¹ ŋma n ñani Edomi po, ki kpendi ki laá ti tiamɔndi ne, ŋma n yie ya tiadi n mɔni ki tuudi, ki ñani Bocira po ne? ŋma n golni ti baditiadi, ki cuoni yeni ti jigdi, kelima o dugi o paaciamu po ne? Li tie Mini i, yua n maadi i mɔmɔni, ki go pia ya fidu n ba fidi ki faabi. ² Be n cedi ke a tiayiekaadi mɔni, be nan cedi ke a tiayiekaadi naani ke a tuodi ku daamɔngu, ke mi mɔndi ti yeni ii? ³ N den tuodi ku daamɔngu, u daatuodikaanu, mini n baba i, n niba siiga, oba kuli den ki todi nni. N tuodi ma yeni li pabiencianli, ki ŋmaa bi niba yeni li pabienli, ki ŋmaa ki mimidi ba yeni li pabiencianli. Bi sɔma den wuli, ki yadi npo, ki jɔgni n tiayiekaadi. ⁴ Kelima, N den lingi li pantuuli daali i, ke mi daafaabma mo ya binli pundi. ⁵ N den diidi, ki lindi, ke oba kuli den ki ye, ki ba todi nni. N den buali n pali nni nani niloba ki ye ki ba todi nni ii? Ama Mini ya buagu n den tua n todika, ke n pabiencianli ñii n ciaga. ⁶ N den ŋmaa, ki midi i nilanbuoli, ki cedi ke bi ñuni n pabiencianli, ki guo, ki gaadi, ke N wuli bi sɔma ki tinga po. ⁷ N ba tiadi O Diedo ń tieni ya ŋanmicianli, yeni O Diedo pagdi po. N ba tiadi O Die do ń tieni ya ŋanbli kuli tipo, yeni wan tieni Israyeli buolu po ya ŋanma. O buacianma po, wan waani ti ya niñingbadma, yeni ya ŋalbalga, kelima o teginma ŋantaado yeni tinba po. ⁸ Kelima, o yedi, "Mɔmɔni, bi tie n niba ya bijaba n kan janbi nni." O tua bi Candaano. ⁹ Bi pabɔnli dana nni kuli, li den tie omo ya pabɔnli i, ya maleki n ye o nintuali n den faabi ba. O buacianma yeni o niñingbadma po i, ke o den daa ki faabi ba, ki gobdi ba, ki bugi ba wani obá, hali hali yogu. ¹⁰ Ama, bi den fiini mi yenyiema, ki biidi o foŋanma pali. Lanwani ii, O den kpandi ki tua bi yibali, ki tuogi ba yeni bu tɔbu. ¹¹ O Niba den tiadi Moyiisi po hali ya yognu n den pendi yeni. Bi den tua, "U Tienu ye le i, yua n den cedi ke o yankpaaba yeni o yankuli puodi mi ñincianma, ki doni yeni ye le i? U Tienu yua n den kuani o foŋanma ti siiga nni yeni ye le i? ¹² U Tienu, yua n den duoni Moyiisi nuujienu yeni ti kpiagdi yeni ye le i, yua n den seni, ki piani mi ñima, ki cedi ke o yeli doni hali ya yognu n ki pia gbenma yeni ye le i? ¹³ U Tienu, yua n den gobdi ba mi ñinñuanma nni, ke ti tiini ki kndi i kuli, ke oba kuli ki tuudi, nani yua n tiini mi fanpienma nni yeni ye le i? ¹⁴ Nani ya yandi n ji u jualɔngu nni yeni, O Diedo foŋanma den gedi yeni ba ya kaanu n pia mi fuodima. Lanwani ii, a den gobdi a niba, ke a yeli ń ña yeni li seli yeni ti kpigdi. ¹⁵ O Diedo, fini yua n ye hali tanpojoma, tibni ki diidi tinga po, a kpiagdi diegu yaagu n gagdi ki ŋani yeni. A jama yeni a kpiagdi ye le i? ŋan da muni ti a buacianma yeni a niñingbadma. ¹⁶ Kelima, Fini n tie ti báa, Abrahama wani ki bandi ti, Israyeli mo ki bani ki gagdi ti, Fini O Diedo n tie ti báa. Fini n tie ti daafaabika ya yognu ń tuu ya yognu kuli. ¹⁷ O Diedo, be n cedi ke a ŋa ti ke ti puagi ki tudi a sanu maama ne, ki juagi ti pala, ke tin da fangi a aa? Lebdi ki guani tinba a naacenba po, tinba a buolu yaaba n tie a piama yeni po. ¹⁸ A niba yaaba n den gagdi ki ŋani yeni den diedi a kaangagdiŋamu u yognu waamu baba i, ama, ti yibalinba den pua ki mudi, ki ŋmaa, ki biidi u kaangagdiŋamu. ¹⁹ Ti ji tua nani ŋan ki kpeli ki gobdi yaaba yeni i, nani yaaba n ki kpeli ki taa a yeli yeni i."