¹ N cedi ke yaaba n den ki miadi nni liba kuli, cua ki mia nni; n cedi ke yaaba n den ki lingi nni la nni. N den yedi, ya nibuolu n den ki kpeli ki taa n yeli, "Mini n yeni! Mini mɔno n yeni! ² Daali kuli, n tiani n nui yaaba n fiindi mi yenyiema po, yaaba n ŋua ya sani n ki ŋani, ki ŋua bi yantiana yeni bi yanjaga ń ŋmagdi ba naanpo yeni. ³ Bi tie ya nibuolu n biendi n pali u yognu kuli, Bi padi a pada ti gɔgridi yeni i kuani nni, ki juugi tulaale yeni li ŋubli i tankuomi po. ⁴ Bi ye a kakula nni, ki dua ti tanlondi nni, bi ŋmani ti duonandi, ki di ti jiejɔgindi, ki go pia bi tiadi nni ya bona n jɔgni. ⁵ Bi yi yedi, ' Fangi a yuli, ki sedi fagma, ki da nagni nni, kelima, N gagdi ki ŋani, ki bua min ŋanbi a.' Lanya bona tie nani i muñii yeni n nintuali, nani ya mu n co yognu kuli yeni. ⁶ Diidi yaali n diani, ki bili n nintuali: N kan ya kaa ki ŋmini suo, N ba tuu ba li panli; ki ŋmiani ba bi tuadibiadi pani, ⁷ kelima bi ya tuonbiadi yeni bi yaajanba ya tuobiadi po," O Diedo n yedi yeni. "N ba tuu ba li panli, kelima ban juu ya ŋubli yeni ya tulaale a juana po yeni ban den fiagidi nni a juabila po. N ba bigni ba bi tonkpela po i, ki pa ba bi pani." ⁸ O Diedo ń yedi ya maama n ne, "Li ya tie ke ku daamɔngu tiidi luanjɔnli pia mi bonñima, bi yi yedi, 'Da biidi li mani, kelima li pia li seli,' Min ba tieni n naacenba po maama n yeni, N kan bolini bi kuli. ⁹ N ba ñani Jakɔbo puolŋuani siiga nni, Juda diema nni, ya buolu n ba diedi n juana. Min gandi yaaba n ba diedi li tinga kuli, n naacenba n baa ye li diema nni. ¹⁰ Caloni ba tua ti yabidi yankpaakaanu, Acihɔri jualɔngu mo ń tua n niba yaaba n lingi nni po, bi yangbenga wuonkaanu. ¹¹ Ama, yinba yaaba n sani ki ŋa O Diedo, yeni, yinba yaaba n sundi n juagagdiŋanli po yeni, yinba yaaba n bobindi mi jiema paabu o bulo Gaadi po, ki puuni o bulo Meni mi daamanma, ki miadi o li ŋanbli yeni. ¹² N paadi ki seni yi ki jugsiega po i, i kuli ba gbaani i duna po, ban kodi yi, kelima, N den yi yi, ke yii, i naa den tuo, n den maadi yeni yi ke yii den cengi. Ama, i den tieni yaali n gundi, n nintuali, ki gandi ya tuada n ki mani npo." ¹³ Ti Diedo, O Diedo ń yedi ya maama n ne, "Diidi mani, n naacenba baa di ki guodi, ke yinba ye yeni mi koma; diidi mani, n naacenba baa ñu bonŋanla, ke yinba ye yeni u ñuñuunu; Diidi, n naacenba baa ye li pamancianli nni, ama, yinba wani ii, i fee n baa pia yi. ¹⁴ Diidi, n naacenba baa yiini li pamanli yani, kelima bi pala mani boncianla, ama, yinba wani, baa buudi, ki fabni, kelima i ye li pabɔnli nni. ¹⁵ I ba kpe, n nigagdikaaba ń ya taagi i yela ki solini, ki tua, 'Ti Diedo, O Diedo ń cediŋan kpe;' ama, N ba puni n naacenba yetɔli. ¹⁶ Yua n jaandi ki tinga po ne, ki mia li seli, i mɔmɔni Tienu kani, o ba baali. Yua n ba poli kuli ki tinga po ne, wan poli i mɔmɔni Tienu ya yeli po, kelima, bi ba sundi kpiama pabɔnli po, kelima li ba legni, ki wuoni n nuni po. ¹⁷ Kelima, diidi, N ba tagi tanpoli paano yeni ki tinpanga; bi kan ji tiadi yaali n den ye kpiama, ki buali lan kua bi yantiana nni. ¹⁸ Ama, yin mangi i pala, ki ya ye yeni li pamancianli, kelima, min ba yuandi, ki tagi yaali ya po. ¹⁹ Jerusalema ba tua npo pamancianli, n niba mo ń tua pamanli npo; kelima, bi ji kan gbadi bubuuli yeni pabiidli yigni u dogu nni. ²⁰ Canpadikuuma ji kan ya ye; ya nikpelo n ba pɔdi, ki kpe, kaa gbadi o yema manu ji kan ya ye. Ya nilo n ba kpe, ki pia bina kobga baba, baa tie nani nipaano n kpe yeni. ya nilo n kpe kaa pundi bina kobga baa tie yubɔndaano, lan yaa ka solindi daano i. ²¹ Bi ba maa a diena ki ya ye li diena niinni, ki ŋuu i tiikuani, ki mua li luana, bii, ki di li luana ñuadi. ²² Bi ji kan maa diena, nitɔba ń cua ki kua li diena nni, bi kan ŋuu, bii, ki buli, nitɔba ń cua ki di li kpaandi ñuadi; kelima, n niba dana baa tie nani i tiidi dana yeni i. N nigagdikaaba baa mangdi bi yema yeni bi nui tuona i. ²³ Bi ji kan ya laadi fala fanma fanma, bi go kan bandi maakuugu. Kelima bi tie O Diedo ń gagdi ki ŋanbi yaaba ya bila i, bani yeni bi puolŋuani kuli. ²⁴ Hali ban ba bobni ki jaandi ki mia nni, n ba liidi ki tuo, hali ke bi dá ye i jaandi nni, n ba tuo bi miabu. ²⁵ Bi ba taani ki ya kpaa o fuasangbanlo yeni ki pabiga, o yangbanlo baa ŋmani ti muadi nani o nua yeni; ama, ti tandi n baa tie o waa jiema. Falaba, bii, bolinmaba ji kan ya ye n juagagdiŋanli kuli po," O Diedo n yedi yeni.