¹ Nambano o Mbepo I hungira o ukahu kutja mo tuveze to maandero ovandu tjiva maveje ku hanika no ngamburiro nu ave jandja ombango ko zombepo nde pukisa no mahongero uo zombepo o zombi ² amave pukua ijo vana vizeze mo tjavivi, avena o urizemburuka mbua rendera. ³ Amave tjaere ovandu oku kupa noho amave pangura o meritjaerero ko vikuria imbi Mukuru mbia memena oku jakurua no majandjero uo ndangi iimba mbe itavera noku tjiua o uatjiri. ⁴ Orondu o viutua avihe via Mukuru o viua, nu kapena tji tja jakurua no majandjero uo ndangi tji ma tjiso ku imbirahiua. ⁵ Orondu otjo tja kohororua ije Embo ra Mukuru no ngumbiro. ⁶ Ove tji ua zemburukisa o vakambure o vina mbi, mo rire o mukarere o muua ua Jesu Kristu. Orondu o ove ngua korua no mambo uo ngamburiro no uo mahongero o masemba ngu ua kongorera. ⁷ Nunguari panda o vihambarere vio mambo omavi mbia suverua o vakaendu ovanene. Nunguari, rimianga o muini mo vio umukuru. ⁸ Orondu oku rimianga mo rutu kuna o ndengu onditi, nunguari o umukuru una o ndengu mo vina avihe. Uno makuizikiro mo hupo ja nambano nai no ua indji ndji mai ja. ⁹ Embo indi e takame nu ra puirua ijo majakuriro ajehe. ¹⁰ Orondu itji otji tu ungurira noku kondjera. Ete tjinga atu na o maundjiro mu Mukuru o munamuinjo, ngu uri o Mujame uo vandu avehe, tjinene imba mbe itavera. ¹¹ Ronga ovandu no ku ve honga ovina mbi. ¹² Apena ngu meku njengurire o utiti uo je, nunguari rira o tjihorera ko vakambure me raka, mo ngaro, mo rusuvero, mo utakame, no mo ukohoke. ¹³ Ngaa tji mbe ja, pandera poku resa, noku zeuparisa, nako ku honga. ¹⁴ Ororo o zembi o tjijandjeua tji tjiri move, tji tja jandjua kove no maporofetero, pueena o majambekero uo make ijo vanene. ¹⁵ Tuako o mbango ko vina mbi. Kara muvio, okutja oku jenda kue ko murungu ku munike ko vandu avehe. ¹⁶ Tuako o mbango ku ove o muini na ko mahongero. Pandera pu imbi. orondu moku tjita nai mo jama ove o muini na imba mbe ku pratena.