¹ Fii piak k dontl jatuk l k tuok, tie nan sakaana nba baa pial ne-e, k bia tie nan saak nba baa dijaamu yuo ne. ² Daanɔ nba k tun biit mopala kan fit k tienɔ siali, l tie nan nuani nba yuk k gaal k saa ŋaan k k jakint nie. ³ B dia taam nan tangalikae, k dia bonŋ nan gbann, jatuk mun fan buo-u nan lanbann u nyaaɔk ni. ⁴ A laa jiint jat buboit, n nee kaa a monŋ sii tie jatuk nan wunba boia nie. ⁵ Jiint k ŋmakt wunba boia jat buboit ne k wun bann nan u k mɔk yan. ⁶ Fii tun jatuk nan maan, l tie nan a jii juk k cua k pot a mɔnŋ taal nie, a tien a mɔnŋe linba k ŋan. ⁷ Nan wabik taa nba k mɔk panŋ bianŋinba ne, l tie n nie mun k baljok k mɔk nyuat k jiin jatuk po. ⁸ Fii piak k tontl jatuk , l k mɔk nyuati, l tie nan faa saa jii tann k lol k tabin naaluobl nie. ⁹ Jatuk-u tokii k piak yan bali, l tie nan dayibilua nba sii yaa wun nyinn kunkonn u niipaɔnŋ ni nie. ¹⁰ Tuonn saakua nba gaal jatuk u tuonn ni, u tuu baal nan danŋe k tul binba kul be tuonn ne ni. ¹¹ Jatuk-u ŋanm k tun u jat tuona, l tie nan bɔk nba tu sii k ŋmat k di nie. ¹² Wunba tie jatuko sɔ nan wunba duki a ŋua sube ŋaan k k mi sial ne. ¹³ Gbannyak daanɔ k nyi ŋaak ni, k maan u tiin yanbɔlae. U tu maat a yanbɔla be sejok ni ! ¹⁴ Gbannyadaanɔ k fii u duanu ni, u tie nan ganna nba juann yuo kul tanmɔi paak nie . ¹⁵ Gbannyak daanɔ tuu u nuu saaŋmanŋ ni, ŋaan fala n suolɔnan wun jii k kuan u mɔb ni. ¹⁶ Gbannyak daanɔ duki nan ŋuae mɔk yan k cie niib banlole nba tuu jii yanfuon k tul gatu nba mok niimin ne. ¹⁷ Fii kuan a nuu balii nba k la-ani , l tie nan wunba bib k suol bɔk tuba nie. ¹⁸ Waatua nba tuu dia muu, nan talbana k lubin k jelin ne, ¹⁹ Nilɔ-i kpann u lua ŋaan tan yet a n bo k jelima kaa? U tie nan l waatna nie ²⁰ Sanjaaunŋ kaa kunkɔna tu g benne nan daat nba tu kaa k muu n kpien ne. ²¹ Sankuana muu nyiine, k daat muu di muyelu, l tie n nie mun k binba luon kunkɔna te k mɔniɔk be yuo kul. ²² Sanjaanjannɔ maan tie na cicili nie k man k kua bientin ni. ²³ Faak nba saa dɔkin balmɔnii tie nan faa tu taan bobil nan salinpiena bianŋinba nie. ²⁴ Faak daanɔ tu jii momante k dɔkin nanŋ. ²⁵ Yuo nba k u piak k l tie nan l man ne, ŋaan a laa daan u ni, k maaan u pal ni gbie nan bonbilankant nan nanŋ kuae. ²⁶ Wuu lekii dɔkin u nanŋ ŋaan sua kul sii laat u tonu nan bonbil nba k u tuun ne . ²⁷ Wunba gbiil buotuk manŋ ni, wunba bilint tann a wun nyak u lua, l tuu tan ŋmat k nyak ŋuae . ²⁸ Faak daanɔ nan u liebe mɔb nba kan pak palmɔni baat nan boniile.