ua zira, ''Ouami Jesu ngu mo tatumisa. ¹⁶ Nunguari sekama nu kurama ko zombaze zo je; orondu Ami mba munikire kove mezeva ndi, oku kuungura o mukarere no muhatoire ua imbi mbi mo tjiua ohunga Naami nai na imbi mbi Meje ku ku raisira ko murungu; ¹⁷ Ami a Me ku kutura ko vandu na kovo viuana, ku Me ku hindi, ¹⁸ oku paturura o meho uao, noku ve tanaura oku za mo ndorera oku jenda ko ndjerera, noku za mo uvara ua Saatana ko ua Mukuru, kutja ve jakure o ndjesiro jo mauvi neta ndi Me jandja kuvomokati ka imba mba kohororua ijo ngamburiro mu Ami.' ¹⁹ Kombunda ja itji, mbara Agripa, hina mba karere noku hina nduviro ko mbunikisiro ndji je juru. ²⁰ Nunguari rutenga mba urikira imba o va Damaskasa, na imba o va Jerusalema, na mo mikuro avihe via Judea, na ko viuana kutja ngave riverere ko ndanaukiro nu ve tanaukire ku Mukuru, nu ve kare no vitjitua mbia puira o meriverero ko ndanaukiro. ²¹ Motjimbe tjo vina mbi o Vajuuta otji ve ndji kamburira mo ndemberi nave hara oku ndji zepa. ²² Notja tji mba muine o mbatero oku za ku Mukuru, otji mba kara nga ke juva ndinondi, ame hatoire ko vatiti no vanene, a mi hina ku hungira tjarue pendje na imbi o vaprofete na Mose mbi va tjere mavi je ku tjitua- ²³ Kutja Kristu Ua soku hihamisiua, nokutja omutenga oku penduka mo vakoke, na raisa o ndjerera ko vandu na ko viuana. ²⁴ Nu Paurustja mana okuri zirira nai, Festus ua tjere ne raka e nene, ''Paurusa, ove ua vera o viuoze, omahongero uoje o mengi je ku purukisa.'' ²⁵ Nunguari Paurusa ua tja, ''Ami hi verere o viuoze, mutengua uo uhona Festusa, nunguari me hungire o mambo uo uatjiri nozo ndunge ozombua. ²⁶ Orondu o mbara, eje otjiua o vina mbi; nu opu me hungire po murungu ue no uvand. Orondu me itavere kutja kapena tjimue tjo vina mbi tji tja unduikua ku je; orondu o tjina tji katji tjitirirue ko tjikoro. ²⁷ Ove u itavera o vaprofete, Mbara Agrippa? Ami me tjiua kutja ove u itavera. ²⁸ Nu Agripa ua tja ku Paurusa, ''Mo iri osupi ove ua hara o ku ndji tanaura oku rira Mukriste?'' ²⁹ Nu Paurusa ua tja, ''Me kumbu ku Mukuru kutja, a ja rire oiri o supi poo onde, ha rire ove erike, nunguari kutja avehe mbu mave ndji zuu ndinondi, ve hare, nu ve kare uina otja tji mbiri oku ura, pendje no mapando nga.'' ³⁰ Nu o mbara ja sekama, no muhengemone, na Bernise uina, na imba mba haamene puena vo; ³¹ Nu tji vaza po ko ndjiuo jo mahungiriro, va hungira mokati kavo oveni, amave tja, ''O murumendu ngui kena tja tjita tji tja puira o ndiro poo o mapando.'' ³² Nu Agripa otja tja ku Festusa, ''O murumendu ingui itja kuturua andaku ke ri kuiririre ko Mukesare.''