¹ Kuti naa muntu umwi wapa muyasilo walo uuli ncituulo ca kutontozhya ica munyama uuhvwa mubutanga bwa ing'ombe, naba musune noiba impwizhyi, weelele kupa munyama uunyina kampenda kumbele lya Mwami Leza. ² Walo ulabika itanhyi iilyakwe amutwi wa cituulo cakwe alimwi aku ciyaya a mulyango wa cihvwuka caku swaanganina. Kwamana bana baka Aaron bapaizhyi bala sansaila bulowa bwa muyasilo muma bahvwu aa cipaililo. ³ Uyo muntu ulakapa muyasilo uwa cituulo ica kutontozhya a mulilo ku Mwami Leza. Mahwuta akwatilila atala naa aswaangene azhya mukati, ⁴ alimwi ainsa zhyobile a mahwuta aali mpawo aa bambene a bukome, acikanko camuni, antoomwe ainsa - walo ulazhyikwihya izhyi zhyoonse. ⁵ Bana baka Aaron balo balaka zhyitenta izhyo alya acipaililo antoomwe a cituuzhyo icakutenta, calo icili ankuni izhyili a mulilo. Ici cilakaba aa kununkilila kwiinu ukwakwe Mwami Leza; cilakaba cituulo cabambwa kuli nguwe amulilo. ⁶ Naa kuti muyasilo wa muntu uyo wa cituulo ca kutontozhya ku Mwami Leza waukwihya mu butanga ubwa ing'ombe; musune noiba impwizhyi, weelele kutuula muyasilo uunyina kampenda. ⁷ Naa kuti wapa imbelele kumuyasilo wakwe, nkokuti inga waipa kumbele lya Mwami Leza. ⁸ Walo ulabika itanhyi lyakwe amutwi wa muyasilo wakwe alimwi a kuciyaya kumbele ilyai hvwuka lyaku swaanganina. Mpoona bana baka Aaron bala sansaila bulowa bwa ncico mumabahvwu aa cipaililo. ⁹ Uyo muntu ulakapa muyasilo waku zhyituulo izhya kutontozhya mbuli cituulo cabambwa aa mulilo kubambila Mwami Leza. Mpoona mahwuta, oonse mahwuta aaku mucila wakosolelwa munhyimunhyi acihwuwa ca moongolola, alimwi a mahwuta aahvwuma mala aamukati alimwi a mahwuta oonse aali munhyi munhyi azhyamukati, ¹⁰ a insa zhyobile alimwi a mahwuta aanzhyi nzhyo, aali munhyi munhyi lya bukome, alimwi acikanko ca muni, antoomwe ainsa - walo ulazhyikwihya izhyi zhyoonse. ¹¹ Kwamana mupaizhyi ula citenta coonse a cipaililo mbuli cituuzhyo ca kutenta ica cakulya ku Mwami Leza. ¹² Naa kuti cituulo ca muntu uyo nka pongo, nkokuti ulakatuula kalo kumbele lya Mwami Leza. ¹³ Weelele kubika itanhyi lyakwe a mutwi wa kapongo alimwi aku kayaya kumbele lya cihvwuka caku swaanganina. Kumane bana baka Aaron balaka sansaila bulowa ubwa nkako kuma bahvwu aacipaililo. ¹⁴ Uyo muntu ula kapa muyasilo wakwe uubambwa a mulilo kubambila Mwami Leza. Walo ulakakwihya mahwuta aahvwumba mala aa mukati, alimwi a mahwuta oonse aali munhyi munhyi aa zhyamukati. ¹⁵ Walo alimwi nguwena ulakakwihya insa zhyobile alimwi a mahwuta aali mpawo, izhyili kubukome, a cikanko ica muni antoomwe ainsa. ¹⁶ Mupaizhyi walo ulazhyitenta zhyoonse izhyi a cipaililo mbuli cituulo cakutenta icacakulya, kuti cipe kununkilila kwiinu. Mahwuta oonse ngaakwe Mwami Leza. ¹⁷ Ici ulakaba mulawo wa bweendelezhyi walyoonse mumazhyalani oonse aa bantu bako mubusena koonse nkobamba munzhyi wako, kutewa webo utalyi mahwuta nabuba bulowa.'''