¹ Nu Paurusa uina ua vaza mo Derbe na mo Listra, Nu tara, o muhongeua uorive, uena Timoteusa ua ri mo, o muatje uo mukaendu nguari o Mujuuta ngua kamburire, nunguari ihe ua ri o Muhirika. ² Nunguari no mbuze ombua mo vakambure va Listra na Ikoniuma. ³ Paulusa ua zerire kutja a kaende puena je, nu otje mu toora nemu sukarisa, motjimbe tjo Vajuuta mbari mo virongo mbio, tjinga ija ve tjiua avehe kutja ihe o Muhirika. ⁴ Novo tjija ve rianga mo vihuro, otjija ve jandja ku vo o maronga kutja ve je takamise inga nga zikamisiua ijo vaapostolo no vanene ko Jerusalema. ⁵ Nu o zokereka otji za zikamisiua mo ngamburiro naze kuru mo vivarero e juva ne juva. ⁶ Paurusa na imba mbari punaje va pitiririre mo Frigia na mo rukondo rua Galatia, na rire tji va tjaerua ijo Mbepo o Ndjapuke oku ka zuvarisa Embo ko Asia. ⁷ Nu tji veja mo Misia, va tandere oku jenda ko Bithinia, nunguari o Mbepo ja Jesu kai jandjerere. ⁸ Notji va kapita o Misia nave ja ko tjihuro tja Troasa. ⁹ Nu o mbunikisiro ja munika ku Paurusa mo utuku: O murumendu uorive ua Makedonia ua kuramene, ame rijarikana kuje, ama tja, ''Indjeje nguno ko Makedonia nu tu vatereje!'' ¹⁰ Nu Paurusa tjaza noku muna o mbunikisiro ndji, tue ritunine tjimanga oku jenda ko Makedonia, tji tua manene kutja Mukuru uetu isanene oku ka zuvarisa o Mbuze o Mbua ku vo. ¹¹ Nu otji tua sekama mo skepi ko Troasa, natu teremanene ko Samotrakia, nu mependukirua a tu jamo Neapolisa. ¹² Nu kuzambo a tu i ko Filipi, tji tjiri o tjihuro o hongora tjo rukondo rua Makedonia ndo, uina tji tja huurirue, nu tua kara o majuva katjondumba mo tjihuro tjo. ¹³ Nu me Sabata tua pitire mo tjihuro na tu i mene ro ndondu, puja tunaanguaasi mai rire oruveze ro ngumbiro. Nu tua haama pehi natu hungire kuena o vakaendu mba uongarererere mbo. ¹⁴ No mukaendu uorive uena Lidija, ngu ja randisa o zonguju o zo purpuri, ngua zire ko tjihuro tja Tiatira, ngua jozikire Muhona, ue tu zuva. Muhona ngua jezururire o mutima ue katjiri kutja a puratene no mbakatui o vina mbija vi hungirua i Paurusa. ¹⁵ Nu eje novo ndjiuo je tjavaza noku papitisiua, ue rijarikana kuete, ama tja, ''Tji mue ndji vara kutja o uami o mutakame ku Muhona, indjeje mu ka hite mo ndjiuo jandje nu mu kare ngo.'' Nu otje tu karisa pehi. ¹⁶ Nu pa kara nai ete tji ja tui ko ngumbiro kutja, tua hakaena kuena o mukazona uorive nguari no mbepo jo ku vetera. Ngu ja etere o vahona ve o rutumbo tjinene no ku vetera. ¹⁷ Nu omukaendu ingui ua kongorerere Paurusa na ete, ama ravaere, ama tja, ''O varumendu mba o vakarere va Mukuru o Mukombandambanda. Mbu ma ve zuvarisa ku ete ondjira jo ndjamo.'' ¹⁸ Nu eje ua tjitire nai o majuva o mengi. Nunguari Paurusa tja urirue, otja tanaukira ko mbepo ombi ndji, na tja, ''Me ku pangura mena ra Muhona Jesu Kristu kutja u pite mu je!'' Nojo ja pita mu je mo ruveze otjingeruo indo. ¹⁹ No vahona ve tji va muna kutja o maundjiro uo ndjambi jao ja jandekua, otji va kambura Paurusa na Sirasa nave ve nanene ko ruveze ruo marandisiro po murungu uo vanane. ²⁰ Nu tji ve ve jeta posi jo vapangure otji va tja, ''O varumendu imba mave zunganisa o tjihuro tjetu tjinene. Ovo o Vajuuta. ²¹ Novo ve honga o zongaro nde hina ku jandjerua ijo veta oku jakurua poo oku ungurua i jete, ete tjinga turi o Varoma.'' ²² No tjimbumba tjo vandu otji va sekamenenene Paurusa na Sirasa; nu ovapangure otji taura o zombanda zao no va pangure ave pangura kutja ngave tonue o zongora. ²³ Nu tji vaza no ku ve renga o zongora o zengi, ave ve umbu mo ndorongo nave rongo o mutjevere uo ndorongo oku ve takamisa tjinene. ²⁴ Neje tja zuva o maronga nga, ue ve umba me tuuo ro ndorongo ro mo ukoto, na pandekere o zombaze zao mo kati komiti. ²⁵ Nu mangara mokati ko utuku, Paurusa na Sirasa i jave kumbu noku tanga Muhona no maimburiro. Novapandekua o vakuao ve ve puratenenene. ²⁶ Nu tjimanga pa kara o manjinganjingiro uehi o manene, no mazikameno uondorongo ja njinganjingisiua; nu tjimanga o mijero avihe via jezururua, no mapando ajehe aje pandurua. ²⁷ No mutjevere uo ndorongo tja penduka, na munu o mijero vio ndorongo a via jezuruka; ua nanene engaruvio oku rizepa ama tjangovasi, o vapandekua va hene. ²⁸ Nunguari Paurusa ua ravaera ne raka e nene, ama tja, ''O rihihamisa, orondu o uete mba atuhe.'' ²⁹ Nu omutjevere uo ndorongo ua raa omarambe okujaka nu a utuka na hiti ama zezera no mburuma, nu a uire pehi po murungu ua Paurusa na Sirasa, ³⁰ Neje ue ve pitisa pendje, na tja, Varumendu, hi tjite vi kutja mbi jamue?'' ³¹ Novo va tja, ''Itavera mu Muhona Jesu Kristu, nove mo jamua na imba o vo ndjiuo jo je.'' ³² Novo va hungirire Embo ra Muhona ku je, na ku imba ovo ndjiuo je avehe. ³³ Kuzambo omutjevere N ue ve toorerere mo ire jo utuku ndjo naka koha o mazeze uao, neje na imba ove avehe va papitisiua mo hakahana. ³⁴ Neje tja eta Paurusa na Sirasa e veeta ko ndjiuo je nu eve tuninine eriro po tjitihe, ne ura ondjoroka, na imba ovo ndjiuo je avehe, tjinga a a kamburire mu Mukuru. ³⁵ Nu muhuka tji pa tji, o vapangure va hindire o vaporize, ama ve tja, ''Kuturuje o varumendu mbo ve jende.'' ³⁶ No mutjevere uo ndorongo ua hungirire o mambo nga ku Paurusa, amatja, ''O vapangure va tja nga mu jesiue mu jende. Nambano piteje, nu mu kaende mo hange.'' ³⁷ Nunguari Paurusa ua tja ku vo, ''Tjiva zire noku tu tonena po rutjandja, ete o varumendu vo Varoma, vetu umbire mo ndorongo atu ha pangurirue. Nambano mave vanga oku tu pitisa mo vineja? Kako! Nga veje o veni veje kutu pitisa.'' ³⁸ Nu o vaporize vaka horora o mambo nga ko vapangure. Novo tjiva zuva kutja o Varoma otji va uruma. ³⁹ Novo otji veja nave rijarikana kuvo. Nu tji ve ve pitisa otji ve ve ningira kutja ve pite mo tjihuro. ⁴⁰ Nu Paurusa na Sirasa va pita mo ndorongo, vaka hita ko ndjiuo ja Lidia. Novo va muna o vakambure nave ve zeuparisa na rire tji va piti mo tjihuro.