¹ Juhua'a kä̧nö̧ Moisésmä imiy̧ a̧ Jetro ä̧jimö̧rö̧ tta̧'ä̧rinö̧do. Jetromä ru̧hua̧ pinödo Madián rȩjȩra̧'a̧ttö̧. Moisés ovejatö̧rö̧ ȩpinö̧do ttö̧ja̧ toächome pä̧tȩcuä̧nö̧ päte'ö Sinaí inähuära'a, Tö̧ä̧nä̧hua̧ Dios ijȩcuä̧cuo̧mȩ inähuära'a. ² Juhua'attö Tu̧ru̧hua̧ Dios huȩ'ä̧hua̧ ángel Moisésrö ijȩcuinö̧do dau u'cua jäinä ocurä cuoa'a jä̧'inö̧'a̧nö̧ jäittö. Moisés toomenä, dau u'cua jäimä ocurä cuoa'anä, cuo'ö icuoca'a jiy̧ ä̧cu̧ ye'önö topinödo. ³ “Cuo'ömä cuoa'anä, dau u'cua jäimä ¿tta̧'a̧nö̧ pä'ö cuo'ö icuocua'a jä̧ttö̧? 'Quȩ'ichö̧ 'chä̧nö̧ tochäjäcua'ato,” pä'ö amöcuädinödo Moisés. ⁴ Ja̧'hua̧nö̧ ja̧'a̧ Moisés 'cä̧'ichö̧ 'chä̧nö̧ toomenä, Tu̧ru̧hua̧ Dios Moisésrö ucuocuinödo dau u'cua jäittö. Moisés, Moisés pä'inödo. Moisés ädätinödo: Pȩnȩtä̧ kö̧sä̧. ⁵ Ja̧'hua̧nö̧ ja̧'a̧ Tu̧ru̧hua̧ Dios pä'inödo: Tö'cönänömä cuichi'ä'. Cu̧jä̧pö̧ isäya ko̧'ä̧dä̧cuä̧u̧ icui. Ju̧huȩnȩ ucu cu̧jä̧do̧mȩmä̧, ttö adihuä isa̧ chiŗ ȩjä̧. ⁶ Ja̧'hua̧ta̧nö̧ pä'inödo: Ttötäsä cuä'ominä̧ Ö̧ä̧nä̧hua̧mä̧, Abrahamminä Ö̧ä̧nä̧hua̧mä̧, Isaacminä̧ Ö̧ä̧nä̧hua̧mä̧, Jacobminä̧ Ö̧ä̧nä̧hua̧mä̧ ttötäsä. Ja̧u̧ huȩnȩ ä̧ju̧cu̧, Moisés i'ä mö̧'ȩcuinö̧do, Ö̧ä̧nä̧hua̧ Diosrö topö yecue'a'attö. ⁷ Tu̧ru̧hua̧ Dios juhua'a yabocu pä'inödo: Iso päi'önä chumöhuäyotö Egipto rȩjȩnä̧ ka̧cuä̧tö̧mä̧ pä̧icu̧nä̧ aditö kä̧nö̧ tta̧'cua̧ tta̧ttȩcu̧nä̧ huettinä̧u̧ topäjisä. Ja̧'hua̧ta̧nö̧ hueähuä isotö suronä jȩttä̧u̧ huotta'a ä̧ju̧cuä̧jisä̧. Ubara ttuttu'inä, huo̧jua̧sä̧. ⁸ Ja̧'hua̧nö̧ ja̧'a̧ttö̧ mȩyȩhuä̧jisä̧ Egipto rȩjȩ ttö̧ja̧ ttu̧mö̧ttö̧ 'chodipatö pä'ö, ja̧'hua̧ta̧nö̧ Egipto rȩjȩttö̧ rä'epö chicuatö pä'ö, korojä̧ rȩjȩ a̧dihuä̧jä̧, rö̧ä̧jä̧ cuähuä ppuruhuä̧jä̧ra̧'a̧ chȩpa̧tö̧ pä'ö. Juhuä̧jä̧ra̧'a̧mä̧ cananeos ttö̧ja̧'inä̧, hititas ttö̧ja̧'inä̧, amorreos ttö̧ja̧'inä̧, ferezeos ttö̧ja̧'inä̧, heveos ttö̧ja̧'inä̧, jebuseos ttö̧ja̧'inä̧ ka̧cuä̧tö̧. ⁹ Iso päi'önä Israel ttö̧ja̧ rö̧ȩnä̧ ajuäunu huotta'a ä̧ju̧cuä̧jisä̧. Ja̧'hua̧ta̧nö̧ Egipto rȩjȩ ttö̧ja̧ jahuätörö suronä huettära'a topäjisä. ¹⁰ Ja̧'hua̧nö̧ ja̧'a̧ttö̧ ucuru hue'ösä Egipto rȩjȩ ru̧hua̧rö̧ ucuocuäji, chumöhuäyotö Israel ttö̧ja̧rö̧ rä'epö cuicuatö pä'ö Egiptottö, pä'inödo Tu̧ru̧hua̧ Dios. ¹¹ Ja̧'hua̧nö̧ ja̧'a̧nä̧ Moisés Tö̧ä̧nä̧hua̧ Diosrö pä'inödo: Egipto rȩjȩ ru̧hua̧cu̧mä̧ ucuocu chi'chö̧ juiyö'anö hua̧sä̧ ttömä, Egipto rȩjȩttö̧ ucu cumöhuäyotö Israel ttö̧ja̧rö̧ rä'epö chicua pä'ö. ¹² Ja̧'hua̧nö̧ ja̧'a̧nä̧ Tö̧ä̧nä̧hua̧ Dios päinäcudo: Ttömä iso päi'önä ucutäcu chö̧jä̧cua̧sä̧. Pa̧'a̧nö̧ cu̧huo̧juä̧cua̧jä̧ ttötä ucuru huedömä. Egipto rȩjȩra̧'a̧ttö̧ ttö̧ja̧rö̧ cui'cächö o'ca'a, pihuä inähuättö jahuätöcu ttörö ucuotönö amöcuädö ttö huedö jȩcu̧'ä̧cuo̧tö̧jä̧. ¹³ Ja̧'hua̧nö̧ ja̧'a̧ Moisés Tö̧ä̧nä̧hua̧ Diosrö pä'inödo: ―Ttö Israel ttö̧ja̧ ttö̧ja̧cuo̧mȩ 'chä̧nö̧, jahuätörö jidähuomenä: Cuä̧do̧tö̧minä̧ Ttö̧ä̧nä̧hua̧ Dios hueäcusä ucuturu. Pädomenä, ¿tta̧'a̧nö̧ micua̧ jä̧ttö̧ imimä̧ pä'ö? jahuätö jättepöttömä, ¿tta̧'a̧nö̧ chädätäcua'a jä̧ttö̧? ¹⁴ Ja̧'hua̧nö̧ ja̧'a̧ Tö̧ä̧nä̧hua̧ Dios Moisésrö pä'inödo: TTÖTÄSÄ KÖ̧MÄ̧ IHUEYE TTÖTÄSÄ. Pa̧'a̧nö̧ pä'ö jicuhuähuaja Israel ttö̧ja̧rö̧: IHUEYE TTÖTÄSÄ pä'ö micua̧ hueinäcusä ucuturu jidähua pä'ö, päcuhuaja. ¹⁵ Juhua'a yabocu Tö̧ä̧nä̧hua̧ Dios pä'inödo Moisésrö: Pa̧'a̧nö̧ jicuhuähuaja Israel ttö̧ja̧rö̧: Tu̧ru̧hua̧, cuä̧do̧tö̧minä̧ Abraham'inä, Isaac'inä, Jacob'inä Ttö̧ä̧nä̧hua̧ Dios, ttörö hueinäcusä ucuturu pä'ö, jicuhuähuaja pä'inödo Dios. Jitä chi̧mi̧ pädäjimä IHUEYE TTÖTÄSÄ beipächocö chimimä̧. Pi̧yȩtä̧ 'cuäopönätä chimimä̧ pä'äji pä'ö, jicuhuähuaja. ¹⁶ Israel ttö̧ja̧ttö̧ u̧mä̧tö̧ tä̧mö̧tä̧ cu̧ca̧ca̧cuätu̧cua̧ pä'ö hue'inö pä'ö, jicuhuähuaja. Jahuätörö jicuhuähuaja: Tu̧ru̧hua̧, tä̧do̧tö̧minä̧ Ttö̧ä̧nä̧hua̧ Dios, Abraham'inä, Isaac'inä, Jacob'inä Ttö̧ä̧nä̧hua̧ ttörö ijȩcu̧ päinäcusä pä'ö: Cha̧'cua̧ tta̧nö̧ topösä Egipto rȩjȩ ttö̧ja̧ ucuturu suronä jȩttö̧mä̧. ¹⁷ Ja̧'hua̧nö̧ tocha'attö pä'ösä: Ucuturu rä'epö chicuä̧cua̧sä̧ Egipto rȩjȩttö̧, ubara ttucuhuätucuomettö, korojä̧ra̧'a̧ cuähuä ppuruhuä̧jä̧ra̧'a̧ chȩpätu̧cua̧cu̧ pä'ö. Ja̧huä̧jä̧ra̧'a̧ ka̧cuä̧tö̧ cananeos ttö̧ja̧'inä̧, hititas ttö̧ja̧'inä̧, amorreos ttö̧ja̧'inä̧, ferezeos ttö̧ja̧'inä̧, heveos ttö̧ja̧'inä̧, jebuseos ttö̧ja̧'inä̧. ¹⁸ Ja̧'hua̧nö̧ ja̧'a̧ chumöhuäyotö Israel ttö̧ja̧ ucu päcumä adiu ttä̧ju̧cuä̧cuo̧tö̧. Ja̧'hua̧nö̧ ja̧'a̧ ucucu, Israel ttö̧ja̧ttö̧ tä̧mö̧cu̧ Egipto rȩjȩ ttö̧ja̧ ttu̧ru̧hua̧rö̧ 'chä̧nö̧, pä̧cuhuä̧cua̧jä̧: Tu̧ru̧hua̧, Israel ttö̧ja̧ Tö̧ä̧nä̧hua̧ Dios, ujuturu ucuocuinö pä'ö. Ja̧'hua̧nö̧ ja̧'a̧ttö̧ huäbodäcuä mo̧ro̧ 'chä̧cuä̧huo̧mȩ ttö̧ja̧ toächomecu huecuhuatö pä'ö jä'epö ichäjätöjä, Tu̧ru̧hua̧ Tö̧ä̧nä̧hua̧ Dios koro juo'otörö ku icu tiya pä'ö, päcuhuäcuotöjä. ¹⁹ Ja̧'hua̧nö̧ ja̧'a̧nä̧ ro̧ȩcuä̧ 'cuäopoca'a jö̧ttö̧mä̧, Egipto rȩjȩ ru̧hua̧mä̧ räcuopätucua pä'ö hue'ocö jä̧cua̧. ²⁰ Ja̧'hua̧nö̧ ja̧'a̧ttö̧ ttö chujurunä ttö̧ja̧ ttieru juäi jȩchä̧cua̧sä̧ Egipto rȩjȩ ttö̧ja̧ rö̧ȩnä̧ yettecue'ächönä. Ja̧u̧nu̧ o'ca'a ja̧'a̧tä̧ to̧ä̧cua̧ ru̧hua̧mä̧, räcuopätucua'anä. ²¹ Egipto rȩjȩ ttö̧ja̧ ucuturu ucuotönö tottäcuotö. Ja̧'hua̧ta̧nö̧ räcuopätucuomenä, koro juäi jui'ömä rä'opocotö cuäcuotöjä. ²² Israel ttö̧ja̧ttö̧ nä̧tö̧ o'ca toi'önä jättepäcuotö Egipto rȩjȩnä̧ ka̧cuä̧tö̧ttö̧, ttö̧jo̧mȩ tö'cö ka̧cuä̧tö̧ttö̧'inä̧, ttojusodenä kä̧ju̧ttu̧'inä̧ koro juäi pärätättö adicuä'inä, koro juäi orottö adicuä'inä, ttö̧'ca̧tä̧huäti̧yu̧'inä̧, cuittimö̧tu̧cu̧ u̧mä̧tö̧rö̧'inä̧, nä̧tö̧rö̧'inä̧ cu̧'ca̧tätu̧cua̧ pä'ö. Ja̧'hua̧nö̧ Egipto rȩjȩ ttö̧ja̧ ttöärettö cuȩpä̧cuo̧tö̧jä̧ pä'inödo Tö̧ä̧nä̧hua̧ Dios.