¹ Ti Diedo O Diedo fuoma ye yeni nni, kelima, O Diedo gandi nni, ki gagdi ki ŋanbi nni, ke min ya kpaandi ki wangi bi niñinniba o laabaalŋamo. O sɔni nni ke min baagi ki paagi yaaba n ye li pabɔnli nni, ki waani i yonbi ke bi baa mi faabma, ki go waani a kpaada mo, ke bi luodi ba, ke bi baa mi faabma. ² O sɔni nni ke min kpaandi ki waani, ke O Diedo ŋanbli binli cua, ti Tienu pantuuli daali, ke wan baagi yaaba n ye li pabɔnli nni kuli. ³ O sɔni nni ke min teni yaaba n ye li pabɔnli nni, Siyɔn nni, ti kpiagdi, lan lebdi mi fantanpienma kaanu, ki teni ba li pamanli kpama, lan lebdi i kumoe kaanu, ti kpiagdi liadijali, lan ga li pabiidli kaanu, ke ban ya yi ba ti kpiagdi tiiciandi, O Diedo ń ŋuu ya tiidi siiga, yii n ba dɔgdi o kpiagdi. ⁴ Bi ba gani ki maa a diegbenkpela po; bi ba guani ki maa ki fiini ban den mudi ya diema, ki kuani ma u nufanu, bi ba guani ki fiini ya dogi n den mudi, ban kuani ya dogi u nufanu nni, yii n den bodi hali yogu yeni. ⁵ Bi canba ba ña i kaani kuli, ki cua ki ya tie i yankpaaba, ke bi canba bijaba tuuni i kuani yeni i daamɔngu tiidi kuani nni, ki tie i kuanguudiba. ⁶ Bi baa yi yi O Diedo salga yidikaaba; bi baa yi yi ti Tienu naacenba. I ba diedi i nilanbuoli ŋalmani, ki ya kpiagdi i yula yeni bi ya kpiagdi. ⁷ I ba baa ya kpiagdi n yabi, tin lebdi i fee; Bi den fiagi yi, ama, mɔla wani ii, i ba baa ya pamanli n yabi, yin baa yaali ya po. Lanwani ii, i ba diedi mi tinfanma bi diema nni, ki diadi i diema, i ba baa ya pamancianli n ki pia gbenma. ⁸ Kelima, Mini, O Diedo, N bua ti mɔnkundi, ki nani bu subu, li jamuali yeni mi biadma. N ba ŋmiani ba bi panli lan buali maama, ki go loli yeni n niba ya ŋantaado n ki pia miidma hali ya yognu kuli. ⁹ Bi puolŋuani yeli ba kpedi i nilanbuoli siiga, bi bila mo ya yela ń ña i nibuoli siiga. Yaaba n la ba kuli ba bandi ke bi tie O Diedo ń selgi ya nibuolu. ¹⁰ N ba mangi n pali boncianla O Diedo po; N pali ba mangi n Tienu po hali lan kandi. Kelima i lani nni mi faabma tiayiekaadi, o lani nni mi teginma liadfagdili, nani ya pocaano calo n bobi nani salga yidkaciamo yeni, bii nani ya pocaano n bobi ki sigdi o yuli yeni i badlaani yeni. ¹¹ Nani ki tinga ń yi cedi ti tiipuudi ń puuni maama yeni, bii nani ku gɔgdigu ń yi cedi ku tibii ń pudi maama yeni, Lanwani ii, O Diedo, U Tienu ba cedi mi teginma yeni ti pagdi ń pudi yeni i, i nilanbuoli nintuali.