¹ Ama, li pabɔnli biigli ba kaadi ki ŋa yaaba n den ye ti yanyagdi nni. Kpiama, O Diedo den cedi ke Sabuloni yeni Neitali diema dini i fee, Ama, li kan waagi ke O Diedo ba puni ya sanu n ye Jueden kpenpuoli ti kpiagdi, i nilanbuoli yaaba n ye Galile dogu nni ² Ya nibuolu n den cuoni li biigli nni, la mi yenyenma; yaaba n den ye bi tinkpiba bɔnbɔnbiigli nni yeni, baa mi yenyenma. ³ A cedi ke mi diema yabdi, a pugni li pamancianli bi siiga nni. Bi pali mangi a nintuali nani ku jeitaagi yognu yeni, nani bi niba ń yi bɔgdi ti tiafagikaadi yeni. ⁴ Kelima ban den ya tugikpiagli yeni, ya daapandigu n den pɔndi o buapiadi po yeni, a pua ki mudi likuli nani Madiani daali yeni. ⁵ Kelima ban pili ya taacaagu mi janjanma daali kuli, yeni ya tialakaadi n fali mi sɔma nni kuli, li buali ke ban sia lankuli, lan juu ki buodi u mu nni i. ⁶ Kelima bi mali ki biga tipo, bi puni ti ki biga; li bali maama baa ma o buacaba po i; O yeli n baa tie "Ya tundkaa ya teginma n ki pia lie, U Tienu, U Paaciamu kuli Daano, Baa yua ye hali ya yognu kuli, Mi yanduanma Bado." ⁷ O tuonli n baa tie wan pugni o bali, ki go puni ya yanduanma n ki pia gbenma, wani n ba kali Dafiidi balkalkaanu, ki diedi o diema, o ba pugni o diema u paalu, ki kubi ma yeni mi teginma ki kaani ya bujiali n pia ti mɔnkundi, mɔlane yeni ya yognu kuli. O Diedo, u paaciamu kuli daano, ń ba puni yaali, o buacianma nni n yeni. ⁸ O Diedo sɔni o ñɔbonli, ke li tie fuugu, Jakɔbo buolu po, ki jiidi Israyeli diema nni. ⁹ I nibuoli kuli ba ga li laabaali, bá Efrayima yaaba yeni Samari yaaba, yaaba n tieni ti japaaciandi yeni mi kafaama, ki tua, ¹⁰ " I tankuomi guonli baa, ti ba guani ki maa yeni a tankpiedkaana i; bi cua Sikomɔri tiidi, ti ba guani ki ŋuu Sedili tiidi i, li kaanu." ¹¹ Lanya po i, ke O Diedo ba fiini o yibalinba Resini, ki pugni o yibalinba ti jatiadi, ¹² Sili yaaba baa ye puoli po, Filisitini mo ya yaaba nintuali. Bi ba taani ki yaadi bi ñɔna, ki nali Israyeli yaaba. Bá yeni lankuli, O Diedo pabienli da ki sɔngi, o nuu mo dá li tiani, ki ba waani ba fala. ¹³ Bá yeni lankuli, Israyeli yaaba naa ŋua O Diedo yua n pua ba, bi naa go lingi O Diedo, ki pia gbenma Tienu mo. ¹⁴ Lanyapo i ke O Diedo ba jia ki ñani Israyeli diema nni, li yuli yeni li juoli, dayenli i ke o ba jia bu kpakpalbu yeni ku sabigu kuli. ¹⁵ Bi nikpelba yeni bi yudanba n tie li yuli; ke li juoli mo tie o sawalpualo yua ya yeli n ñani mi tofaama po yeni. ¹⁶ Yaaba n gobdi ya nibuolu ne lingi ke ban tulini ba i, yaaba n cedi ke bi gobdi ba mo, ba bodi cain. ¹⁷ Lani n cedi ke O Diedo pali kan mangi ku nipaangu po, o go kan waani niñingbadma a kpienbila po yeni a kpepuona po mo, kelima bikuli tie yenyieda yeni ti tuonbiadi danba i, bikuli yaadi bi ñɔna, ki maadi mi yanluomaama. Yeni lankuli, o pabienli daa li sɔngi, ke o nuu mo li tiani, ki ba waani ba fala i. ¹⁸ Mi biadma co nani u mupienu yeni i; mi juugi ki buodi i konkoni yeni a kongɔba i; mi dini ki buodi li fuasieli mɔno, ke u muñiigu fii ki luoni. ¹⁹ O Diedo, u paaciamu kuli daano pabienli po cedi ke mi diema cuo mupienu, ke bi niba di ki buodi u mu nni. Obakuli mo kan ŋa o kpiilo yeni yanduanma. ²⁰ Bi lingi ki jobdi jienu po, ama, mi koma naa gbeni; bi di mi jiema jienu po, ama, bi nan ki guo. Yuakuli ba ŋmani o buagu nandi i. ²¹ Manase kɔni yeni Efrayima, Efrayima mo kɔni yeni Manase; bani n ba taani ki kɔni yeni Juda diema. Yeni lani kuli, O Diedo pabienli dá ki sɔngi, o nuu mo dá li tiani, ki ba waani ba fala.