¹ Fii tie balmɔnpakilɔ ŋaan be namue ŋan k cie fii tie jatuk nba fa faak. ² A nunmi mɔn ŋaan k bannu kaa, l ki ŋani, fii kɔnŋ suklu sie k a kua biit nii. ³ Nisua liisime tuu biilɔ, ŋaan k u ji nyiil kaagbennu. ⁴ Mɔktua laat yuɔsinba k pukie, ŋaan nandaanɔ yaa yuak tuu nyikɔe ⁵ Faɔk siala daanɔ tan saa la tubdatua, k u nba bia fa faɔk kan ban nyanni. ⁶ Niib panm mɔk momant nan nulɔ nba piin, k b kul a bia yɔsi nan u nba k u nii yaa ⁷ Nandaanɔ k mɔk yuɔt u ninjanm buol l paak u kan la yuɔsinba u leki yiab u mɔnŋ paak bianŋin nba, ŋaan sua kii nakiiɔ. ⁸ Paakit a mɔnŋ k tumi linba ka saa fit, kii bia ki tian faa tumi linba ne, k lin tula nyuat ⁹ Wunba fa faak balbubuol saa la tubdatu, u kaan saan yanni. ¹⁰ Li k ŋan k jatit ii be manu ni, k tan boi daabl ii mɔk nuu kpanbal waas paak. ¹¹ Nulɔ nba mɔn k dont wutuol yiami, nulɔi tun biilɔ naan u yaa yudant tie un tanm l poe. ¹² Kpanbal wutuoli duo, l tie nan yanbɔl nba tuu bie nee, ŋaan u palmaasil tie nan malin nba tuu baa muat paak ne. ¹³ Bik nba tie bonliin tie u nba baa faal buot tua k puo nba tie baltuoluk mun tie nan nyunm nba tuu tuot kpe-kpek ne. ¹⁴ Jua sa fit di u nidanm faal nba tie ŋei nan likili waa, ŋaan puo yandaanɔ ŋalin tien ¹⁵ Gbannyakle baat nan kan tun sial , ŋanne saa te k kom n baa. ¹⁶ U nba dia yennu senni ne, u manfool saa fɔkit unba mu ni yet l dian u sie ku kpo. ¹⁷ Unba tul nandaanɔ piini, l tie nan u kent kaagbennu nee bont manŋ ne, u tan saapa tulɔaa. ¹⁸ Ii kpaan a bik, kmaan dindann daa be, ŋaan a daa mant k diaou nan nunmɔnbiuk. ¹⁹ Wutuol tie u daanɔ nantɔɔe, kmaan fii nyinnɔ daal ni yom sie k a tan ŋanm k nyinnɔ taal munle. ²⁰ Gbiintil kpaani, k sak tumiiu, ki tan ŋii tie yandaanɔ wonn po. ²¹ Nifosaalik pal gbie nan lola nba k u suole, ŋaan kaagbennu lome tuun. ²² Nifosaalik mɔnt paakr k u yul tuu gont, talas daanɔ e sɔ nan faak daanɔ. ²³ A jie kaagbennu l baat nan manfuole, fii kua nyiaɔk bun bɔncinm, ninŋ ŋaan yubɔn sial kan baal a ni. ²⁴ Nisiab tuu tun nuu saaŋmanŋ ni ŋaan mɔk gbannyakil nan bin donn mob po. ²⁵ L ŋan k klanbaandaanɔ n la tubdatu, k lin tumi wunba ki mi siaal ne yan, fii ŋmakt wunba mɔk yanm yoo nba ,u saa la bannue. ²⁶ Nulɔ nba tie yukpienn k k tiin fei e , tie u baa yana yana , kuo k biel u naa k nyint ŋaak. ²⁷ N bija , nyikin k daa gbiin timiu, lii tie k l timiiu sa buon a minu ne. ²⁸ Balmɔnii i kaa sianinba k siala daanɔ lol a wun pak k biil suɔ, nitɔnt luon tuonbiit tumue. ²⁹ Flaae guu binba laa niib, k jatit ne mun, lanbanae saa sik b bɔpiat ni .