¹ Sola yaaba jiagi ti buudiyeni ya yokodi n ki tiegi, ki dangi ya ñɔmaama n ki pia mayuli. ² Bi mundi yaaba tiegi i mɔni, ki di n niba yaaba n tie luora po jodi, kaa puuni ba mɔmɔni bi fenli a kpepuona piama, ki su a kpienbila ń pia yaali! ³ I ji ba tieni ledi i, fala daali, mi yebiadma ń ba ña fagma ya daali ki cua aa? I ba sani ku kua le i, ban todi yi, i ba wuoni i ŋalmani le i? ⁴ Bonli kan sieni, i ba ñuani a kpaada siiga lanyaaka yin yin baa ki duani b kpieba siiga. yeni lankuli ii, O Diedo pabienli daa sɔngi, ke o nuu mo da li tiani, ki bawaani yi fala i. ⁵ sola Asiiri yaaba po, bani yaaba n kubi n pabienli gbadundunli, ya gbiamu n ye bi nui nni yeni wangi n pabienli! ⁶ N sɔni ba ya nibuolu n yabdi mi kafaama, bani yaaba n fiindi n pabienli. N puogi ba ke ban gedi ki fagi ban pia yaali, ki ŋmaa ba ki nunugi ba nani u sanu nni tɔtɔgdi yeni. ⁷ Ama, lani ka tie bi maalma, baa pia lanya yanjagli ka. Bi ya pali nni, bi jagi ke ban pua ki mudi i nibuoli boncianla, ki bolni ba cain. ⁸ Kelima, bi tedi, "Ti tɔtieba yudanba ki tie baditieba ka aa? ⁹ Yaali n tieni Kalino ka go ba tieni Karikemisi ii? Bii, yaali n tieni Hamati yeni ka go ba tieni Aripadi ii? Samaari ki tie nani Damasi yeni ka aa? ¹⁰ N waani ya dogi ya buli yeni bi bonnannana n yabi ki cie Jerusalema yeni Samaari ya buli fala, ¹¹ Nani min tieni Samari yeni o buli maama yeni o buli yia n ki pia mayuli maama yeni, N kan tieni Jerusalema yeni omo ya buli yeni ka aa?" ¹² O Diedo ya sɔni o tuonli Siyɔn juali po yeni Jerusalema dogu nni ki gbeni, N ba waani Asiiri bado, o japaadaano yeni o kafaanunnualima yeni fala. ¹³ Kelima, o yedi, "N gbanmanu po yeni n yanfuoma po i, ke n tieni min sɔni yaali kuli. N pia mi yanfuoma boncianla, n ŋmiagi i nibuoli diema biani boncianla. N fie bi ŋalmani, nani o gbanmandaano yeni, n fiini yaaba n den kaa ti gbandi, ki jiini bi niba, bi kankaani po. ¹⁴ N nuu gedi ki la, ki go sii i nibuoli piama nani ki tediga nni yeni, nani ban yi wodi ban yaadi ki ŋa ya jena yeni, n kɔdi ki tinga nni piama kuli. Baa fidi fiabu bakuli, obakuli ki yaadi ñɔbu ki ba sagi." ¹⁵ Li yali ba fidi selni li yuli yua n kubi li ki kpie kani ii? Kanpinda juga ba tieni ti japaadi, kanpinda yua n kubi ga ki tuuni kani ii? Li tie nani u gbiamu ba fidi ki yugdi yua n kubi u ki tuugi yeni, bii li gbadunduli ba fidi ki yugdi yua kubi li yeni. ¹⁶ Lanya po i, ke N Diedo, O Diedo, u paaciamu kuli daano ba cedi o jakɔndbiama ń dondi, ki tadgi; bi bulcindanba mo ya siiga, u mu ba cuo, ki sia ba. ¹⁷ Israyeli Tienu yenyenma ba kpandi, ki tua mu, wani yua n gagdi ki ŋani yeni ń tua mupienu; O ba sia o konkoni yeni o kongɔba kuli, yin di ki buodi dayenli baba. ¹⁸ O Diedo ba juu o fuali yeni o tikuani yia n pia ti kpiagdi yeni, lan di ti gbannandi yeni i naani kuli ki buodi likuli; li baa tie nani ya yiamo n yiagi ki kuodi yenma yeni i. ¹⁹ Ya tiidi n ba sieni o tiikuanu nni kan ya pia mayuli, bá biga ba fidi ki cɔdi li tiidi kuli. ²⁰ Lanya daali, yaaba n ba sieni Israyeli nni, Jakɔbo diegu nni yaaba, yaaba n sani ki ciadi yeni ji kan ya jie yaaba n kɔni ki paadi ba yeni, ama, bi baa dugi O Diedo, Israyeli Tienu yua n gagdi ki ŋani yeni po i. ²¹ Jakɔbo buolu yaaba n sieni yeni, ba guani U Tienu, ti kpiagdi daano kani i. ²² Kelima bá Israyeli yaaba ya yabi nani i kpentanbiini yeni, bi niba waamu baba n ba sieni, ki guani O Diedo kani. Mi bolinma wani ba tieni, nani ti buudi ń buali ke lan jia maama i. ²³ Kelima, N Diedo, O Diedo, U Paaciamu kuli Daano, cedi ke ban bili, ke ya bolinma ba tieni yeni, cili mi tuonli mi diema nni n yeni. ²⁴ Lanya po i, ke n Diedo, O Diedo, U Paaciamu Kuli Daano yedi ya maama ne, "N buolu yu n ye Siyɔn nni, da jie mani Asiiri yaaba. Bani n pua yi yeni i gbiami, ki yugdi bi gbadundunli ki waani yi, nani Ejipti yaaba ń den tieni yi maama yeni. ²⁵ Da jie mani ba, kelima li kan waagi n pabienli ba kagdi ki gbeni ipo, N ji ba fiini n pabienli bani ya po i, ki bolin ba." ²⁶ Lanwani ii, O Diedo, U Paaciamu Kuli Daano ba mubni li finfinbli, ki pua ki deli ba, nani wan den pua ki paadi Madiani Orebi tangu kani maama yeni. O ba yugdi o gbiamu, ki tandi u mi ñincianma po nani wan den tieni maama Ejipti diema nni yeni. ²⁷ Li daali, o tugikpiagli ba bugdi i buapiadi po, o yonbiianli mo ń ña i tulu nni, I tulu ba gbengi ki cie li yonbipianli. ²⁸ Yibali pundi Ayiyati, ki pendi Migirɔn; o kpaa o jongu Micimasi, ki bili o tiadi. ²⁹ Bi sagni, ki tɔgni ki cuoni ki caa, ki tua, "Ti baan kadi tiyaba Geba i. Rama gbanu ŋɔa i, ke Sawuli Gibeya sani. ³⁰ Galimi bisalo, duoni a nialu, ki buudi! Layica, fangi a yuli! Fini o luodo Anatoti! ³¹ Madimena sani ki ciadi, ke Gebimi yaaba tiini ki lingi mi faabima. ³² Li daali mɔno, o den sedi Nobi dogu nni, o tandi o nuu, ki waani Siyɔn juali, ki mua mi jama, Jerusalema juali n yeni. ³³ Diidi, n Diedo, O Diedo, U Paaciamu kuli Daano pua ki kɔnlikɔnli a bena yeni mi yama; O pedi ki luni ya tiidi n fagi belbeli, yii n kpedi boncianla mo o tudi ki guli yi. ³⁴ O pedi li fuali nni tiiciami ki guli, Liban sediri tiiŋami kuli, O Diedo, U Paaciamu Kuli Daano pedi ikuli ki guli yeni ti kpiadgi.