¹ Diidi n baa soani n tondo ke wan kua liiga ki hanbi n po Usanu. Laa yogunu ,yin lingi O Diedo yua yeni baa ludi ki cua O diegu nni. yin guu ya tondo yeni baa ya wangi min den kuani leni yi ya handaado, Diidi mani O kpenda na. Li Miali Diedo U paaciamu kuli Daano n yedi yeni. ² ŋme n baa fidi ki yaa ye O cuama daali? ŋme n baa fidi ki sedi O ya doagidi ya yogunu? kelima li baa tie nani ban duadi ti kudi leni ya fantama yeni . Nani mi jiama ciebu yeni. ³ O baa kali ki nanbi halinjifa U maafanu nni ki ñani yi joangidi yeni. O baa hanbi lefi puoli huani ki ñani bipo bi joangidi, nani ban ñandi wula leni halinjifa joangidi maama ,yeni bi go baa fidi ki padi ya pada n tiegi Li Miali Diedo po. ⁴ Lanwani juda leni jelusalema yaaba n baa ya kpendi nni Li Miali Diedo po ya pada n ba yaa mani O po, Nani lan den kpa tie maama hali yogunu puoli po bina nni. ⁵ N baa nagini yi leni li bujiali po n baa jaligi ki taa a lingida leni mi conconma danba tagili, ki taani leni yaaba n polini ki pua mi faama, Lani yaa ba n manbidi bi tuonsoanba kaa pa ba bi ligi leni yaaba n faligidi a kpepuona leni a kpienbila leni yaaba n tiendi bi canba yaala n bia kaa fangi nni, Li Miali Diedo Upaaciamu kuli Daano n yedi yeni. ⁶ Kelima n tie Li Miali Diedo, n kan lebidi ,Lani n teni ke yinba jakobo puolihuani daabodi. ⁷ Hali yi yaajanba yogunu yi yaadi ki ha n ñoabona kaatiendi han bili yaala. Lebidi mani ki guani n kani! N mo baa lebidi ki guani yi kani . Li Miali Diedo U paaciamu kuli Daano n yedi yeni . A ma yi tua : Ti ŋa a lede yo? ki baa lebidi ki guani a kani?. ⁸ Naani O nisaalo baa fidi ki janbi U Tienu? kelima yi janbidi nni ki nan go tua : Ti tien be? ki janbi a? yi dinmo leni yi paabu kani yi janbidi nni. ⁹ Ti solindi hua yi kelima yi janbidi nni yinba Isalele nibuoli kuli. ¹⁰ Lanwani yaa kpendinni mani yi dinmo kuli n halimani diegu nni ke mi jiema n ya ye n diegu nni , Tieni mani yeni ki biigi nni yogunu kuli , ki le n ya kan luodi yi po tanpoli bona , ki teni a sela n jiidi hali ki yabidi ki kandi. Li Miali Diedo Upaciaamu kuli Daano n yedi yeni. ¹¹ N baa bolini yi po ya bonfuoda n biidi yi bonbuli kaala. Bi kan bolini ki tinga bon luonkaala, yi duven tiidi baa luoni boncianla. Li Miali Diedo Upaciaamu kuli Daano n yedi yeni. ¹² I nibuoli kuli baa ya tua ke yi ye leni li pamanli kelima yi diema baa ya tie ya kaanu n hani boncianla, Li Miali Diedo Upaciaamu kuli daano n yedi yeni. ¹³ Yi maadi n po mi mapaama ki nan tua : ti maadi apo lede? Li Miali Diedo n yedi . ¹⁴ Yi yedi: ki ya tuuni U Tienu po tie duolikuomi bebe ,ti den kubi a ñoabona ki go biidi ti pala ti bontienkaala po ,Wani Li Miali Diedo Upaaciamu kuli Daano nintuali, Ama ti baa be lienni?. ¹⁵ Moala ti kpaagi ki sua ke bi japaadanba n ye leni mi yemanma ke li bonla kuli cuoni, ti tuonbiadi danba po, baa bi ya biigi Utienu leni bi tuonbiada , leba kuli ki den tieni ba. ¹⁶ Lanwani yaaba n fangi Li Miali Diedo den maadi leni bi yaba ke Li Miali Diedo cengi ki gbadi ban yedi yaala. Bani yaaba n fangi O ,ki kpiagidi O yeni kuli, O den teni ke bi diani yaaba n bani O ki tuo O bali yela li Tili nni. ¹⁷ Bi baa yaa tie N niba , Li Miali Diedo Upaaciamu kuli Daano n yedi ,Min baa doagidi N paalu ya daali, laa niba kuli baa tua min n ba cele ya niba. N baa gbadi bi po mi niñima nani o nilo n gba mi niñima maama O bijua yua n tuuni O po yeni. ¹⁸ Lani yi baa le ya paadima n ye biniteginkaaba leni bi nibiadiba siiga . yi go baa le ya paadima n ye yaaba n tuuni Utienu po leni yaaba n ki tuuni siiga.