¹ N kan ya ŋmini kelima Siyɔn ya po, N kan ya tie suo, kelima Jerusalema po, hali yeni ya yognu ke o teginma ba yendi nani mi yenma yeni, a faabma mo ń ya tie nani ya namaanu n co yeni. ² I nibuoli ba la a teginma, bi baditieba kuli mo ba la a kpiagdi. Bi baa yi ŋa yepanli, O Diedo ń ba yaadi o ñɔbu, ki puni ŋa ya yeli. ³ A go baa tie ti kpiagdi badfegliga, O Diedo nuu nni, ki tie badyufinfincabli, i Diedo nuu nni ⁴ Bi kan ji yini a "ban ñɔli ki ŋa yua"; bi kan go yini a tinga mo "diegbenbuoli". Ama, bi baa yi ŋa "N pali ń mani yua ya po", ki yi a tinga mo "O pocaano", kelima O Diedo ba kuani o palimanli boncianla, a niinni, O ba kuani a tinga mo, kan baa o jamɔno. ⁵ Nani o jawaalo ń yi kuani li powandiali yeni, lanwani ii, a bijaba mo ba tua npo bi ciaba, bii, nani o pocaano calo ń bua o pocaano maama yeni, i Tienu mo ya pali baa mani apo yeni i. ⁶ Fini Jerusalema, N sieni bi doguudiba a dogu bilinguona po; bi kan ya kaa ki ŋmini suo u yensiinu yeni ku ñiagu kuli. Yinba yaaba n guani ki tiadi O Diedo po, ya kubi mani ke li paa, fuodma ki ye ipo! ⁷ Imo ń da puni o fuoma hali yeni ya yognu ke o ba guani ki fiini Jerusalema, ki cedi wan tua ti pagdi bonli ki tinga nni. ⁸ O Diedo den duoni o nujienu, ki poli yeni u paaciamu, ki yedi, "N kan ji taa a kpanu bima ki teni a yibalinba ban di li jiema. Bi nilanba bijaba mo kan ji ñu a daapanma, ŋan sɔni ki baa yaama. ⁹ Ama, yaaba n taani ku kpaangu ba di li jiema, ki dondi, ki kpiagi O Diedo yeli, yaaba n tuodi mi daama mo ba ñu ma n kaangagdiŋamu luolu nni." ¹⁰ Ña mani, ña mani, ŋanbi mani u sanu bi niba po! Naadi mani, sondi mani li sanjali! Ñani mani a tana! Duoni mani li tuudicabli bi niba po! ¹¹ Diidi, O Diedo ń cedi ke i tinkuni kuli gbadi ya maama n ne, "Yedi mani Siyɔn dogu nni yaaba: Diidi mani, I Candaano n kpendi yeni! Diidi, o pani yegi yeni o, ke o tuonli ñuadi mo ye o liiga." ¹² Bi baa yi ŋa, "Ya niba n gagdi ki ŋani; O Diedo ń daa ki faabi yaaba." Ki go yini a, "Ban lingi yua, ban ki ñɔli ki ŋa ya dogu."