¹ K Hilam wun nba tie Tiil kpanbaal na tun tuomii Dafid buol k tulɔ kpek taabii nan tanmaala nan kanpita a bin maa ŋaak k tulɔ. ² ŋanne k Dafid ji bann nan kaagbennu e kaanɔ a wui tie Islael tieb kpanbal. K u naan yent saa kpaat k pukin, k maan u niib Islael tieb paak. ³ Dafid nba din be seluusaalenm duo ni na, u din kuan puob k pukin k mal bonjai nan bonpoi k pukin. ⁴ Waas nba k u din maib Seluusaalenm na sanna e na: Samua nan Sobab nan Natan nan Salomon; nan ⁵ Jibhal, Elisua, Ephelth, ⁶ Noga, Nefeg nan Jafia; ⁷ Elisama, Bieliada nan Elifelet. ⁸ Filistin tieb nba din gbat nan b dinn Dafid naan k b tien'ɔ Islael kpanbal na; k b kul ji fill k kpaan'ɔ. Dafid nba gbat nna yuo nba , k u nyii k duo jɔsial paak. ⁹ K Filistin tieb din tan baal Lefaim baaɔk ni k lin kpaan'ɔ. ¹⁰ ŋanne k Dafid boi Yennu k yet a: N saan k lek Filistin tieb na, a saa jiib k tien n nuu ni waa? K kaagbennu yetɔ a: N saa jiib k tien a nuu ni waa. K ¹¹ Dafif nan u jab saan Baal-Pelastim k kɔn nyanib. K u yet a: Yennu tulin panŋ k n kua saal n datai nan nyunmɔnn na.ŋanne tien k b yi lenŋ Baal-Pelastim. ¹² B din nyik b duo ŋaan cial yat, k Dafid tul mɔb a bin juol muu. ¹³ Filistin tieb din ŋanm jen baaɔk na nie, fial bona. ¹⁴ L paak Dafid bia din ŋanm boi Yennu k Yennu jiinɔ a: A daa pikintib nna kaa, ŋaan lint b puolpo dekpina na buol, k yin ciet lieb nunm nan nunm. ¹⁵ Fii tanŋi gbat ful dekpina na po k l naan niibe sonm na, fan jii piknm, k maan min Yennu sii be a tuann, k a kɔn nyann Filistin tieb kunkɔnkɔna na . ¹⁶ K Dafid tun bianŋinba k Yennu wannɔ na, u din bel Filistin tieb na, k nyinib Gabaon k fɔkt nanm k saa baal Gese!. ¹⁷ ŋanne tien k Dafid sann din doo tinŋ kul po; k kaagbennu te k digbanna kul tiinɔ.