¹ Mwami Leza wakabandika kuli Moses, kwaamba, ² ''Ambila bantu ba Israel kuti, 'Lilya muntu umwi naabihya katayandi walo kuti abihye, wacita cintu cimwi Mwami Leza nzhyaka lailila kuti tazhyicitwa, alimwi kuti naa wacita cintu cimwi icikahyilwe, nceeci iceelele kucitwa. ³ Kuti kali mupaizhyi munanike iwabihya icakubaletela mulandu bantu, nkokuti walo kapa kuci nyonyoono ico ncaacita mucende wa ng'ombe uucili mwana uucinyina akampenda kupa ku Mwami Leza mbuli cituuzhyo ica cinyo nyoono. ⁴ Walo weelele ku muleta uyo mucende wang'ombe ku mulyango wa cihvwuka caku swaanganina kumbele ilya Mwami Leza, abike itanhyi ilyakwe amutwi wa mucende, a kumuyaya kumbele lya Mwami Leza. ⁵ Uyo mupaizhyi munanike ula kabweza bulowa bumwi ubwa mucende a kubutola kwi hvwuka lya ku swaanganina. ⁶ Mupaizhyi ulakatoba munwe wakwe mukati mubulowa alimwi akubusansa bumwi zhyiindi izhyili ciloba kumbele ilya Mwami Leza, kumbele ilya mulembo waku hyitilizhya busena busalalihya. ⁷ Mpoona mupaizhyi ulabika bulowa bumwi a meya aali acipaililo ica tununkilizhyo tubotu twakutenta kumbele lya Mwami Leza, icili mwihvwuka ilya ku swaanganina, alimwi ulaka tila kubupoomona bulowa boonse buhyeele ubwa mucende anhyi ilya cipaililo ca zhyituuzhyo zhya kutenta, icili amulyango wa cihvwuka ca ku swaanganina. ⁸ Ulakatenda kukwihya mahwuta oonse aa mucende wang'ombe iwa cituuzhyo ca zhyinyonyoono; mahwuta aali atala ilya mala aa mukati, oonse mahwuta aa kwatilile kuli zhya mukati, ⁹ insa zhyobile alimwi amahwuta aali mpawo, aa bambene a musana, alimwi a cikanko ca muni, antoomwe ainsa - ulakazhyitenda zhyoonse izhyi. ¹⁰ Walo ulatenda coonse kucikwihya, umbona mbwacitenda kucikwihya ku mucende wa muyasilo wa zhyituulo zhya luumuno. Mpoona mupaizhyi ulakatenta zhyizo izhyi acipaililo ica zhyituuzhyo izhyaku tenta. ¹¹ Lilya isalu lya mucende alimwi a buyani kuhwumbwa buhyaala, amutwi wakwe mucende a inhwumba zhyakwe a bula amahwumba aali mubula, ¹² zhyoonse zhyizo izhya mucende zhyihyeele - mupaizhyi ulazhyibweza izhyi zhyizo zhyoonse kutola aanze ilya nkambe kuya ku busena ubo mboba kandeepela mebo, uko nkobasowela itwe; balo bala kazhyitenta zhyizo izhyo kulya nkukona ankuni. Beelele kuzhyitenta zhyizo izhyo kulya kubusena nkobatilila itwe. ¹³ Kuti naa imbungano yoonse iya Israel yabihya kabatayandi kuti babihye, alimwi imbungano taizhyi kuti bacita cinyonyoono a kucita cimwi ica zhyintu izhyo Mwami Leza nzhya kalailila kuti tazhyi citwa, alimwi naa bakwata mulandu, ¹⁴ kwamana, lyilya cinyonyoono ncobacita noca zhyibwa, nkokuti imbungano yeelele kupa mucende wa ing'ombe uucili mwana kuhvwa kubutanga uwa cituuzhyo ca cinyonyoono alimwi aku muleta kumbele ilya ihvwuka lya ku swaanganina. ¹⁵ Bakando iba mbungano balakabika matanhyi aabo amutwi iwa mucende kumbele ilya Mwami Leza , alimwi mucende ula kayayiwa kumbele lya Mwami Leza. ¹⁶ Mupaizhyi munanike ulakaleta bulowa bumwi ubwa mucende kwihvwuka ilya ku swaanganina, ¹⁷ alimwi mupaizhyi ulatoba munwe wakwe mu bulowa a ku sansaila zhyiindi izhyili ciloba kumbele ilya Mwami Leza, kumbele ilya mulembo wacitilizhyo. ¹⁸ Walo ulakabika bulowa bumwi a meya aali acipaililo icili kumbele ilya Mwami Leza, calo icili mwihvwuka ilya ku swaanganina, alimwi walo ulapoomona kutila bulowa boonse anhyi ilya cipaililo ca zhyituuzhyo izhya kutenta, icili ku mulyango wa cihvwuka ca ku swaanganina, ¹⁹ Walo ulakosola kutenda mahwuta oonse kuhvwa ku mucende alimwi a kwaatenta acipaililo. ²⁰ Ubo mbwayelele kucita ku mucende. Umbona buyo mbwaakacita ku mucende wa cituuzyo ca cinyonyoono, nkokuti umbona mbwaticite akwalo ku mucende uyu, alimwi mupaizhyi ulakwihya zhyi nyonyoono zhya bantu, alimwi balo bala lekelelwa mulandu. ²¹ Ulakabweza mucende kuhvwa anze ilya malabba a kumutenta umbona mbwakatenta mucende waku taanguna. Ici ncituuzhyo ica cinyonyoono ca mbungano. ²² Naa kuti muleli wabihya katayandi walo kuti abihye, kukucita comwi ica zhyintu zhyoonse izhyo Mwami Leza Leza wakwe nzhyakalailila kuti tazhyicitwa, alimwi walo wakwata mulandu, ²³ mpoona cinyonyoono cakwe ncaa kacita ca zhyibwa kuli nguwe, walo weleele kuleta kapongo kabe muyasilo wakwe, kajembwe katakwete kampenda. ²⁴ Walo ulakabika itanhyi ilyakwe a mutwi wa kapongo alimwi ula kayaya mu busena uko nkobayaila cituuzhyo ca kutenta kumbele lya Mwami Leza. Ici ncituuzhyo ca cinyonyoono. ²⁵ Mupaizhyi ulabweza bulowa ubwa cituuzhyo ca cinyonyoono amunwe wakwe a kububika a meya aali acipaililo ica zhyi tuuzhyo zhya kutenta, alimwi walo ulakatila kupoomona bulowa ubwa ncico anhyi ilya cipaililo ca zhyi tuuzhyo zhya kutenta. ²⁶ Walo mupaizhyi ula katenta mahwuta oonse a cipaililo, umbona buyo mbuli mahwuta aaku muyasilo wa zhyi tuuzhyo izhya luumuno. Mupaizhyi ulakakwihya mulandu wa muleli uu kwa tikizhya cinyonyoono icakwe, alimwi muleli ula kalekelelwa mulandu. ²⁷ Kuti naa umwi wa bantu buyo wabihya katayandi kucita cinyonyoono, kukucita cimwi ica zhyintu izhyo Mwami Leza nzhyaka mulailila walo kuti tazhyi citwa, alimwi lilya naalibona mulandu wakwe, ²⁸ kwamana aci nyonyoono cakwe ico ncakacita cazhyibwa kuli nguwe walo, nkokuti ulakaleta ka pongo aka muyasilo wakwe, kapwizhyi akanyina kampenda, ku cinyonyoono ico ncaakacita walo. ²⁹ Walo ulaka bika itanhyi ilyakwe amutwi wa cituulo ca cinyonyoono aku ciyaya cituulo ica cinyonyoono ku busena ubwa zhyituuzhyo izhya kutenta. ³⁰ Mupaizhyi ulakabweza bulowa bumwi amunwe wakwe a kububika a meya aali acipaililo ica zhyituuzhyo zhya kutenta. Walo ulakatila kupoomona bulowa boonse ubuhyeele anhyi ilya cipaililo. ³¹ Walo ulaka katenda kukwihya mahwuta oonse, umbona ubutendwa kukwihya mahwuta a muyasilo wa zhyituuzhyo izhya luumuno. Mupaizhyi ulaka citenta calo acipaililo kuti kube kununkilila kwiinu ukwa Mwami Leza. Uyo mupaizhyi ulaka bweza milandu iya muntu, alimwi uyo muntu ulaka lekelelwa mulandu