¹ Nu ovarumendu vemue mba zire ko Judea va hongere o vakambure kutja, ''Pendje no masukarisiro, otja ko veta ja Mose, kapena ndjamo.'' ² Itji atji jeta Paurusa na Barnabasa koku hina nduvasaneno tjinene, ama ve patanisa otjina tji tjinene. No tji pa tieua kutja Paurusa na Barnabasa no vakuao vemue va Antioka nga ve jende ko Jerusalema ko vaapostolo no vanene ve tuare o tjna tji. ³ Nu nambano, ovo tji va hindirue ijo kereka, va pitira mo Foenesia na Samaria nama ve hongonona o ndjamo jo Viuana. Nu vaeta ondjoroka onenen ko varumendu ovakambure. ⁴ Novo tji va vaza ko Jerusalema, va jakurirue ijo kereka, no vaapostolo, no vanene, ovo ku va jandja o mbuze aihe jo vina avihe Mukuru mbia ungurire mu vo. ⁵ Nunguari ovarumendu tjiva mbakamburire, vemue mbari o vokambumba ko vafarisei, va sekamene na ve tja, ''Pena o hepero oku ve sukarisa no kutja ve takamise o veta ja Mose.'' ⁶ Nu o vaapostolo no vanene va uongarere oku ripura no tjina tji. ⁷ Nu kombunda jo mapatasaneno o manene, Petrusa ua sekamene na tja kuvo, ''Varumendu, vakuetu, mamu tjiua kutja Mukuru ua toororere kutja o viuana vi zuve Embo ro Mbuze o Mbua mo tjinjo tjandje kutja vi kambure, mo majuva o makuru. ⁸ Nu Mukuru, ngu tjiua o mitima, Ue ve pa o uhatoi, tja jandja o Mbepo o Ndjapuke ku vo, tjimuna ku ete. ⁹ Nu Eje ka tuapere o hani pokati ka ete na vo, tja kohororere o mitima viao no ngamburiro. ¹⁰ Nambano onguae tji mamu vanga oku rora Mukuru, noku tuako o ndjoko ko vahongeua, o ndjoko ndjiri kutja ja urire oo tate oku tjinda na ete uina? ¹¹ Nunguari tu itavera kutja mena ro tjari tja Muhona Jesu Kristu ma tu jamua, mo muano tjingeuo ovo uina mbu va itavera.'' ¹² No vandu avehe va muinine na ve puratene Barnabasa na Paurusa tji mave serekarere o vikaneno no vihimise Mukuru mbia ungurire muvo mo kati ko viuana. ¹³ Nu tji va mana oku hungira, Jakobasa ua zira, ama tja, ''Varumendu vakuetu, ndji purateneje. ¹⁴ Na Simona ua hepura kutja Mukuru rutenga ua varurire vi o viuana oku Ri toororera mo o vandu kena Re. ¹⁵ Nu o mambo uo vaprofete je itaverasana kuena itji, otja tji patjangua, ¹⁶ Ko mbunda ja itji Me kotoka nu E tungu rukuao o tjiranda tja David, tji tja uira pehi; nu Meje ku tunga rukuao o matundu ua tjo, nu E tji zikamisa, ¹⁷ Kutja o vandu mba seua po ve pahe Muhona, Na imba vo viuana avihe ena Randje mu ra isaneua, ¹⁸ Ma ku hungire Muhona, ngu ma ungura o vina mbi. No viungura vie avihe vi tjiukua I Mukuru oku za ko ngaaruhe.*** ¹⁹ Nu nambano ami otji me munu kutja atu zunga imba mba tanaukira ku Mukuru oku za mo viuana'. ²⁰ Nunguari matu vetjangere kutja ngave ri tjaere oku tundua ijo visenginina, no ruvakiro, no vina mbia siniua, no mbindu. ²¹ Orondu Mose oku za ko tuveze otu kuru una imba mbe mu hongonona mo vihuro avihe, ama resiua mo zosinangonge eSabata arihe.'' ²² Nunguari pa puiro ousemba ko vaapostolo no vanene, no kereka aihe, ja zuvasanene oku toorora Judasa ngu isaneua Barsabasa, o varumendu o zohongora mokati ko vakambure, na Silasa, puena Paurusa na Barnabasa okujenda ko Antioka. ²³ Novo va tjangere o vina mbi neke rao, ''Okuza mo vaapostolo, no vanene, no vakambure mave hindi o mbinika ko vakambure mbaza mo viuana via Antioka, na Siria, na Silisia! ²⁴ Otja tji tua zuva kutja vemue, mbu tu ha jandjere ko omatuako, mba zire mo kati ketu ve mu zunga no mambo, no ku pukisa ominjo vienu, ²⁵ Tua vaza a peri naua ku ete, tji tua zu no ku uongarera pamue no uripura umue oku hinda o varumendu o vatoororua puena o vasuverua vetu, oo Barnabasa na Paurusa, ²⁶ O varumendu mba jandjera o minjo viao ena ro Muhona uetu, Jesu Kristu. ²⁷ Nu otji tua hindi Juda na Silasa, mbu ma ve je ku mu serekarera o vina otjingevio. ²⁸ Orondu pa munikire a peri naua ko Mbepo o Ndjapuke na ku ete kutja atu ha tua ku ene otjina tjarue otji zeu pendje na imbi o vinahepero mbi: ²⁹ Kutja amu ha tunu ko vikuria mbia jandjua ko visenginina, no mbindu, no vina mbia siniua, na ko ruvakiro. Tji mue ri tjaere ku imbi mamu kara naua.Kareje naua.'' ³⁰ Novo tji va kuturua, ovo tjiri vaja ko Antioka; novo va uongere o tjimbumba nave jandja o mbapira ku tjo. ³¹ Novo tji va za no ku i resa, va jorokisirue ijo masuvisiro ua jo. ³² Nu Juda na Silasa, uina mbari o vaprofete va rongere o vakambure no mambo o mengi na ve ve zeuparisa. ³³ Novo tji vaza no ku kara o majuva, va kuturua ijo vakambure mo hange oku jaruka ko vaapostolo. ³⁴ Nunguari pa tjatera Silasa oku seua ngo.*** ³⁵ Nu Paulusa na Barnabasa uina va kara mo Antioka, ama ve hongo, noku zuvarisa ( puno ovakuao ovengi uina) Embo ra Muhona. ³⁶ Nu kombunda jo majuva katjondumba, Paulusa ua tja ku Barnabasa, ''Ngatu jaruke rukuao tu ka varure o vakambure mo tjihuro atjihe mu tua zuvarisa Embo ra Muhona, tu ka tare kutja va kamburisa vi.'' ³⁷ Nu Barnabasa ua ri no ndero jo ku kaenda puena Johanesa, ngu ja isaneua Marukusa. ³⁸ Nunguari Paulusa ue ripurire kutja kako kuua oku tuaerera Marukusa puena vo, orondu eje tje ve sire ko Pamfilia, na ha kaenda puena vo oku ka ungura o tjiungura. ³⁹ Nu imbo ave va patasana tjinene nave hanika kumue. Nu Barnabasa ua toorere Markusa nave i ko Siprasa mo skepi. ⁴⁰ Nunguari Paulusa ua toororere Silasa nave piti, tjiva zire noku jandjeua ijo vakambure ko tjari tja Mukuru. ⁴¹ Nu eje ua pitira mo Siria na Silicia, ama zeuparisa o zombongo.