¹ O Diedo den yedi nni, " Baa ya tanpabli n yabi, ki diani lipo, 'Fie tontoni, fagi tontoni.' ² N den yini kasiedugkaaba lie, ke bi ba yegi yeni nni, ki tieni siedi ke n tieni O Diedo ń puogi nni yaali, bani n tie, salga yidka, Uriya yeni Yeberekiyahu bijua, Sakaari." ³ N den nagni n denpua ke omo tie sawalpualo, ke o punbi, ki mali bonjaga. O Diedo den yedi nni, "Yini ki biga yeli, 'Fie tontoni, fagi tontoni.' ⁴ Kelima, ki sua ke ki biga da ki yaadi ki ba yini, 'N báa' yeni 'N naá,' Asiiri bado ba doli Damasi ŋalmani yeni ban den fagi yaali Samaari kuli." ⁵ O Diedo go den maadi yeni nni,, ⁶ Kelima ya nibuolu ne yie Silowe ñima yaama n puubi dindini yeni, ki nan faadi Resini yeni Ramaliya bijua po yeni, ⁷ lanya po i, ke O Diedo ba cua yeni bipo u kpenciamu ya ñingola, yaama n yabi, ki go pia u paalu, ki ba kandi a kpenjaana ki cua, lani n tie Asiiri bado yeni o kpiagdi kuli. ⁸ O ba fii ki sedi Juda po, hali ki gbie ki yadi, mi ba pundi hali o tulu. O ya tandi o fiabi, i ba gbie a diema, Emanuweli," ⁹ Yinba i nibuoli, fala yeni ti yanyagdi ba kua yi, ya buudi ki fabni mani: Bobni mani i yula bu tɔbu po, bi ba pua ki bolni yi ; Yinba yaaba n ye fagma, bobni mani bu tɔbu po, i ba jie ki luodi. ¹⁰ Jagi mani yin bani yaali, ama, li nan kan baa mayuli, kelima, bobni mani i yanjaga, ama li kan tuo, kelima U Tienu ye yeni ti. ¹¹ O Diedo duoni o paaciamu nuu, ki maani npo, ki kadi ki waani nni, ke min da taa ya nibuolu ne sanu. ¹² Bi naa niba ya yini yaali janbi, ŋan da yini li janbi, ŋan da jie ban jie yaali, ki da cedi jawaandi ń cuo ŋa. ¹³ A baa fangi O Diedo, u paaciamu kuli daano, yua n gagdi ki ŋani i. wani baba i ke i baa jie, i baa puuni wani baba i li fangli. ¹⁴ Wani n ba tua kaangagiŋamu; ama o go ba tua yubɔntanli yeni tantuudkaali Israyeli dielierdi po, ki tua taalu yeni diagu Jerusalema yaaba po. ¹⁵ Bi niba boncianla ba tuudi lanya tanli i, ki baa ki kɔnli kɔnli bi yula, ki baa ku diagu nni kun cuo ba. ¹⁶ Begni, ki ŋanbi ki kubi kasiedi ne bonŋanla, ŋanbi ki wuoni mi bangma ne, ki ti waani n ŋɔdkaaba siiga. ¹⁷ N ba guudi O Diedo yua n wuoni Jakɔbo buolu o nunga; n ba guudi o. ¹⁸ Diidi, mini yeni O Diedo ń puni nni ya bila tie yenmaalma yeni yaalidgu bonli i, Israyeli diema nni. Li O Diedo, ki pia gbenma Tienu yua n ye Siyɔn juali po yapo i. ¹⁹ Bi ba yedi, "Gedi ki bu ti baadi a lingda kani yeni, bi ja baaba kani, yeni yaaba n boe yeni bi tinkpiba kani ti bulgbandi danba kani. Ama li tieni ledi i, ke nibuolu kan ya bu bi Tienu kani ii? Bi ba bu bi tinkpiba kani i, ke ban faabi yaaba , fo oo? ²⁰ Kase ke bi guani yiko yeni mi ñɔmaama kani, ke li tieni kasiedi! Bi ya ki tieni yeni, faabmaba kuli ki ye bi niba po, ki tinga nni ne. ²¹ Bi niba ba puagi boncianla mi diema nni, ti yayagdi yeni mi koma ba cuo ba. Mi koma ya cuo ba, bi ba bieni bi pala, ki soli bi bado, ki yaadi bi nunga, ki nɔnli tanpoli, ki fanbi bi Tienu. ²² Bi ya tibni, ki diidi tinga nni, bi ba sua ke pabɔnli, biigli, yanbani baba i. Bi ba diidi, ki sua ke bi se lanya biigcianli ya diema nni i.