¹ Juda bado Akaasi den tie Yotami bijua, Osiasi yaabiliwan den kaa li bali po ya yognu, Sili (Arami) bado, Resini yeni Israyeli bado, Ramaliya bijua Peka, den bobni bu tɔbu ki ba tuogi Jerusalema, ama bi den ki fidi ki paadi o. ² Bi den togdi Dafidi diegu nni, ke Sili yaaba cua ki kali Efrayima diema nni. Akaasi yeni o niba pali den wadi, ki pua nani ku faa gu ń yi kua li fuali nni ki migi i tiidi maama yeni. ³ Lanwani ii, O Diedo den yedi Esaayi, "ña, fini yeni a bijua, Ceyari Yaciyubi, ki cendi Akaasi ya ñinbuogu n ye u ñinsanu juodma, ban ŋuu ki go ñungi ti kpaldi ya kuanu nni yeni. ⁴ ŋan yedi o, 'Duani a yama, sɔngi a yama, da jie libakuli, da yagni a yama a mudatɔlieda yaa n dá ŋubi Resini yeni, Sili yeni Ramaliya bijua, peka pabienli po. ⁵ Sili, Efrayima yeni Raliya bijua bobni yaali n bia apo, bi yedi, ⁶ "Tin tuogi Juda yeni bu tɔbu, ki waani o fala, ki paadi o niba, tin kɔni ki diedi o ki kaani Taabeeli bijua wan tua bado." ⁷ O Diedo, ti Diedo yedi, "Lanya bonli kan tieni; libakuli kan tieni, ⁸ Kelima, Sili yuli n tie Damasi, ke Damasi mo ya yuli tie Resini. Ne yeni piiluoba n bina mu (65), Efrayima yeli ba bodi, Efrayima buoli kan ya ye. ⁹ Efrayima yuli n tie Samari, Samari mo ya yuli n tie Ramaliya bijua. Yinba Juda yaaba, i dudugdi yaa cie bonŋanla, i kan baa yanŋaali i diema nni."" ¹⁰ O Diedo go den sɔni u tondu Akaasi kani, ki yedi o, ¹¹ "Mia O Diedo a Tienu, wan tieni a po mi maalma; mia wan tieni mi maalma apo tanpoli bii tinga nni ne. ¹² Ama, Akaasi den yedi, "N kan mia libakuli, n go kan bigni O Diedo mo." ¹³ Lanwani ii, Esaayi den jiini ki yedi, "Cengi mani yinba Dafiidi buolu yaaba. Yin den cɔgni bi niba yeni, li dá ki dagdi yi ii?, i go bua yin cɔgi n Tienu mo yo oo? ¹⁴ lanya po i, O Diedo, wani obá ba tieni yinba bi nisaalba po mi maalma: Diidi, ya cikpenga n ki bani ja ba punbi, ki mali bonjaga, ban yini o Emanuweli. ¹⁵ O baa di mi naaŋankpama yeni ti siadi, hali ya yognu ke o ba bandi, ki yie yaali bia, ki gandi yaali n ŋani. ¹⁶ Ki sua ke ki biga da yie yaali n bia ki gandi yaali n ŋani, li ba sua ke ya baditieba n jiendi yi yeni mudi cain, ki pua nufanu. ¹⁷ O Diedo ba jiini apo, a niba po yeni a yaaja puolŋuani po ya dana n bia boncianla, ke i dá ki kpeli ki la, hali Efrayima ń paadi yeni Juda diema ki ban pundi mɔlane; bi maadi Asiiri bado maama i." ¹⁸ Lanya daali, O Diedo ba piebi, ki yini ya sii n ye Ejipti ñinsani juodma po, ki piebi ki yini ya naakpansii n ye Asiiri diema nni. ¹⁹ Bi ba cua, ki kali ti jualɔndi kali kani, ti tangbaadisagma nni, ti tutuudi yeni i yankpaakaani kuli nni. ²⁰ Li daali, O Diedo ba kuo Asiiri bado yeni wan teni i ligi, ki ledi ya pengu Efrati kpenpuoli po yeni i. O ba kuo o yudi, yeni o taakobdi; o ba pidi ki ñani o langbiadi mo. ²¹ Li daali, yuakuli ba wubi naañuayendo yeni yanbidi lie, ²² Li yandi naaŋanma ń baa yabi maama, o baa di mi naaŋankpama, yaaba n sieni mi diema nni kuli baa di minaaŋankpama yeni ti siadi. ²³ Li dana nni, ku daamɔngu tiidi tudli (1.000) ń den see ya kuanu nni, ke u dunga ba pundi ŋanjilfa dibala tudli, bontɔli kan ya ye, ki kandi konkondi yeni kongɔba baba. ²⁴ Bi niba baa kua li kuanu nni ki waali yeni a dabana, kelima, mi diema kuli baa tie konkondi yeni kongɔba baba i. ²⁵ Bi kan go nagni ban den yi ko ya juana po yeni a kuuna, kelima, bi jie ti konkondi yeni a kongɔba; Li kuani ba tua naakpaakaanu, naani ke i pee mo baa caa ki ŋmani.