¹ Ja̧hua̧nö̧ ja̧'a̧ Moisés Tö̧ä̧nä̧hua̧ Diosrö pä'inödo: Esetocotö ttäcuotö a̧'cua̧ra̧'a̧. Pärocua'acu ttörö pättäcuotö a̧'cua̧ra̧'a̧: Isocö. Tu̧ru̧hua̧ Dios ucuru ijȩcuo̧co̧cu̧ pinö̧jä̧ pä'ö. ² Tu̧ru̧hua̧ Dios Moisésrö pä'inödo: ¿Däje jä̧ttö̧ cu̧mö̧nä̧ 'chu̧cu̧huä̧rö̧mä̧? Moisés ädätinödo: Chitta'ca. ³ Ja̧'hua̧nö̧ ja̧'a̧ Tu̧ru̧hua̧ Dios hueinäcudo: Cuitta'ca rȩjȩ icui. Moisés itta'ca rȩjȩ icuomenä, äcatä päi'ina'ado. Moisés ye'ö tö'ipächi'inödo. ⁴ Ja̧'hua̧nö̧ ja̧'a̧nä̧ Tu̧ru̧hua̧ Dios Moisésrö pä'inödo: Cumö ki̧'ä̧dö̧, ihuiri'pa̧ttö̧ 'chu'ädi. U̧ru̧hua̧ hueö ta'anö 'chuhuädomenä, pä'äji ta'anö itta'catä päi'iniyäcudo. ⁵ Juhua'a yabocu Tu̧ru̧hua̧ Dios päinäcudo: Pä'äji ta'anö jȩpö̧sä̧ Cu̧ru̧hua̧tu̧cu̧ ucutu cuä̧do̧tö̧minä̧ Ttö̧ä̧nä̧hua̧, Abrahamminä'inä, Isaacminä̧'inä, Jacobminä̧'inä Ttö̧ä̧nä̧hua̧ ucuru chijȩcuä̧jimä̧ ttesetäcua'anö, pä'inödo Dios. ⁶ Ja̧'hua̧ta̧nö̧ Tu̧ru̧hua̧ Dios Moisésrö pä'inödo: Cu̧mö̧ rä'ädäcuähui cu̧'ca̧tä̧huä̧ta̧ jacuä cu̧bä̧ dea'a. Tu̧ru̧hua̧ Dios ja̧'hua̧nö̧ päcu, Moisés ö̧'ca̧tä̧huä̧ta̧ jacuä u̧bä̧ dea'a u̧mö̧ rä'ädäcuähuinödo. Rä'ädäcuähuäji'ca̧ 'cho'äu toomenä, ajiya isoppa teoppa jä̧'inö̧'a̧nö̧ teina'ado u̧mö̧mä̧, lepra märicheittö. ⁷ Ja̧'hua̧nö̧ ja̧'a̧ Tu̧ru̧hua̧ Moisésrö pä'inödo: Pä'äji ta'anö cu̧mö̧ rä'ädäcuähui cu̧'ca̧tä̧huä̧ta̧ jacuä cu̧bä̧ dea'a. Moisés pä'äji ta'anö ö̧'ca̧tä̧huä̧ta̧ jacuä u̧bä̧ dea'a u̧mö̧ rä'ädäcuähuinödo. Pä'äji ta'anö 'cho'äu toomenä, lepra märichei jä̧jimä̧ täcö huahuächipäja'atä topäcuähuinödo. Korome ijȩta̧ adihuome ta'anö päi'inäcudo. ⁸ Juhua'a yabonö Tu̧ru̧hua̧ Dios pä'inödo: Cuitta'ca äca päi'a'a tottomenä ttesetö juiyöttömä, cu̧mö̧ cu̧'ca̧tä̧huä̧ta̧ jacuä cu̧bä̧ dea'a rä'ädäcuähui'ö'ca̧ 'chocuhuähua'a tottomenä ttesetäcua'anö. ⁹ Ja̧u̧ todäre ijȩcuä̧ jȩcu̧'o̧mȩnä̧ ttesetö juiyöttömä, ucuru'inä ttä̧ju̧cuo̧ca̧'a̧ jö̧ttö̧mä̧, jȩcu̧'ä̧ji'inä̧ ttesetö juiyöttömä, Nilo ajettö ajiya huä'opö tocuhuaja rȩjȩ ajiya joome. Ja̧'hua̧nö̧ ja̧'a̧ttö̧ Nilo ajettö ajiya tocuhuomenä, ttucuojatä päi'äcua'a rȩjȩ ajiya joomemä. ¹⁰ Ja̧'hua̧nö̧ ja̧'a̧ Moisés ädätinödo Tu̧ru̧hua̧ Diosrö. Chu̧ru̧hua̧, ttömä adiunä chucuocuä̧rö̧ juiyö'anö hua̧sä̧. Mo ttörö huecu'inö'inä adiunä ucuocuä̧ro̧cö̧ pinösä. Jitä'inä ttö ucu cu̧mö̧huä̧ya̧ cha'anä, chihuȩnȩ'inä̧ adiunämä ucuocuä̧ro̧cö̧sä̧. ¹¹ Ja̧'hua̧nö̧ ja̧'a̧ Tu̧ru̧hua̧ Dios Moisésrö pä'inödo: ¿Di jä̧ttö̧ ttö̧ja̧ isa̧ ä aditinömä? ¿Di jä̧ttö̧ ihuȩnȩ jui'a̧rö̧'inä̧, ä̧ju̧cuo̧cö̧rö̧'inä̧, adiu topä̧rö̧rö̧'inä̧, ä̧to̧ca̧rö̧'inä̧ aditömä? Ttötä ucu Cu̧ru̧hua̧ ja̧'hua̧nö̧ aditömä ¿isodi? ¹² Ja̧'hua̧nö̧ ja̧'a̧ttö̧ ucuocuäji. Cuänä cucuocuomenä ucutäcu chu̧cuo̧cuä̧cua̧sä̧. Chu̧huo̧juȩtä̧cua̧jä̧ ucu cucuocuä̧cu̧ȩmä̧. ¹³ Ja̧'hua̧nö̧ ja̧'a̧nä̧ Moisés ädätinödo: Chu̧ru̧hua̧, ka̧ra̧rö̧tä̧ hue'i ucu pä̧huä̧ rö̧jö̧ tocu'äcuru, cuihuȩnȩ jiähua pä'ö. ¹⁴ Ja̧'hua̧nö̧ päa'a ä̧ju̧cuo̧mȩnä̧, Tu̧ru̧hua̧ Dios Moisésrö ra̧huä̧ripinö̧do. Pä'inödo: Ye, ja̧'hua̧nö̧ jö̧ttö̧mä̧, cuböo Aarón'inä Leví isotö isa̧ kö̧. Ja̧u̧mä̧ adiu ucuocuä̧rö̧ chu̧huo̧juä̧cu̧. Ja̧'hua̧ta̧nö̧ ja̧u̧mä̧ täcö ichö ucuru mä̧nä̧ kä'cottö pä̧tȩcuä̧ päi'a pä'ö. Ucuru toomenä, rö̧ȩnä̧ ȩsȩhuä̧cua̧. ¹⁵ Ja̧u̧cu̧ ucuocu huȩnȩ jä̧jimä̧ jicuhuaröja. Ja̧'hua̧ta̧nö̧ ttötä ucu cuänä'inä, ja̧u̧ änä'inä chu̧cuo̧cuä̧cua̧sä̧. Jȩcu̧'ätu̧cuä̧cuȩmä̧ chu̧huo̧juȩtä̧cua̧sä̧. ¹⁶ Ja̧'hua̧ta̧nö̧ ucu cucuocuaji juäimä, ja̧u̧tä̧ Israel ttö̧ja̧rö̧ u̧cuo̧cuä̧cua̧. Ja̧u̧mä̧ ucu cuä ta'anö ö̧jä̧cua̧. Ucutä ja̧u̧ Ö̧ä̧nä̧hua̧ ta'anö cu̧jä̧cua̧jä̧. ¹⁷ Ja̧'hua̧ta̧nö̧ cu̧mö̧nä̧ ȩpi̧cuitta'ca, huo̧juȩcuä̧ päi'önä jȩcu̧'ä̧cua̧'a̧nö̧ pä'inödo Dios Moisésrö. ¹⁸ Tu̧ru̧hua̧ Dios päji huȩnȩ ä̧ju̧cuä̧ji'ca̧, Moisés juhua'attö rä'opö, imi̧ya̧ Jetro ö̧jo̧mȩcu̧ ppa̧'ä̧chinö̧do. Imiy̧ a̧rö̧ pä'inödo: Egipto rȩjȩra̧'a̧ hue'ittö, chahuaruhuä Egipto rȩjȩra̧'a̧ ka̧cuä̧tö̧rö̧ ppa̧dä̧cha̧ pä'ö, jinä̧ tta̧'cua̧ra̧ pä'ö tochäja pä'inödo. Ja̧'hua̧nö̧ ja̧'a̧ Jetro Moisésrö pä'inödo: Ye, ja̧'hua̧nö̧ jö̧ttö̧mä̧ adiu täi. ¹⁹ Moisés Madián rȩjȩra̧'a̧ ö̧jo̧mȩnä̧, Tu̧ru̧hua̧ Dios ja̧u̧ru̧ päina'a jina̧'a̧do: Ppa̧cu̧huä̧cha̧'a̧ Egipto rȩjȩra̧'a̧. O'ca toi'önä ucuru cuä'ö tticua amöcuädinätömä täcö hua'ö icuinätö pä'inödo Tu̧ru̧hua̧ Diosmä. ²⁰ Ja̧'hua̧nö̧ ja̧'a̧ Moisésmä imiy̧a̧ Jetro hueäji ta'anö itti̧mö̧rö̧'inä̧, itti̧mö̧ tta̧ju̧ru̧'inä̧ burronä cä'epö huä̧nö̧, Egipto rȩjȩra̧'a̧ ppa̧'ä̧chinö̧do. Ja̧'hua̧ta̧nö̧ u̧mö̧nä̧ 'chö̧huä̧rä̧nö̧ ȩpinö̧do itta'ca Tö̧ä̧nä̧hua̧ Dios hueinä'ca. ²¹ To̧a̧na̧hua̧ Dios Moiserö pa̧inö Egipto rȩjȩ'aa̧ ppa'cuaho̧mena Ucujȩcua̧cua̧jä̧ ²² Faraonrö cui̧jȩpa̧cuä̧jä̧ ttö chu̧jörö u̧cu̧nä kano chijȩpä̧cuä̧mä Amisoqui amacuä̧dö̧tö kiyä̧chia̧cu̧a̧ pa̧ömä Faraonro jicua̧hu̧a̧ja̧ To̧a̧na̧hua̧ Dios pa'inö Israelma ttö chi̧tti̧ äca̧nä̧ ttoja isa ji̧nä̧ä̧ ²³ Ja̧hua̧ta̧nö̧ u̧cu̧ru̧ta̧ pä̧ö̧sa̧ ttö chi̧ttirö̧ raopa i̧cui̧ jao esehuam pa̧cu̧ttoma toca ya̧pa̧rema jepocusa ra̧o̧pö̧ cui̧cua̧ paö ttoca ya̧pa̧rema jepocusa ra̧o̧pö̧ cui̧cua̧ paö ttö̧mä̧ jȩcä̧cuä̧sä̧ cuitti a̧ca̧nä̧ huä̧pchi̧nöromä̧ cu̧ä̧chi̧cuä̧äsä̧ cuitti a̧ca̧nä̧ huä̧pä̧chi̧nörömä̧ cua̧ö chi̧cua̧cua̧sä̧ ²⁴ Ja̧'hua̧nö̧ ja̧'a̧ mä̧nä̧ttö̧mä̧, jahuätö yodo jä̧u̧ ttö̧jä̧mä̧do̧mȩnä̧, TÖ̧Ä̧NÄ̧HUA̧MÄ̧ Moisésrö cuä'ö icua pä'ö jȩpi̧nö̧. ²⁵ Ja̧'hua̧nö̧ ja̧'a̧ Seforamä nahuodä ido'quittö adicuodä ȩmo̧po̧'ö̧, ki̧tti̧ u̧dä̧pä̧rȩ päjure 'cui'opinä̧ju̧, ja̧'hua̧nö̧ 'cui'opö öjahuiyä kada'ca rötinä̧ju̧, ja̧'hua̧nö̧ ja̧'a̧ pä'inä̧ju̧" Isopäi'önä ucumä chucuojattö chirecuoä̧." ²⁶ Ja̧'hua̧nö̧ ja̧'a̧ TÖ̧Ä̧NÄ̧HUA̧MÄ̧ huȩnȩ juiyönätä u̧ju̧ni̧'i̧nä̧u̧. Jahuäjumä pä'inä̧ju̧ ucumä chucuojattö chirecuojä̧, ttö̧dä̧pä̧rȩ päjure 'cuiocuä jähuänä̧mä̧. ²⁷ Ja̧'hua̧nö̧ ja̧'a̧ Tu̧ru̧hua̧ Dios Moisés uböo Aarónrö pä'inödo: Ttö̧ja̧ toächome täi Moisésrö cui'ätecua pä'ö. Ja̧'hua̧nö̧ 'chä̧nö̧, Tö̧ä̧nä̧hua̧ Dios ijȩcuä̧cuo̧mȩ inähuä kada'cattö ö̧jä̧hua̧rö̧ pä̧tȩcuä̧ pä'i'ö, 'chu̧'o̧pö̧ esehuinödo. ²⁸ Juhuorötä Moisés Tu̧ru̧hua̧ Dios hueinö huȩnȩ o'ca juiyö ttö̧ja̧ ttieru juäi jȩa̧ pä'ö hueinö'inä Aarónrö ji'ähuinödo. ²⁹ Ja̧u̧nu̧ o'ca'a Moisés'inä, Aarón'inä 'chä̧nö̧, Israel ttö̧ja̧ttö̧ u̧mä̧tö̧ tä̧mö̧tä̧ ttö̧ca̧ca̧cua̧ pä'ö hue'inätödo. ³⁰ Jahuätörö ji'ähuinödo Aarónmä Tu̧ru̧hua̧ Dios Moisésrö ucuocuinömä o'ca juiyö. Ja̧'hua̧ta̧nö̧ Tu̧ru̧hua̧ Dios hueinö ta'anö jȩpinö̧do ttö̧ja̧ ttieru juäi ttö̧ja̧ tottönä. ³¹ Ja̧'hua̧nö̧ jittähua'a ä̧ju̧cu̧, esetinätödo. Ja̧'hua̧ta̧nö̧ Israel ttö̧ja̧ jitörötä surojö 'cuäopa'attö Tu̧ru̧hua̧ Dios re rö̧jö̧nä̧ toa'a ttä̧ju̧cuo̧mȩnä̧, ja̧rȩyu̧nu̧ pä'i'ö ucuotönö jȩpinä̧tö̧do Diosrö.