1 Daan tie lalalua-e, dapaalin kulyib-e; wunba nyuk gaan k mɔk yan. 2 Kpanbal wutuolii duo, l tie man yanbɔl nba tu bie be-e; wunba donn u wutuol biil k tien u mɔnŋ-e . 3 L tie yudante k tul nua nba sou monŋ nan kunkonna, ŋaan binba kul k mɔk dudukt, tu si b monŋ k cab man tutu-e. 4 Waal paak, gbannyuakdanɔ k ko tanmonn; jinjaan yuo, ku luon wun jaan, ŋaan k sial ka nan wun jaan. 5 Nifosaalk palin dudukt tie nyunmin ba sumi-e, ŋaan baanmin daanua bant l buol k lu. 6 Niib bonciann piak k want u lon mo; ŋaan nimɔnɔ, ŋme sa lau? 7 Balmondanɔ sonm u balmoni ninŋe; palmann k tul u waas yuo nba k u ta si ka ! 8 Kpanbal i k l buut paak-e ku nungoltin bant linba kul tie biit. 9 ŋme sa fit k yetaa: n wuulin palaa, n ji ki biiti? 10 Kpeu buolu munle, bikna buolu munle, tie yenn nan liel bonbiile k tul kangbenu. 11 Bik binbenŋ nan u bontitiet-e want nan u taasonma tan siyiien k bia tuak. 12 Tubl nba gbiin, nan nunbinn nba laat, kangbennu-e tien yenn k bia tien liel. 13 A daa luon guan, k a tan si tie nandaanua nutl nunbina, k tan di jiiet k gbuo. 14 Bondalua tu yiien maa l k ŋan! l k ŋan; ŋaan saawa, piak dont u monŋ. 15 Liktana nan laak nyinyila be bonciann; ŋaan ban m mogbana tie bont nba k l daauk cie bont kule. 16 Jiin u liatl, k maan u sonm wa mi wunba-e manbintua, saanm na paak. 17 Faak paanu man k tul nifosaalk-e, k yuo nba baat u mob tu tan gbie nan tan sakna-e. 18 Kpaani paak-e k suolu tu la setu kankan; faan tɔb nan subni. 19 Wunba lin nan sanjaɔnŋ nyint bunbɔli maanme-e; a da puki a monŋ nan wunba ku mob ya. 20 Li tie k nua pol u baa nan u naa mob, u fitl tan sa kpiien bunbonn sunsuukni-e. 21 Faal nba di yianma sien yuo, kan pukin kawa nan yuo nba k l tan sa buont. 22 Adaa ya: n sa jiin but. Ii du Kangbenu ni k nu daa faaba wa. 23 Kangbenu k luon kpe u fuunu munle, k k faak cilu k tie bonŋann ka. 24 Kangbennu-e ŋmaktl nifosaalk taasonma ŋaan nifosaalk safit bann u sanjok. 25 L tie balko k tul nifosaalk nba k mont ka u suolu ni nan yennu, k kan dukin fanuwa ka k tan fit k puon puoni. 26 Kpanbal yendanɔ-e bant tondanm, k daal b tuba nan nunkuoni. 27 Nifosaalk manfuol tie Kangbennu fitl-e; u tu kau k san baal gbanant kul ni-e. 28 Kpanbal lom nan balmɔni-e dia kpanbal, k boia dia u kpanbal kok nan lom. 29 Nipaaonŋ panŋ-e tienm yudant, k nikpela yupiieni mun tiiem baakl. 30 Danŋ fiat tie kpaami-e k tul tondaanua l bia tie n ne-e faat nba kuaa k saat laa.