¹ कुकर्मियन के चलते मत कुढ़ा, कुटिल काम करअ वालन के विषय डाह मत करा! ² काहे कि उ लोग घास के तरे जल्दी से कट जईहन, अउर हरियर घास के तरे मुर्झा जईहन। ³ यहोवा पे भरोसा रखा, अउर भलाई करा; देश में बसल रहा, अउर सच्चाई में मन लगइले रहा। ⁴ यहोवा के अपने सुख क मूल जाना, अउर ओन तोहरे मनोरथन के पूरा करिहन। (मत्ती 6:33) ⁵ अपने रस्ता क चिंता यहोवा पे छोड़ा*; अउर ओनपे भरोसा रखा, ओनही पूरा करिहन। ⁶ अउर ओन तोहार धर्म ज्योति के जईसन,अउर तोहार न्याय के दुपहर के उजियाला के जईसन प्रगट करिहन। ⁷ यहोवा के सामने चुपचाप रहा, अउर धीरज से ओनकर इंतजार करा; ओ मनुष्य के वजह से मत कुढ़ा, जेकर काम सफल होला ,अउर उ बुरा युक्तियन के निकालअला! ⁸ क्रोध से परे रहा, अउर जलजलाहट के छोड़ द! मत कुढ़ा, ओसे खाली बुराई निकली। ⁹ काहे कि कुकर्मी लोग काट डालल जईहन; अउर जे यहोवा क बाट जोहअला, उहअ धरती क अधिकारी होईहन। ¹⁰ थोड़अ दिन के बितअ पे दुष्ट रही ही नाही; अउर तू ओकरे जगह के ध्यान से देखअ पे भी ओके ना पईबअ। ¹¹ लेकिन नम्र लोग धरती क अधिकारी होईयन, अउर बड़ी शांति के वजह से खुशी मनईहन। (मत्ती 5:5) ¹² दुष्ट धर्मी के खिलाफ बुरा युक्ति निकालअला, अउर ओकरे पे दाँत पीसअला, ¹³ लेकिन प्रभु ओकरे पे हँसीहन, काहे कि ओन देखअलन कि ओकर दिन आवअ वाला हव। ¹⁴ दुष्ट लोग तलवार खींचले अउर धनुष बढ़ाए हुए हयन, ताकि दीन, दरिद्र के गिरा देंवअ, अउर सीधा चाल चलअवालन क वध करंअ। ¹⁵ उ सब के तलवारन से उहअ सब क दिल छेदाई, अउर उ सब क धनुष तोड़ल जाई। ¹⁶ धर्मी क थोड़ी स धन दुष्टन के बहुत धन से उत्तम हव। ¹⁷ काहे कि दुष्टन क भुजाएँ तोड़ल जाई; लेकिन यहोवा धर्मियन के सम्भालअलेन। ¹⁸ यहोवा खरे लोगन के उमर क सुधि रखअलन, अउर ओनकर भाग हरदम बनल रही। ¹⁹ विपत्ति के समय, में उ लोग शर्मिंदा न होईहन, अउर अकाल के दिन में उ लोग तृप्त रईहन।" ²⁰ दुष्ट लोग नाश हो जइहन; अउर यहोवा क दुश्मन खेत के सुथरी घास के तरे नाश हो जइहन; उ धुँआ के समान गायब हो जइहन।" ²¹ दुष्ट ऋण लेला, अउर ना चुकावअला, लेकिन धर्मी अनुग्रह करके दान देला; ²² काहे कि जे ओनसे आशीष पावअला उ त धरती क अधिकारी होईहन, लेकिन जे ओनसे श्रापित होला, उ नाश हो जइहन। ²³ मनुष्य क गति यहोवा के ओर से दृढ़ होला*,अउर ओकरे चलन से उ खुश रहअलन। ²⁴ चाहे उ गिरअ तभो पड़ल न रही जाई, काहे कि यहोवा ओनकर हाथ थामे रहअलन। ²⁵ हम लड़कपन से लेके बुढ़ापे तक देखत आल हई; लेकिन न त कभो धर्मी के त्यागल हुअल, अउर न ओकरे वंश के टुकड़े माँगत देखले हई। ²⁶ उ त दिन भर अनुग्रह कर-करके ऋण देलअन, अउर ओनकारे वंश पे आशीष फलत रहअला । ²⁷ बुराई के छोड़ा अउर भलाई करा; अउर तू हमेशा बनल रहबअ ²⁸ काहे कि यहोवा न्याय से प्रीति रखअलन; अउर अपने भक्तन के न छोड़िहन। उ लोग क रक्षा त हमेशा होला, लेकिन दुष्टन क वंश काट डालल जाई। ²⁹ धर्मी लोग धरती क अधिकारी होइहन, अउर ओम्मे हमेशा बसल रइहन। ³⁰ धर्मी अपने मुँह से बुद्धि क बातन के करअला, अउर न्याय के वचन बोलअला। ³¹ ओकरे परमेश्‍वर क नियम ओकरे दिल में बनल रहअला, ओकर पाँव ना फिसलत। ³² दुष्ट धर्मी के ताक में रहअला। अउर ओनके मार डालअ क कोशिश करअला। ³³ यहोवा ओनके ओकरे हाथ में न छोड़िहन, अउर जब ओकर विचार करल जाई तब ओन ओके दोषी न ठहरईहन। ³⁴ यहोवा क बाट जोहत रहा, अउर ओनकरे रस्ता पे बनल रहा, अउर ओन तोहके बढ़ा के धरती क अधिकारी बना देईहन; जब दुष्ट काट डालल जईहन, तब तू देखबअ। ³⁵ हम दुष्ट के बड़ा पराक्रमी अउर अईसन फइलत हुए देखे, जईसे कउनों हरियर पेड़* अपने निज भूमि में फइलला। ³⁶ लेकिन जब केहु उधर से गुजरल त देखलेस कि उ उंहा हव ही नाही; अउर हमहुं ओके खोजे, लेकिन कत्तो ना पाए। ।(भज 37:10) ³⁷ खरा मनुष्य पे दृष्टि करा अउर धर्मी के देखा, काहे कि मेल से रहअवाले आदमी क अन्तफल अच्छा हव ।(यशा 32:17)। ³⁸ लेकिन अपराधी एक संगे नष्ट करल जइहन; दुष्टन क अन्तफल सर्वनाश हव । ³⁹ धर्मियन क मुक्ति यहोवा के ओर से होला; संकट के समय ओन उ सब क दृढ़ गढ़ हयन । ⁴⁰ यहोवा ओनकर सहायाता करके उ सब के बचावअलन; ओन उ लोग के दुष्टन से छोड़ाके ओनकर उद्धार करअलन, ए बदे कि उ सब ओम्मे आपन शरण लेले हयन।