¹ Kani ulishi impindi yakufyala imbushi sha mumpanga ishaku mabwe? kani ulishi ukupima impindi iyo abakota baponya utwana? ² Kani ulishi ukupenda imyeshi iyo wa kuma nisha? kani ulishi impindi iyo wafyala? ³ Balenama, Nekufyala utwana twabo kabaposa insoni shabo. ⁴ Utwana twabo tulakosa, nekukula apaswetele pampanga, kabwema, nekubulo kubwela. ⁵ Ninani uwaletele imbongolo yamumpanga ikakulukile? Ninani uwaikakulwile imbongolo yamumpanga ifyakukaka, ⁶ Iyo nacitile impanta ati ŋanda yaiyo nempanga yamucele ati pakwikalayo? ⁷ Ilapufya iciyobela icamumushi; Ta yumfwapo neli kubilikisha kwa ba kuyensha. ⁸ Ilafwaisha pamapili icembelelo caiyo, Nekufwa-fwaya mbuto shonse ishamwefu. ⁹ Kani imbowo ingasumina ukukupyungila nekwikala mucipata cobe? ¹⁰ Kani ungaikala imbowo necikonkoli caiyo mumufolwa? ¹¹ Ungapema-mo muli yo pakuti amakosa aiyo akulu? kani ungailekela imilimo yobe? ¹² Ungaicetekela ati ikashita kwenu imbuto shobe, nekushilongela pacibansa? ¹³ Amapinda ampye alabakama, sombi amapapa tiko nema sako aiyo, kani ali nenkumbu? ¹⁴ Pakuti ilasha panshi aasana aiyo, ne kwakawisha mwifukutu. ¹⁵ Nekulubako ati ulukasa lungaasansala neli ati icilwani cinganyantala. ¹⁶ Ilakosesha umutima patwana twaiyo, koti koti tatuli twaiyo; nangaba imilimo yaiyo yalukoso taikwete mwenso, ¹⁷ pantu ba Lesa baliinine amano tabaipele akalango kabili bawa. ¹⁸ Impindi iyo ilisuntula peulu, ilapufya kafwalo neba kwendela-po. ¹⁹ Kani niwebo uwamupele kafwalo amakosa? kani niwebo wamufwikile umwansa usakene pamukoshi wakwe? ²⁰ Kani niwe wamulengeshe ati asotoke koti lushe? ubuleme bwakupukula kwakwe bwakutinisha. ²¹ Alafukawila bu mukolo, nekusangalalila mumakosa akwe; Alaya mukuku mana neba lalume abali nemata. ²² Alapufya umwenso nekubulo kususha neli kufutatila impoko. ²³ Insumbilo ilakolonkanya kuli ye, pamo nefumo isasamukile necitoto. ²⁴ Alamina umushili kubukali ne kupuputwa kabili tekutiacetekele pakulila ulupenga. ²⁵ Pakulukulila ulupenga alalabila ati, kaomfwa ukununka kwankondo ukutali, nekululuma kwafilolo, nengwelele. ²⁶ Kani ulukashi lulapalala kumano obe nekutandabika amapindo alulo mukulosha kusaufu? ²⁷ Kani iŋonga ilaninina kwiulu pakwifu nda webo, Nekucita cinso caiyo apasuntikile. ²⁸ Ilekala pacibwe apo apakwikala paiyo epamukolo wacibwe pantu apakosele. ²⁹ Ukufumako ilaceta ifinani fyaiyo amnso aiyo alafibona ukutali makosa. ³⁰ Utwana twaiyo nato tulonka imilopa; napapo napo apali ififwile epo ili yo