¹ Manase'inä ku̧nä̧ri̧nö̧do tu̧mu̧ tomurenö ja̧'a̧nä̧ ttö̧jä̧pu̧ttö̧ to'cherenö a̧'ȩ ruhuo huea pä'ö ö̧jä̧mä̧di̧nö̧ pä̧nä̧mä̧, ja̧u̧mä̧ ttö̧ja̧sa̧ ya̧tȩ 'cuäoanä ka̧ra̧ u̧mu̧ tomurenö ja̧'a̧nä̧ i̧jä̧pu̧ ji̧u̧tȩnö̧ a̧'ȩ jo̧mȩnä̧ hueinödo Jerusalen ötahuiyänämä. Ja̧u̧ a̧ju̧mä̧ micuinäju Hepsiba pä'ö. ² U̧ru̧hua̧ Ö̧nä̧hua̧ ä'cattö suronä jȩpi̧nö̧do, ja̧u̧mä̧. Pi̧jä̧ ttö̧ja̧ jȩttä̧'chö̧ juäitä Tu̧ru̧hua̧ Tö̧ä̧nä̧hua̧rö̧ 'tucuotocö ji̧nö̧ juäitä Israel ttö̧ja̧ räepö icuähuotö pätti'ina'anö̧tä̧. ³ Ja̧u̧ aditinö muä'quiyu jutoju odonä Ezequia jȩi̧nö̧'a̧nö̧, jä'o, surojuoepu jȩpu̧ icuinö ji̧nö̧, ja̧hua̧ta̧'a̧nö̧ aditinödo korotö Ttö̧ä̧nä̧hua̧ Baalrö kuicu iyähuä o'ca dea'inä jȩpi̧nö̧do, Acab jȩi̧nö̧'a̧nö̧ Israel ttö̧ja̧ Ttu̧ru̧hua̧ ja̧hua̧ta̧'a̧nö̧ ja̧u̧mä̧ o'cotö'inä siri'cö mo̧ro̧jä̧nä̧ rö̧jä̧tö̧rö̧ ö̧nä̧hua̧tö̧ juoepinödo jä̧rȩyu̧nö̧ jȩpä̧chö̧. ⁴ Manasesmä Dios ojusodenä aditinö korotö ttö̧ä̧nä̧huo̧tö̧rö̧ ku icu iyähuä o'ca. Uru̧hua̧ Ö̧ä̧nä̧hua̧ jiähuäjäcu ja̧'a̧nä̧ jarodinödo: "Isopä'inä Jerusalenätä jä̧cua̧to chi̧mi̧ 'cuäopunä kä̧cua̧'a̧mä̧. ⁵ Ja̧u̧ aditinödo o'catoinä si̧ri̧'cö̧ mo̧ro̧jä̧nä̧ rö̧jä̧tö̧rö̧ ku icu iyähuä o'ca Tu̧ru̧hua̧ Tö̧ä̧nä̧hua̧ ojuisode pariyä tarärenä pä'iönä. ⁶ Ja̧u̧mä̧ i̧tti̧rö̧ ocuränä 'cuäepäji icuinödo, jȩpi̧nö̧ ä'canä 'cuäopäcuȩ'i̧nä̧ märipä'inä ja̧hua̧ta̧'a̧nö̧ huainätö̧rö̧ jättepa'a pä'ö'inä hueä'chinödo ttucuocunä'inä ä'cattö surojötä jȩpä̧'chi̧nö̧do ja̧hua̧ta̧'a̧nö̧ Diosrö päitinödo surojuoächönä jȩa̧rö̧ pä'ötä. ⁷ Asera pä'ö micuaju ka̧'cuo̧jä̧ 'co̧'ö̧ adicua'a ja̧u̧tä̧ aditinodä, ja̧u̧mä̧ 'cächö ku̧ni̧nö̧ Tu̧ru̧hua̧ ojusodenä. Pode isodetä ji̧na̧'a̧ Tu̧ru̧hua̧ ucuocuinodemä Davidrö'inä ja̧'hu̧a̧ta̧'a̧nö̧ i̧tti̧ Salomonrö̧'i̧nä̧, cua̧di̧tä̧cua̧jä̧ päinodemä:"Pode isode Jerusalen jacuä huodenätä ja̧'a̧ ,o'catoi'önä Israel ahuaruhuä 'cotömä̧, ji̧nä̧ yo̧mȩtȩ ca̧ca̧cu̧ pä'cäri jȩcu̧'ä̧cuo̧tö̧jä̧ 'cuäopönätä ttö chi̧mi̧nä̧. ⁸ Ttömä jȩpo̧cö̧ pi̧nö̧sä̧ Israel ttö̧ja̧ ttö̧jä̧pö̧mä̧ ttä̧do̧tö̧ mi̧nä̧rö̧ chi̧yi̧nä̧jä̧ rȩjȩttö̧ kara'acu tti̧'cha̧ pä'ömä, ja'huätömä jueönätä tu̧huȩcuä̧nä̧ tti̧'cha̧ pä'ö ji̧na̧'a̧, jahuätö o'catoi'önärö jȩtta̧ pä'ö huedinötä jȩpö̧."ja̧'hua̧ta̧'a̧nö̧ o'cajuiyönä hueähuä huȩnȩ ttö chu̧mö̧huä̧ya̧ Moises hueinötä jȩpö̧." ⁹ Ja̧'hua̧nö̧ ja̧'a̧nä̧ ttö̧ja̧mä̧ ä̧ju̧cuo̧co̧tö̧ pi̧nä̧tö̧, Manases suronä jȩtta̧ pä'ö huea'attö, Suronä jȩpi̧nä̧tö̧ ko̧ro̧jä̧ ttö̧ja̧ Tu̧ru̧hua̧ jȩpö̧ i̧cui̧nä̧u̧ pi̧nä̧tö̧ttö̧'i̧nä̧ abonänö Israel ttö̧ja̧ ttä'cattömä. ¹⁰ Ja̧'hua̧nö̧ ja̧'a̧ttö̧ Tu̧ru̧hua̧mä̧ ucuocuinö umuhuäyotö,profetanä, pä'inö: ¹¹ "Ja̧'hua̧ta̧'a̧nö̧ Manasesmä,Juda ahuaruhuä 'cotö ttu̧ru̧hua̧ hueähuä ru̧hua̧mä̧, surojö jȩpä̧ji̧,Amorreos ttö̧ja̧ ja̧u̧ ä'canä kinätö suronä jȩtti̧no̧mȩttö̧'i̧nä̧ abonänö , ja̧'hua̧nö̧ ja̧'a̧nä̧'i̧nä̧ suronä jȩpä̧ji̧ Juda ahuaruhuä 'cotörömä tätähuä'quiyutä aditö tteseta pä'ö hue'äji, ¹² ja̧'hua̧nö̧ ja̧'a̧ttö̧ Israel ttö̧ja̧ Ttu̧ru̧hua̧mä̧, pa̧'a̧nö̧ pä'inö:" Topätucui, Ttömä chi'cächä̧cua̧sä̧ rö̧ä̧nä̧ surojö Jerusalenä'inä Juda ahuaruhuä 'cotörö'inä ya̧tȩ ucututtu surojö huȩnȩ ttucuocua'a ä̧ju̧cu̧ttu̧mä̧, cuä̧ja̧ isäjunämä suronätä rä̧mi̧pä̧cua̧,a̧. ¹³ Ttömä jȩchä̧cua̧sä̧ Jerusalen ötahuiyämä isabänä pa̧ja̧tö̧ Samaria ttö̧ja̧rö̧ jȩchi̧nö̧'a̧nö̧, ja̧'hua̧nö̧ ja̧'a̧nä̧ Acab ojusode'inä ja̧'hua̧nö̧tä̧ jȩchä̧cua̧sä̧; ¹⁴ Ttömä töcö chi̧cuä̧cua̧sä̧ Jerusalen ötahuiyämä ,ya̧tȩ ttö̧ja̧ i̧sa̧ sä̧rä̧bä̧ töcö icuaji'anö,yoyonö töcä̧ya̧ kärächö kä̧nö̧ ju'tojucu'inä dea'acu'inä. Ttömä jarochi'ä̧cua̧sä̧ chiya pä'ö jȩpö̧ chu̧ju̧ni̧nö̧'i̧nä̧ chiyoca'atä ja̧'hua̧nö̧ ja̧'a̧ttö̧ chi̧yi̧pä̧cua̧sä̧ ja'huätörömä ttabo iyotö tu̧mu̧nä̧tä̧. Jahuätörömä suronä̧tä̧ jȩttä̧cuo̧tö̧ ttabo iyotömä suronä jȩtti̧na̧'a̧ttö̧ ttu̧ju̧nä̧rö̧mä̧ o'cajuiyönä̧tä̧ ttö̧nä̧u̧cui̧yä̧cuo̧tö̧. ¹⁵ Jahuätömä suronä jȩpi̧nä̧tö̧ ttö chä'ca jo̧mȩttö̧, ja̧'hua̧ta̧'a̧nö̧ ucutumä chö̧ra̧hua̧ri̧'ö̧nä̧ jȩpi̧nä̧tö̧jä̧, Cuä̧do̧to̧ mi̧nä̧ Egipto rȩjȩttö̧ rättopino̧mȩttö̧ kä̧mä̧do̧ jitä mo̧ro̧ jubö." ¹⁶ Manasesmä ji̧nä̧ isocutä,ttö̧ja̧ recuätörö cuä'ö icuinö huȩnȩ jui'ätörö'inö Jerusalen ötahuiyä o'cajuiyönätä kara'anättö kä̧mä̧dö̧ kara'anä jubö cä'ädö. Pi̧yȩmä̧ jȩa̧ päocö jä̧ji̧ jȩpö̧ suronä jȩpi̧nö̧ Juda sotö i̧sa̧mä̧, Jahuätömä ja̧'hua̧nö̧tä̧ jȩpi̧nä̧tö̧ surojömä Tu̧ru̧hua̧ ä'ca jo̧mȩttö̧. ¹⁷ Ja̧'hua̧ta̧'a̧nö̧ Manases koro o'cajuiyönä suronä jȩi̧nö̧mä̧, ¿huȩyu̧tö̧ rötähuoca'a tä̧ji̧ cuyäru'tänä Juda ahuaruhuä 'cotö hueähuä ruhuotö tti̧mi̧ pä'tänämä? ¹⁸ Manasesmä 'corujuo'ächinö jä̧do̧tö̧ mi̧nä̧ 'corujuttächinöta̧'a̧nö̧tä̧ ja̧'hua̧ta̧'a̧nö̧ 'turu tticuinäcu chutä ojusode u̧mi̧ isaränä. Uza ötahuiyä ji̧na̧'a̧ juȩnȩmä̧. Manases I̧tti̧ Amonmä ja̧u̧ ötahuiyänä ruhuo hue'ö ki̧nö̧. ¹⁹ Ru̧hua̧ Amonmä veintidos a̧'ȩ ku̧nä̧ri̧nö̧ ruhuo hue'ö ö̧jä̧mä̧di̧nö̧ pä̧nä̧mä̧; ja̧u̧mä̧ Jerusalenämä hue'inö todäre a̧'ȩ jo̧mȩnä̧ . Ja̧u̧ ja̧ju̧mä̧ micuinäju Mesulemet pä'ö; jahuäjumä Haruz kittiju ji̧na̧'a̧ Jotba ötahuiyä ttö̧ja̧ isaju. ²⁰ Ja̧u̧mä̧ suronä̧tä̧ hue'inö Tu̧ru̧hua̧ ä'ca jo̧mȩttö̧, jä'o mi̧nä̧ Manases hueinöta'anötä. ²¹ Ru̧hua̧ Amonmä jä'o mi̧nä̧ hueinöta̧'a̧nö̧ hue'inö ja̧'hua̧ta̧'a̧nö̧ Ttö̧ä̧nä̧huö̧tö̧ tätö adicuotörötä jä'o mi̧nä̧ esetinä̧u̧ru̧tä̧, ihue'quiyucu kä̧mä̧dö̧ ucuotö jȩpi̧nö̧ jahuätörötä. ²² Ja̧u̧mä̧ jä̧do̧tö̧ mi̧nä̧ Ttu̧ru̧hua̧ Ttö̧ä̧nä̧hua̧ Diosrömä u̧nu̧chi̧'i̧nö̧, ja̧'hua̧nö̧ ja̧'a̧ttö̧ Tu̧ru̧hua̧ oipomȩnä̧mä̧ 'cho̧cö̧ pi̧nö̧. ²³ Ru̧hua̧ Amon ojusodenä adicuä ttö̧ja̧mä̧ ja̧u̧ abo iyotötä pä'i'inä̧tö̧ ja̧'hua̧nö̧ ja̧'a̧ttö̧ Ru̧hua̧rö̧mä̧ cuä'ö icuinä̧tö̧ chutä ojusode jacuättö. ²⁴ Ja̧'hua̧nö̧ ja̧'a̧nä̧ ttöjamä o'catoi'önärö cuä'ö icuinä̧tö̧ ru̧hua̧ Amon abo iyotö päjätörömä, ja̧'hua̧ta̧'a̧nö̧ jahuätömä ru̧hua̧ i̧tti̧, Josiasrötä ku̧ni̧nä̧tö̧ ru̧hua̧ ö̧ja̧ pä'ö jä'o ö̧jä̧'i̧jö̧ o'come ruhuo huea pä'ömä. ²⁵ Koro ru̧hua̧ Amon jȩi̧nö̧mä̧,¿huȩyu̧tu̧ rötähuoca'a tä̧ji̧ cuyäru'tänä Juda ahuaruhuä 'cotö hueähuä ruhuotö tti̧mi̧ huȩyu̧tu̧ rötähuä'tänämä? ²⁶ Ru̧hua̧ Amon ö'co jahuämä 'turu icuinätö jä'o mi̧nä̧rö̧ 'turu tticuinomȩtä̧ Uza ötahuiyänätä, Josiastä jä'o hue'ö ö̧jä̧'i̧jo̧mȩmä̧ pä̧ro̧cua̧tä̧ hue'ö ki̧nö̧.