¹ Mwami Leza wakakanana kuli Moses, waamba, ² "Oyu ngomulawo waba hicinsenda mubuzuba bwakwe ubwakusalazhyiwa. Uleelele kuletwa kumupaizhyi. ³ Mupaizhyi ulaunka kuhvwa mumahvwuka kuti abone hicincenda kuti naa cinsenda cakapona. ⁴ Mpoona mupaizhyi alailile kuti oyo usalazhyiwa weelele kubweza bobile abapona, bayumi abasalala, ayinkuni zhya kedari, aboza bwa nkandamalowa, alimwi a hyssop. ⁵ Mupaizhyi ulamulailila hicinsenda uusalazhyiwa kuti ayaye umwi muyuni atala ameenzhi aasalala aali munongo. ⁶ Mupaizhyi mpoona uyakubweza muyuni uucipona alimwi ankuni ya kedari, alimwi aboya bwa nkandamalowa alimwi a hyssop, wamana ulazhyitoba zhyintu eezhyi zhyoonse , kusanganya amuyuni uucipona kutoba mu meenzhyi aasalala akwete bulowa bwa muyuni wakayayiwa. ⁷ Ndilyona mupaizhyi asansaile meenzhyi aaya zhyiindi musanu azhyibili kumuntu uyo usalazhyiwa kucinsenda, mpoona mupaizhyi ulamwaambilizhya kuti wasalala. Ndilyona mupaizhyi amulekezhye muyuni uucipona muluwo ⁸ Muntu oyo uusalazhyiwa asanzhye zhyisanizhyakwe , agele amasusu aakwe oonse, alimwi asambe mumeenzhyi, nkokwaamba wasalala.kwamana eezhyi weelele kuboola kumahvwuka, pele ulakkala ansengwe ilyacihvwuka cakwe mazuba aali ciloba. ⁹ Mubuzuba ubwa ciloba muntu ooyo agele masusu aakwe oonse aakumutwe , alimwi agele acilehvwu cakwe alimwi ainkoye. akwihye masusu ngakwete oonse , wamana asanzhye zhyisani zhyakwe akusamba mumeenzhyi, nkokuti wasalala. ¹⁰ Mubuzuba bwa lusele abweze tugutu tobile twambelele tunyina kampenda, kabelele kapwizhyi kamwaka omwe akanyina kampenda, alimwi azhyibeela zhyotatwe mwikumi ilya zhyisuwo zhyabuhu busetele bukandilwe amahuta kuti ube mulumbo wa nseke, alimwi a ngoma yomwe yamahuta. ¹¹ Mupaizhyi uumusalazhya ulamwiimika uyo muntu uusalazhyiwa, kakwete azhyintu eezhyi, kumbele lya Mwami Leza kumulyango wa cihvwuka ca kuswaanganina. ¹² Mupaizhyi abweze kagutu komwe kambelele wamana akatuule kutewa cibe cituuzhyo icamilandu, antoomwe aingoma yamahuta, ulazhyitambika kuti cibe cituuzhyo icakutambika kumbele lya Mwami Leza. ¹³ Weelele kuyaya kagutu kambelele abusena mpobayayila zhyituuzhyo izhyazhyinyonyooono azhyituuzhyo izhyakutenta, mulubuwa ilwa tabanikele, nkaambo cituuzhyo icazhyinyonyoono ncamupaizhyi, umbona mbuli cituuzhyo ica milandu, nkaambo cilasalalihya. ¹⁴ Mupaizhyi ulabweza bumwi ubwabulowa bwa cituuzhyo camilandu akububika kukambele kakutwi kwalulyo kwa muntu uyo uusalazhyiwa, aalicikumo wakwitanhyi ilyakululyo, alimwi akumunwe mukando uwakumweendo wakwe wakululyo. ¹⁵ Mpoona mupaizhyi abweze ingoma ya mahuta akutunta mahuta, mwitanhyi ilyakwe mwini ilya lumwenhyi, ¹⁶ akutoba munwe wakululyo mumahuta aalya aali mwitanhyi ilyalumwenhi,akusansaila mahuta amwi amunwe wakwe zhyiindi ciloba kumbele lya Mwami Leza. ¹⁷ Mupaizhyi abike mahuta oonse ahyeele mwitanhyi lyakwe kukambele kakutwi kwa muntu uuyo ngwasalazhya, amwi mahuta abike kulicikumo watanhyi lyakwe ilyalulyo, alimwi amwi mahuta aabike kumunwe mukando wacituta cakwe calulyo. Mahuta aaya aabike atala ilyabulowa bwacituulo ica milandu. ¹⁸ Mahuta aahyaala mwitanhyi ilya mapaizhyi, ulamunanika muntu uusalazhyiwa mumutwe wakwe, alimwi mupaizhyi nkokwaamba wazhyimaanya milandu yakwe kubuhyu bwa Mwami Leza. ¹⁹ Amana mupaizhyi ulapa cituulo ica cinyonyoono kutewa azhyimaanye milandu iya muntu ngwasalazhya nkaambo kakusohwaala kwakwe, wamana ayaye cituuzhyo icakutenta. ²⁰ Mpoona mupaizhyi ulatuula cituuzhyo ca kutenta alimwi acituulo ca maila acipaililo. Mupaizhyi ulazhyimaanya milandu iya muntu, mpoona ulasalala. ²¹ Nokubaboobo, na muntu kalimucete alimwi takonzhyi kujana zhyituuzhyo eezhyi, inga wabweza kagutu komwe kambelele kakutuula cituulo ca milandu icitambikwa, kukwishya milandu yakwe mwini, alimwi acipaanzhyi comwe mwikumi ilyazhyipaanzhyi izhya cinzuma cabuhu busete ubusangene a mahuta mbuuli cituulo ca nseke, alimwi aingoma ya mahuta, ²² antoomwe ayinzhyiba zhyobile nokuba bana ba nkwilimba bobile, kweelanyika ambwacikonzya kuyana, muyuni omwe ulaba cituulo ica zhyinyonyoono alimwi umwi muyuni ulaba wa cituulo caku tenta. ²³ Mubuzuba ibwalusele uleelele walo azhyilete eezhyi kumupaizhyi kutewa asalazhyiwe, kumulyango wa cihvwuka cakuswaanganina, kumbele ilya Mwami Leza. ²⁴ Mupaizhyi ulabweza kagutu kambelele mbuli cituuzhyo, alimwi abweze antoomwe aingoma ya mahuta aa oliva, wamana ulazhyitambika mbuli cituulo icakutambika kumbele lya Mwami Leza. ²⁵ Mupaizhyi ulayaya kagutu kambelele kabe cituuzhyo ca milandu, wamana ulabweza bumwi ubwabulowa bwa cituulo ca milandu akububika kukambele akakutwi kwakwe kwalulyo uyo muntu uusalazhyiwa, akucikumo cakwitanhyi lyakululyo lyakwe, alimwi akumunwe mukando wakwitende lyakwe lyalulyo. ²⁶ Mpoona mupaizhyi ulatila mahuta amwi mwitanhyi lyakwe mwini ilya lumwenhyi, alimwi asansaile amunwe wakwe walulyo ²⁷ amwi mahuta aali kulumwenhyi zhyiindi ciloba kumbele lya Mwami Leza. ²⁸ Mupaizhyi mpoona ulabika amwi mahuta aali mwitanhyi lyakwe atala aakambele kakutwi kwalulyo lya muntu ngwasalazhya, amwi ulabika atala acikumo wakululyo, alimwi aatala lyamunwe mukando wacituta calulyo, mumasena ngoona ngakabika bulowa bwa cituulo ca milandu. ²⁹ Wamana abike mahuta aahyeele mwitahyi lyakwe aabike amutwe wa muntu ngwasalazhya, kutewa amumwaile milandu kumbele lya Mwami Leza. ³⁰ Weelele kutuula inzhyiba yomwi naa omwi wa bana bankwilimba, kweendalanya amuntu ncaayana - ³¹ yomwi mbuli cituuzhyo cazhyinyonyoono imwi mbuli cituulo cakutenta, antoomwe acituulo ca buhu bwa nseka. Mpoona mupaizhyi ulazhyibinganya milandu ya muntu uusalazhyiwa kumbele lya Mwami Leza. ³² Oyu ngomu;lawo wakusalazhya muntu uukwete cinsenda, wamana tacikonzhya kuleta zhyintu zhyeelela kutuula kukusalazhyiwa kwakwe." ³³ Mwami Leza wakakanana kuli Musa a Aaron, waamba , ³⁴ "Mwahika munyika ya Canaan njindakamupa kuti mwiihvwube, alimwi naa ndabika bulwazhyi bwacinsenda ibuyambukila mung'anda kunyika iyo njomuhvwubile, ³⁵ nkokwaamba uyo mukamwini ing'anda ahvwe aboole amwaambile mupaizhyi. Weelele kwaamba kuti, 'Ndabona kuti kuli cimwi cikozhya cinsenda mung'anda yangu.' ³⁶ Ndilyona mupaizhyi ulalailila kuti bakwihye zhyoonse zhyili mung'anda walo katana kuunka kubona bulwazhyi, kutewa kutabi cintu nociba comwe mung'anda icisohwaala. Kwamana ono mupaizhyi natuunke kubona mung'anda. ³⁷ Mupaizhyi uleelele alangelange kubwaanda bwa ng'anda, alimwi abone naa buboneka nyanzabili nokuba kusubilasubila mutupakopako tuli atala lyabwaanda. ³⁸ Naa ing'anda ikwete bulwazhyi bwacinsenda, walo mupaizhyi ulahvwa mung'anda akwiijala mulyango mane kwamazuba aali ciloba. ³⁹ Mpoona mupaizhyi ulapiluka alimwi amana mazuba aali ciloba kuti alangelange naa bulwazhyi bwacinsenda bwamwaya kubwaanda boonse bwa ng'anda. ⁴⁰ Naakuti bwamwaya bulwazhyi, mupaizhyi alailile kuti bakwihye kubwaanda mabwe aayo bulwazhyi mpobwayanwa akwaasowa kubusena butasalali bwakusowela anze aamunzhyi. ⁴¹ Mukamwini ng'anda ulakayandika kuti ahwalehwale bwaanda boonse mukati, akukwihya bulwazhyi kubwaanda akubusowa bulongo ubo kubusena bwakusowela anze aamunzhyi. ⁴² Kwamana babweze mabwe aambi akwaabika mubakwihya mabwe aatasalali, alimwi babelehye bulongo bupya kuhingulula ing'anda. ⁴³ Naakuti cinsenda caboola alimwi akulwana mung'anda iyakakwihilwe mabwe akwaasowa alimwi abwaanda bwakahwalwahwalwa akuhingululwa kupya, ⁴⁴ nkokuti mupaizhyi weelele kuboola mung'anda akulangalanga kuti naa bulwazhyi bwacinsenda bwamwaya alimwi mukati mung'anda. Naa nkobuli, nkokwaamba ncinsenda cibyaabi,alimwi aing'anda iyo tiisalali pe. ⁴⁵ Ing'anda iyo kaimwayiwa. A mabwe, masomo, alimwi abulongo boonse bwakahingulwizhya nga'nda zhyeelele kusowela anze amunzhyi kubusena butasalali bwakusowela. ⁴⁶ Atala lyakooko, kuhumbwa muntu uunjila mung'anda kuciindi cakujalwa ulasohwaala mane kumangolezhya. ⁴⁷ Kuhwumbwa muntu wakalala mukati mung'anda asanzhye zhyisani zhyakwe, alimwi kuhwumbwa muntu wakalida mukati kang'anda asanzhye zhyisani zhyakwe. ⁴⁸ Naakuti mupaizhyi naanjila mung'anda kwiilangalanga kuti abone naa kuli bulwazhyi ubumwaile nokwakamana kuhingulula abulongo bupya, mpoona, wakayana kuti cinsenda cakamana, uyakwaambilizhya kuti iyo ing'anda yasalala. ⁴⁹ Kwamana bantu kabatana kupiluka mung'anda mupaizhyi weelele kubweza bayuni bobile bakusalazhya ing'anda, abweze ainkuni zhyacisamu ca cedar, acisani icankanda malowa, alimwi a hyssop. ⁵⁰ Ulayaya muyuni omwi atala lyanongo ikweete meenzhyi aasalala bulowa kabuswekela munongo. ⁵¹ Wamana ulabweza inkuni zhya cedar, a hyssop, acisani cankanda malowa, alimwi amuyuni uucipona, wamana azhyitobe zhoonse antoomwe mubulowa ubwamuyuni wayayiwa, mumeenzhyi aali munongo aasalala, wamana asansaile ing'anda zhyiindi zhyili ciloba. ⁵² Ulaisalazhya ing'anda abulowa ibwamuyuni alimwi ameenda aasalala, kubikilizhya amuyuni uupona, ainkuni zhya cedar, a hyssop, alimwi a cisani icankanda malowa. ⁵³ Pele muyuni uucipona amuleke anze aamunzhyi aunke auluke muluwo musokwe. Munzhyila iyi mupaizhyi ulazhyibinganya milandu yamung'anda iiyo, alimwi ilasalala. ⁵⁴ Uyu ngomulawo wa mihyobo yoonse iya cinsenda alimwi azhyintu zhyileta cinsenda, alimwi alubabo, a ⁵⁵ cinsenda ca muzhyisani alimwi a mung'anda, ⁵⁶ acaku zhyimba, acacingwangwa, alimwi acalwaande, ⁵⁷ kugwahilizhya kubona kuti ndelili eezhyi nozhyipa kusohwaala antela nokuli kusalala. Oyu ngomulawo wacinsenda."