¹ Ja̧u̧nu̧ mo̧ro̧ Ezequias rö̧ä̧nä̧ na̧'a̧chi̧nö̧ corupäio'onötä̧ päi'önä. Ja̧hua̧nö̧ ja̧'a̧ Dios päji huȩnȩ jiäcuähuä'i̧sa̧ Isaias Amoz i̧tti̧ ja̧u̧ru̧ ichö pä'inö: Chu̧ru̧hua̧mä̧ pa'anö pä'ö: Cuoju isode adinänö aditö ku̧ni̧, hua'ö cuicuäcuajä, jahua'a yobo cujó juiyacuaja. ² Ja̧u̧nu̧ o'ca'a Ezequias kärächi'ö redä'cacu i'ä becuächönä jȩpö̧ U̧ru̧hua̧rö̧ jä'epö pä'inö: ³ Chu̧ru̧hua̧ o'ca juiyönä chamisoqui jacuättö ucu cuä'ca jo̧mȩttö̧ adiunä jȩchi̧nö̧ chamöcuädi'önä jȩpi̧ttö̧, juhua'a jö̧ ta̧'a̧nö̧ jȩchi̧nö̧mä̧ adiutä ji̧na̧'a̧ cuä'ca jo̧mȩttö̧mä̧. Ja̧hua̧nö̧ pä'ö kä̧nö̧ Ezequiasmä pä̧i̧cu̧nä̧ huopö ajuähuinö. ⁴ Ja̧hua̧nö̧ ja̧'a̧ Isaias juhuoröttö räocha pä'ö kä'co i̧'cha̧'a̧, U̧ru̧hua̧ Dios i̧huȩnȩ pähuächina'a: ⁵ Ppa̧'ä̧chi̧nö̧ Ezequiasrö pa'anö jiähui, ttö chiäre ötahuiyä tta̧huä̧rä̧cuä̧huä̧ Isarö pa̧'a̧nö̧ pä'ö Chu̧ru̧hua̧ cuä̧do̧tö̧ mi̧nä̧ Ttö̧ä̧nä̧hua̧'i̧nä̧, David minä Ö̧nä̧hua̧ Dios'inä hua̧mä̧: "Ajucuäjisä jacuepäjimä, juhua'a jö̧ ta̧'a̧nö̧ cuiäre isoya mo̧ö̧nä̧ cuajahue'a'inä topäjisä. Ja̧hua̧nö̧ ja̧'a̧ttö̧ aditö chicuäcuojä cumäricheimä. Huäbodäcuä mo̧ro̧ päi'omenä ttö chö̧jo̧dȩra̧'a̧ docuhuächäcuajä. ⁶ Ttötä 15 du'o jo̧mȩnä̧ cu̧jö̧nä̧ jȩchä̧cua̧sä̧, ttötä ppädädäcua̧sä̧ ucuru'inä pi̧yȩ ötahuiyä'inä, Asiria ru̧hua̧ u̧mu̧ttö̧ cu̧ji̧pa̧ pä'ö, ttötä ppädäda pöda'attö ppädädäcua̧sä̧ chu̧mu̧huä̧ya̧ David mi̧nä̧rö̧'i̧nä̧ amöcuädö. ⁷ Ja̧hua̧nö̧ ja̧'a̧ Isaias pä'iönä: Higos isähua aditätucui. Ja̧hua̧nö̧ hueäji ta'anö jȩpö̧ ötahuiyänä tuttepomenä. Ötahuiyä huähuächinöcu. ⁸ Ezequías pä'inö Isaiasrö pä'inö: ¿Ti̧yȩ i̧jȩcuä̧ i̧jȩpä̧cua̧sä̧ jä̧ttö̧ Chu̧ru̧hua̧mä̧ chötahuiyä huahuächipäji chuhuojua pä̧'ö̧'i̧nä̧, huäbodäcuä mo̧ro̧ päi'omenä chutä öjodera'a dodächäcuä'inä jö̧nä̧mä̧? ⁹ Isaias ädätinäcu: Pi̧yȩ ja̧'a̧ chu̧ru̧hua̧ ucuru i̧jȩpä̧cuä̧mä̧, iso päiönä ja̧'a̧ pä'ö cu̧huo̧jua̧ pä'ö, i̧huȩyȩ chu̧tä̧ u̧cuo̧cu̧ päinö ta'anö: ¿A̧'cua̧jä̧ huruyu jö̧nä̧, Dieznö kä̧dö̧ 'chä̧huä̧huo̧mȩ'nä̧cö o̧jȩpä̧cua̧'a̧mä̧? ¹⁰ Ezequias ädätinö: juiyo jeruhuocötä ja̧'a̧ a̧'cua̧juä̧ hu̧aruyu jö̧nä̧ Dieznö kä̧dö̧ 'chä̧cuä̧huo̧mȩ 'chö̧ttö̧'i̧nä̧, ja̧hua̧nö̧ jo̧ca̧'a̧ jö̧ttö̧mä̧ Dieznö tto'ca'acu kä̧dö̧ ppa̧huä̧chä̧cuä̧huo̧mȩ jö̧ttö̧'i̧nä̧. ¹¹ Ja̧hua̧nö̧ ja̧'a̧ Dios päji huȩnȩ jiäcuähuä'i̧sa̧ Isaias huopinö U̧ru̧hua̧ Diosrö, ja̧hua̧nö̧ ja̧'a̧ a̧'cua̧u̧ä̧ huaruyu jö̧nä̧ o'ca'acu ppa̧hua̧chi̧na̧'a̧ Dieznö 'chänö ppa̧huä̧chä̧cuä̧huä̧cä̧ jobö. ¹² Ja̧u̧nu̧ pä̧nä̧ Babilonia ru̧hua̧ Baladan i̧tti̧, Berodac Baladanmä cuyäru isojä'inä, koro mipponä iyähuä'inä hue'inö Ezequiasrö, ja̧u̧mä̧ ä̧ju̧cui̧na̧'a̧ ji̧na̧'a̧ Ezequiasmä rö̧ä̧nä̧ na̧'a̧chö̧ pä'ö. ¹³ Ezequiasmä cuyäru isojä to'omenä rö̧ä̧nä̧ esehuächi'inö ja̧hua̧nö̧ ja̧'a̧ huȩnȩ jiäcuähuä ttö̧ja̧rö̧ o'ca juiyönä ojusodenä ka̧cu̧'i̧nä̧ öäre rö̧ä̧nä̧ micuäu juäi'inä i̧jȩpi̧nö̧: pärätä'inä, oro'inä, koro a̧mȩu̧ juäi'inä, adihuä juäi a̧dȩ isoya'inä, curä rohuäcuähuä päjome'inä, koro o'ca juiyönä hua'adö utäijome'inä i̧jȩpi̧nö̧. Yi̧nȩtȩ'i̧nä̧ ki̧'i̧po̧ca̧'a̧ ji̧na̧'a̧ ojusodettö'inä ruhuo hueäijomettö̧'i̧nä̧ jahuätörö i̧jȩpo̧co̧mȩ jo̧mȩnä̧. ¹⁴ Ja̧u̧nu̧ o'ca'a Dios päji huȩnȩ jiäcuähuä'i̧sa̧ Isaias ru̧hua̧ Ezequiasrö ichö jä'epinö: ¿Tta̧'a̧nö̧ pättättö jähuätö u̧mä̧tö̧mä̧? ¿Törö tti̧chä̧jä̧ttö̧? Ezequias ädätinö: ötahuiyä otottö ichäjätö Babiloniara̧'a̧ttö̧. ¹⁵ Ja̧hua̧nö̧ ja̧'a̧ Isaias jäepinä̧cu̧: ¿Däjetä tottättö cuojö isodettömä? Ezequias ädätinö: Jahuätömä o'ca juiyönä chojusodenä ka̧cu̧ topäjätö. Ji̧yȩtȩ'nä̧ ki̧o̧ca̧'a̧ ja̧'a̧ chöäre rö̧ä̧nä̧ micuäu juäi jahuätörö chi̧jȩpo̧cö̧ jä̧ji̧mä̧. ¹⁶ Ja̧hua̧nö̧ ja̧'a̧ Isaias pä'inö Ezequiasrö: A̧ju̧cui̧ Chu̧ru̧hua̧ Dios i̧huȩnȩ. ¹⁷ Topi, jahuätömä tti̧chä̧cuo̧tö̧ ucuo cuojusodera'a, o'ca juiyönä cuä̧do̧tö̧ mi̧nä̧ hua'adö ttu̧ju̧ni̧nö̧mä̧ jitä pi̧yȩ mo̧ro̧ jöbö ka̧cu̧mä̧ ttȩmi̧pä̧cuo̧tö̧ Babilonia ötahuiyära'a. Ji̧yȩtȩ'i̧nä̧ ki̧'i̧pö̧ juiyönät. Ja̧hua̧nö̧ pä'ö Chu̧ru̧hua̧ Diosmä. ¹⁸ Cui̧tti̧mö̧ uhuäpächinätö̧rö̧'i̧nä̧, ja̧u̧nu̧ o'ca'a ttuhuäppächäcuotörö'inä ttȩmi̧pä̧cuo̧tö̧. Babilonia ru̧hua̧ ojusodenä Eunuco huotötä ttö̧jö̧nä̧ jȩttä̧cuo̧tö̧. ¹⁹ Ja̧hua̧nö̧ ja̧'a̧ Ezequias pä'inö Isaiasrö: Chu̧ru̧hua̧ i̧huȩnȩ ucuocuäjimä adihua'a. Ja̧hua̧nö̧ ja̧'a̧ amöcuädinö: Ja̧hua̧nö̧ jö̧ttö̧mä̧ jitä ttö cha̧'cua̧rä̧i̧mä̧ eseu kä̧cuä̧huä̧'i̧nä̧ huȩnȩ juiyönä kä̧cuä̧huä̧'i̧nä̧ juiyäcua'a tä̧ji̧. ²⁰ Ja̧hua̧nö̧ ja̧'a̧ koro Ezequias jȩi̧nö̧'i̧nä̧ o'ca juiyönä uruhuo ji̧nö̧'i̧nä̧, juhua'a jö̧ ta̧'a̧nö̧ ajiya rȩjȩ jacuänä 'chä̧nö̧ ötahuiyära'a todeunä adittinö ji̧nö̧'i̧nä̧ ¿Cuyäru'tänä huȩyu̧cua̧'a̧mä̧ juiya'a tä̧ji̧ Juda ttö̧ja̧ ruhuotö huettinöta'anömä? ²¹ Ja̧hua̧nö̧ ja̧'a̧ Ezequiasmä hua'ö icuinö jä̧'o̧tö̧ mi̧nä̧cu̧tö̧ ja̧u̧nu̧ o'ca'a i̧tti̧ Manasestä ru̧hua̧ huea pä'ö kä̧mä̧di̧nö̧ jä'o hueäijome.