¹ Hain, li ya bi tie ke a dadi ki padi ti talwadi, ki jiidi ki cua i! A juana bi baa padi ki baali a nintuali, nani u mu ń juugi ti muadi maama yeni, ke mi ñima tuadi lɔblɔblɔbi, ke ku walgu do maama yeni, a bi ba cedi a yibalinba ń bandi a yeli. ² A ya bi tiendi ya jawaanciandi bona ke ti ki kpeli ki bandi, a b ba jiidi ki cua, a juana ń migi, ki begibi a nintuali. ³ Hali yognuba, ŋan den yi tiedi yaalidigu bona, ke tii bi tuodi ki bani li po, a den yi jiidi ki cua, a juana ń ya begibi a nintuali. ⁴ Hali yogu, a den bialidi yua n ŋua mi teginma yeni, yeni yaaba n ŋua a sani yeni li pamanli. ⁵ Tin den ŋua ya sani, ke a faabidi ti yognu kuli yeni. Ama, a pali den beni tipo, kelima ti den tieni ti tuonbiadi. ŋan den yi faabidi ti ya sanu po yeni, ti kuli tua nani ya bonli n jɔgni yeni, ti tuona kuli mo tua nani ya tiayiekaadi n jɔgni yeni. ⁶ Bá niyendo ji ki ye ki ba taa a yeli, bu miabu po, yua n ba lebdi o tuada, ki ŋɔdi a yeni i mɔmɔni, kelima, a buli ti a nunga, ki ŋa ti, ke ti puagi ti tuonbiadi sanu nni. ⁷ Ama, O Diedo, ŋan ya bani ke fini n tie ti báa, tinba n tie u yɔgu, ke o tie o tiamaalo, ti kuli tie a nuu tuonli i. ⁸ O Diedo, da cedi a pali ń be ti po, ki kandi, da bii ki tiani ti tuonbiadi po. ⁹ Ama, ŋan diidi tinba a niba kuli yeni mi niñima. ¹⁰ A dogi yii n den gagdi ki ŋani yeni kpandi ki tua fanpienma; Siyɔn tua tinkuonga, Jerusalema pua nufanu. ¹¹ Ti jaandidieli yaali n den gagdi ki ŋani yeni, ki tie ti yaajanba po seli bonli ke bi kpiagdi yeli yeni, bi juu u mu, ki bolni li, yaali n den tie bonmɔnli li niinni kuli dini ki buodi. O Diedo, yeni lankuli, a baa ŋmini, ki kan yedi liba, ki li duoldi ti, ki fiagdi ti hali yeni u laa yognu i.