O bado OSiyasi ń guani ya binli, n den la O Diedo, ke o kaa o badkalkaanu yuu n yabi, ki kpedi boncianla, o liadcianli den ladi ki gbieni li jaandieli. ² Serafenba den yiini o yuli po, serafen yendo kuli den pia fiabi luoba; fiabi lie den pii ki nunga, ke fiabi lie mo pii a taana, ke ya fiabliedi n sieni mo yugi. ³ Bi den kpaandi ki tua biyaba, "O gagdi ki ŋani, o gagdi ki ŋani, O Diedo u paaciamu kuli daano gagdi ki ŋani! Ki tinga kuli gbie yeni o kpiagdi i." ⁴ Li jaandieli tanpuuna den migni, kelima yua n den kpaandi ya nialu po, ke ku diegu gbie yeni ku muñiigu. ⁵ Lanwani ii, n den yedi, "Hain, N bia n yeni! Kelima, n tie yua ya ñɔgbana jɔgni, ki go ye yaaba ya ñɔgbana n jɔgni siiga, kelma, n la O Diedo, u paaciamu kuli daano yeni n nuni!" ⁶ Lanwani ii, serafen yendo den yugi, ki cua n kani, ki kubi li mukuanmɔnli, wan babi yaali li padbinbindli po, yeni u babu. ⁷ O den sii n ñɔbu yeni li kuanmɔnli, ki yedi, "Diidi, line sii a ñɔgbana, a tagli ñani n yeni, a baa a tuonbiadi po sugli n yeni." ⁸ N den gbadi ke O Diedo nialu yedi, " N ba sɔni ŋma i; ŋma ba gedi tipo?" Lanwani ii, n den yedi, "Mini n yeni sɔni mini." ⁹ O Diedo den yedi, "Gedi ki yedi ya nibuolu ne, 'Ya cengi mani, ki nan da gbadi, ya nua mani, ki nan da la.' ¹⁰ Cedi ya niba ne pala ń juagi, ñali bi tuba, ki pii bi nuni. Lanyaaka, bi ba la yeni bi nuni, ki gbadi yeni bi tuba, ki ga, ki bili bonli kuli bi pala nni, ki lebdi bi pala, min paagi ba." ¹¹ Lanwani ii, n den yedi, "O Diedo, yeni hali u laa yogu uu? O den jiini ki yedi, "Hali yeni ban ba pua ki mudi i dociami, yin tua diegbendi, nilo ń ki ye naani, ti diedi ń ba luo bi niba, mi diema ń pua nufanu ya yognu, ¹² Hali yeni O Diedo ń ba gedi yeni li niba hali fagma, mi diema tinga ń kuodi, ki pua nufanu. ¹³ Bá bi nibima bɔgdima piiga ya sieni mi diema nni, bi ba bolini bimo u mu nni; nani ban yi cua ki guli bu tiicianbu bii terebenti tibu, bun guani ki bundi, ki kpeli a benpaana yeni, bimo ba guani ki pudi ya benpaana n gagdi ki ŋani, ki tie bi puolŋuani."