¹ Fii ki sedi; ki tua yenma, kelima a yenma n cua, ke O Diedo kpiagdi dɔgdi apo. ² Ba li biigli ya libni ki bɔndi ki tinga, ke li biigcianli libni ki bɔndi i nibuoli kuli; ama, O Diedo ba fii fini ya po, o kpiagdi mo ba dɔgdi fini ya po. ³ I nibuoli kuli ba cua a yenma nni, bi baditieba mo ba cua a yenyenma yaama n yieni boncianla yeni nni. ⁴ Yaadi a nuni ki diidi a kaalindma. Bi kuli taani ki kpendi a kani. A bijaba ñani hali fagma ki kpendi a kani, bi bugi a bisiaba ki kpendi a kani. ⁵ A ba la lanya bonli lan mangi a pali boncianla, a pali baa pua boncianla kelima li pamancianli po, kelima, mi ñincianma ŋalmani ba cua boncianla ki wuli a diema nni, i nilanbuoli diema mo ya piama ń cua ki dogni a kani. ⁶ A yuoyuogola ba cua ki gbie a dogu nni, Madiani yuoyuodi, yeni Efa yaadi; li yuoyuodi kuli ba ña Ceba, ki ya tugi wula yeni tulaale yeni li ŋubŋanli, bi baa kpiagdi, ki dondi O Diedo yeli. ⁷ Kedaari yankuli kuli ba taani ki cua a kani, Nebayoti patona ba cua, a pada po; li patona ba tua ya paabu n ŋani a padjuukaana po, n padbinbindli po; N kpiagdi ba dɔgdi, ki yendi n diegu nni. ⁸ Bile n yugi nani ti talwalgbandi yeni, nani ya kpaajiemu n yugi ki caa bi tiadi nni yeni ii? ⁹ A kpendega po yaaba kpendi n kani na, yeni ya ñinbiaciandi n tugi i bijaba yaaba n ñani hali fagma, ki kpendi yeni bi wula, yeni bi ŋanjilfa, O Diedo, i Tienu yeli po, Israyeli Tienu yua n gagdi ki ŋani ya yeli po, kelima, wani n puni a lanya seli yeni li kpiagdi. ¹⁰ Bi canba yeni bi bijaba n ba guani ki maa a dogu bilinguona, bi baditieba mo n baa tuuni ipo; kelima, N pabiencianli nni, N den pua ki mudi yi, ama mɔla wani ii, N ŋanbli nni, N gbadi apo mi niñima. ¹¹ A bulñɔna mo baa yaa yognu kuli i, i kan luoni ŋa yensiinu ki buali ñiagu, ki cedi bi nilanba diema ŋalmani ń kua i dogu nni, yeni bi baditieba yeni yaaba n ŋua ba kuli. ¹² Kelima, ya nibuoli yeni ya diema n kan sɔni apo, ba bodi; li nibuoli ba bodi cain. ¹³ Liban kpiagdi ba cua a kani, Sipri tiidi, Penni tiidi yeni buyisi tiidi ba taani, ki ŋanbi, ki yendi N kaangagdiŋamu, N ba pugni n taaŋmaakaanu ti kpiagdi. ¹⁴ Yaaba n waani a bijaba fala ba cua ki gbaani a taana kani, ki pugi a; Bi ba yini a O Diedo dogu, Israyeli Tienu, yua n gagdi ki ŋani ya Siyɔn. ¹⁵ Bi ji kan yini a ban ñɔli ki ŋa yua, ban nani yua, bii nilo ń ki pɔndi naani ka, N ba cedi ŋan tua li seli bonli ya yognu ń tuu ya yognu kuli, ki tua pamancianli bonli nifiima ń tuu nifiima. ¹⁶ A go ba ŋadi i nibuoli biima, a ba di bi baditieba piama. Lani i, ke a ba bandi ke Mini n tie O Diedo, a candaano yeni a daafaabika, Jakɔbo Tienu, U Paaciamu Daano. ¹⁷ N ba cua yeni wula, ki lebdi ti kumɔndi, ki cua yeni ŋanjilfa, ki lebdi ti kudi; ki cua yeni ti kumɔndi, ki lebdi ti daadi, ki cua yeni ti kudi ki lebdi a tana. N ba kaani mi yanduanma, man ya kubi a, ki cedi mi teginma ń ya gobdi a. ¹⁸ A ji kan gbadi jadi, bii janjanma maama a diema nni, bii bolinma, lanyaaka, nufanu maama, a tinga nni; ama, a ba yini a bilinguona mi faabma, ki yini a bulñɔna mi ti pagdi. ¹⁹ U yienu ka baa tie a yenma u yensiinu,o ŋmaalo mo ka baa yendi a ku ñiagu; ama, O Diedo n baa tie ya yenyenma n kan gbindi hali bada, ke a Tienu mo tie a kpiagdi. ²⁰ A yienu ji kan baa, a ŋmaalo mo ji kan kua; kelima, O Diedo n baa tie ya yenma n yendi a yognu kuli, lanya yognu, i kumoe ba gbeni. ²¹ A niba kuli baa tie niteginkaaba baba i; bi ba kali ki diedi mi diema hali yognu kuli, Li tie min ŋuu ya tibu benkpeli i, n nui ń tagi yaaali, ki dɔgdi n kpiagdi. ²² Bi siiga nni, yua n waa ki cie, ba tua niba tudli, yua mo n tadi, ki ñidi ki cie ba tua ya nibuolu n pia u paalu; Mini O Diedo n ba cedi li bonli ń cua tonma, li yognu ya pundi.