¹ Ciindi ico Mwami Leza Leza wenu naya kubakosola bantu bamahyi, aabo abali munyika iyo Mwami Leza Leza wenu njakanza kumupa mwebo, alimwi ilyo mwamana kubatanda akuponena muminzhyi yabo a mumaanda aabo, ² amukalisalile minzhyi yotatwe iili akatikati ainyika yenu iyo Mwami Leza Leza wenu njamupa kuti mwiihvwube. ³ Mweelele kubamba inzhyila yakwiinda alimwi akubika minyinza yotatwe yakwaabanya inyika muzhyibeela zhyotatwe, iyo inyika yalo Mwami Leza Leza wenu njamuucitila mwebo kuti mwiikone, kucita kuti naa muntu umwi wayaya muntu kakonzya kutiila nkuko. ⁴ Aaya ngamalailile kukwatikizhya muntu wayaya umwi muntu alimwi akuyubila nkuko kutewa ahwutule buumi bwakwe mwini - uyo wayaya himunzhyi nyina kakuli taalikumusulaika mane kuhyikila kuciindi icantenda iyo yaku muyaya. ⁵ Kupa mukozhyanyo, naa mulombwana waunka musokwe kubwaani ahimunzhyinyina kuyakucaba inkuni, wamana wabelehya keembe kutema cisamu, kwamana lubemba lwakeembe lwakuka kuhvwa kumwiini a kumuyasa himunzhyi nyina alimwi akamuyaya - mpoona uyo muntu weelele kulukanka kutiila kuli umwi wa minzhyi eeyi a kuhwula buumi bwakwe. ⁶ Nkaambo buyo buyo hikulwanina bulowa inga kaya kumutobela uyo hyikuyaya muntu, a kubilila kwa kupya kwakunyema kwakwe kumukwete kwamwiindilila, kuti kahinzo kakali kakando nkamu kangaanya, waman kumweenzhya wamuyasa a kumuyaya, nokuba kuti muntu uyo takeelele kuyayiwa, pesi akaambo kakuti kunyina nakamusulile noliba kaindi hyimunzhyi nyina. ⁷ Nkakaambo kaako ndamulaila kuti kamulisalila minzhyi yotatwe. ⁸ Kuti naa Mwami Leza Leza wenu wamukomenzhyezhya minyinza yenu, umbona mbuli mbwaakahyomezhya kuli bahinhyiku benu kuti ulakacita, alimwi wamupa inyika yoonse njaakahyomezhya kupa bahinhyiku benu; ⁹ kuti naa mwabamba malailile aaya oonse a kwaacita, oonse ngindamupa sunu - malailile aakuyanda Mwami Leza Leza wenu alimwi akweendela munzhyila zhyakwe, nkokuti mweelele kuyungizhya alimwi iimbi minzhyi iyenu yotatwe yakutiila, kuleka yotatwe ilya yakutaanguna. ¹⁰ Kamucita obuya kutewa kuti kakutatiki bulowa bwa muntu uunyina kaambo umo mukati kanyika Mwami Leza Leza wenu njamupa mbuli cikono cenu, kuti mutakakwati mulandu wa ku bulowa. ¹¹ Pele kuti naa muntu umwi ulasulaika himunzhyinyina, wabutulala ku mulindilila, wamana wamubukila wamulwana, akumucisa cilonda icakuti wahwa, alimwi wamana uyu muntu watiila kumunzhyi umwi waminzhyi iyi yakutiila - ¹² nkokuti bakando aba mumunzhyi wakwe beelele kutuma a kumupilula kuhvwa ku munzhyi wakuyubila uko, bamana bamupe kwitanhyi ilyaa hikulwanina bulowa, kutewa a muyaye. ¹³ Liso lyenu litamuhwili luse peepe; anukuti, mweelele kukwihya mulandu waku bulowa kumanininzhya kuhvwa mu Israel kutewa mupone buyo kabotu mwebo. ¹⁴ Mutakwihyi zhyitondezhyo zhyaminyinza iyaa himunzhyinyoko yakabikwa kalekale, umo mucikono cenu ncomuyakukona, munyika iyo Mwami Leza Leza wenu njamupa kuti mwiihvwube. ¹⁵ Akubule kamboni omwe alike uyima kupa kaambo ku muntu kamulandu nouba ulibuti, naa akacinyonyoono nociba comwe, kuhwumbwa kaambo nkalubizhya; kumilomo yaba kamboni bobile, nokuba kumilomo yaba kamboni botatwe, kuhwumbwa kaambo nkokakonzhya kweenda. ¹⁶ Kuti naa kamboni uutasalali waimikila kubukila muntu umwi kumutamikizhya kuti wakacita cintu cibyaabi. ¹⁷ Mpoona bantu aabo boonse bobile, abo abakwete inkazhyanyo yakulwana, beelele kwiima kumbele lya Mwami Leza, akumbele lyabapaizhyi alimwi ababetehyi ababeleka mumazuba aayo. ¹⁸ Babetehyi bakwate kuhvwuntauzhya kusuumene; kubonehyehya, kuti naa kamboni ngwakubeya alimwi waamba twaambo twakubeya kutamikizhya munyina, ¹⁹ ono mbomweelele kumucitila walo, amumucitile umbona mbwakali kulombozhya kucitila munyina; alimwi mulayana kuti muyakukwihya cibyaabi kuhvwa akati kenu. ²⁰ Eelyo aabo abahyaala balakateelela a kuyoowa, alimwi kuhvwa waawo kunyina uuti kacite limbi bubyaabi mbuli boobu akati kenu. ²¹ Meso eenu atakwati luse; buumi bulakalungila buumi, liso ku liso, tanhyi kwi tanhyi, cituta ku cituta.