¹ Josiamä koromöttö huabochecuänö du'o huo̧nö̧ ruhuinä huea pä'ö ö̧jä̧mä̧di̧nö̧ pä̧nä̧mä̧. Ja̧u̧mä̧ Jerusalenämä hueinö treinta y unö du'o jo̧mȩnä̧, ja̧ju̧ ki̧mi̧mä̧ Jedidá ji̧na̧'a̧. ² Josíasmä adiunätä jȩpi̧nö̧do Ö̧ä̧nä̧hua̧ Dios ä'ca jo̧mȩttö̧mä̧ ja̧u̧mä̧ o'cajuiyönä jä̧dó̧ Davidminä cueächinöta'anö jö̧nä̧ cueächinö, ja̧hua̧nö̧ ja̧'a̧ttö̧ ja̧u̧mä̧ u̧huo̧jua̧'a̧cu̧nä̧'i̧nä̧, ohuöja'acunäinä yoröisotä i̧mi̧cu̧nä̧mä̧ 'quȩi̧cö̧ pinö. ³ Chutä hueinö pänä dieciocho du'onä Josíasmä hueinö chutä u̧mö̧huä̧ya̧rö̧ 'cuäopö huȩnȩ huȩyu̧cuä̧i̧sa̧ Safanrö Azalias ki̧tti̧rö̧, Melusan Idörö, Dios ojusodera'a i̧'chi̧ya̧rö̧ pä'ö pä'inö: ⁴ "Täi sacerdote huotöttö juȩi̧pa̧ Hilcias ö̧jo̧mȩ, ja̧u̧ru̧mä̧ jiähui pärätä ȩma̧ pä'ö Dios ojusodera'a ttö̧ja̧ ttȩpi̧nö̧ ji̧nö̧, apate tta̧huä̧rä̧cuä̧huä̧ ttö̧ja̧rö̧ ttiyinö ji̧nö̧mä̧. ⁵ Jitpmä huei ttiya pä'ö, jahuätömä tti̧mi̧ta pä'ö Dios ojusodettö suro juoächö adicuä ttö̧ja̧rö̧. ⁶ Mitätucui dau odiyä adicuä ttö̧ja̧rö̧'i̧nä̧, adicuättö huo̧juȩcuä̧ ttö̧ja̧rö̧'i̧nä̧, 'ca̧tö̧ adicuä ttö̧ja̧rö̧'i̧nä̧, juhua'a jö̧ta̧'a̧nö̧ ttimita pä'ö dauhuiyä'inä, inähuiyättö 'toröicuähuä'inä Dios ojusode adicuä̧cuä̧ päiönä. ⁷ Ja̧hua̧nö̧ ja̧'a̧nä̧ jahuätörö ttimita pä'ö pärätä iyähui'ajimä huȩyu̧tu̧ ku̧nä̧huä̧mä̧ jäcuepätucuä däje pä'ö jahuätö jȩttö̧mä̧ isopäiönä jö̧tä̧ jȩpä̧tö̧ ja̧'a̧ttö̧. ⁸ Sacerdote huotöttö juȩi̧pa̧ Hilciamä pä'inö Safanrö 'cuäopö huȩnȩ huȩyu̧cuä̧ i̧sa̧rö̧: "Ttömä po̧cui̧pä̧ji̧sä̧ hueähuä huȩnȩ cuyäru'tä Dios ojusodettömä". Ja̧hua̧nö̧ ja̧'a̧ttö̧ jahuätä cuyäru'tämä Safanrö iyinö, jahuä'tänä ucuocuinö. ⁹ Safanmä cuyäru'tä ru̧hua̧rö̧ iyinö ja̧hua̧nö̧ ja̧'a̧ ja̧u̧ru̧ jiäunumä pa̧'a̧nö̧ pä'inö: ucu cumöhuäyotömä pärätä ȩmä̧jä̧ttö̧ Dios ojusodenä ka̧cuä̧jö̧mä̧, ja̧hua̧nö̧ ja̧'a̧ttö̧ iyäjätö adicuä ttöja̧rö̧'i̧nä̧, adicuätö adiunä'cha pä'ö to̧pä̧rö̧ adicuä ttö̧ja̧rö̧i̧nä̧. ¹⁰ Ja̧hua̧nö̧ ja̧'a̧ 'cuäopö huȩyu̧cuä̧i̧sa̧ Safanmä ru̧hua̧rö̧ pä'inö: Sacerdotettö juȩi̧pa̧ Hiliciasmä ttörö iyinö ji'täte cuyäru'tä ja̧hua̧nö̧ ja̧'a̧ttö̧ Safanmä ru̧hua̧ ä'ca jo̧mȩttö̧ jahuä'tänä ucuocuinö. ¹¹ Ru̧hua̧mä̧ huȩyu̧cuä̧ cuyäru'tä ucuocu huȩnȩ ä̧ju̧cuo̧mȩnä̧, ja̧u̧mä̧ chutä ö̧'ca̧tä̧hua̧ta̧ sȩro̧cu̧ icuinö. ¹² Ru̧hua̧mä̧ huinö sacerdote hua̧ Hiliciasrö'inä, Safan i̧tti̧ Ahicamrö'inä, Micaias i̧tti̧ Achorö'inä, 'cuäopö huȩyu̧cuä̧i̧sa̧ Safanrö'inä, chutä u̧mö̧huä̧ya̧ Asaiasröinä pä'inö. ¹³ Tätucui Tu̧ru̧hua̧rö̧ jäcuepätucua ttörö'inä, ötahuiyä ttö̧ja̧rö̧i̧nä̧, o'ca juiyönä Judattö'inä, cuyätu'tä cu̧'o̧cui̧ä̧tu̧cuä̧'tänä ucuocuäji huȩnȩ ötö'cö, Tu̧ru̧hua̧ ö̧ä̧i̧mä̧ juiyo rö̧a̧'a̧, ujutucu ö̧to̧huä̧hua̧ pä'ö rȩdȩcuä̧chä̧ji̧mä̧, tta̧'a̧nö̧ pä'ö u̧ju̧tu̧ tadotö minämä esetocotö pinätö̧ pi'tä cuyäru'tänä ucuocu hu̧nȩmä̧, yorö'isotä jȩpo̧co̧tö̧ pi̧nä̧tö̧ ujuturu äcanä huȩyu̧cuä̧chi̧nö̧'a̧nö̧ jö̧nä̧mä̧. ¹⁴ Ja̧hua̧nö̧ ja̧'a̧ttö̧ sacerdote hua̧ Hilcias'inä, Ahicaminä, Acborinä, Safaninä, Asiasinä, jahuätömä ucuocu'chi̧na̧tö̧ ttä'ca ja̧'a̧cu̧ jiäcuähuä isaju Huldacu, jahuäjumä ki̧nä̧ju̧ jerusalénttömä jareö ötahuiyänä, Huldamä Salum irecuä jina'a ja̧u̧mä̧ ca̧tä̧cuä̧huä̧ti̧ya̧ tta̧huä̧rä̧cuä̧huä̧ i̧sa̧ pinö, Ticva i̧tti̧ ja̧u̧mä̧ Harhas pä'ö mi̧cua̧ ö̧dö̧ ji̧na̧'a̧. ¹⁵ Jahuäjumä ädätinäju jahuätörö: "Israel ttö̧ja̧ ttu̧ru̧hua̧ ttö̧a̧nä̧hua̧ Diosmä pa'anötä pä'ö: jiähui ja̧u̧ uborämä ttörötä pä'ö hueäji," ¹⁶ Tu̧ru̧hua̧ päömä pi̧yȩ ja̧'a̧: tottäcuotö, ttömä täcö a̧u̧cua̧'a̧tä̧ jö̧ o'ca'a hueösä surojö 'cuäopä pä'ö pene'inä ja'anä, ttojarö'inä, o'cajuiyönä cuyäru'tänä pä'ö huene Judá rȩjȩ Ru̧hua̧ ucuocuäjimä. ¹⁷ Däje pä'ö jahuätömä ttörö icuipinätö̧ ja̧hua̧nö̧ ja̧'a̧ttö̧ korotö ttö̧ä̧nä̧huo̧tö̧rö̧tä a̧mȩu̧ juäi ku icu iyinätö. Jahuänö jiyäcu juiyo chö̧rahuä̧ra̧ pä'ötä pä'iäcusä, o'cajuiyönä ucuo teäö jȩttä̧i̧jö̧mä. Ja̧hua̧nö̧ ja̧'a̧ttö̧ poröttö rohuäcuähuä ttö chö̧a̧i̧ redecuächäjimä na̧hui̧pi̧yä̧cua̧'a̧. ¹⁸ Ja̧hua̧nö̧ ja̧'a̧nä̧ Judattö Ru̧hua̧römä, Di hueinäcuttu tu̧ru̧hua̧ jȩö̧'a̧nö̧ jö̧ jäcuepa päömä, pi̧yȩtä̧ ja̧'a̧ ji̧cu̧huä̧huä̧cuä̧mä̧ "Israel ttö̧jä̧ tu̧ru̧hua̧ ttö̧ä̧nä̧hua̧ Diosmä pi̧yȩtä pä'ö cuyärutänä ucuocua'a cuäju̧cui̧nö̧ ji̧nö̧tä̧, ¹⁹ Ucu cuamiso'qui 'cuäoquimä däje pä'ö ucutä usurä i̧sa̧ päcuhuiäjättö cu̧ru̧hua̧ a'ca jomettömä, jiyenö surojö cuäopäcua'a jiähua'a cuäjucuäji pänä pȩnȩi̧nä̧ ja'a̧nä̧ ttö̧jä̧rö̧i̧nä̧ jä̧cua̧'a̧ päömä, jahuätömä jȩpö̧ icuähuotö ja̧'a̧nä̧i̧nä̧ suronä pä'ö icuähuotötä ttöjacuäcuotö pä'ö. Jahuanö ja'amä däje pä'ö cu'catähuäta serocu icu ajahuinöjä ttö chä'ca jo̧mȩttö̧, ttöinä chä̧ju̧cui̧nä̧cu̧jä̧. Pi̧yȩtä̧ ja̧'a̧ tu̧ru̧hua̧ huäjuätö icu jiäumä. ²⁰ Tocu äcuäjä, cuä̧do̧tö̧ mi̧nä̧cu̧ ji̧nä̧yo̧mȩtȩ päcuhuiönä jȩcha̧'a̧mä̧, ja̧hua̧nö̧ ja̧'a̧ ejeunatä jinäyomete 'tu̧ru̧ tti̧cuä̧cua̧jä̧, ja̧hua̧nö̧ ja̧'a̧tö̧ ucutä cuiärenämä tocui'i̧yä̧cuajä pene surojuoächa päöinä, ttö̧ja̧ suro juottächa päöinä huedäcua'amä.