¹ Diidi, O Diedo nuu naa k̵ɔbi ki kandi ka, ki kan fidi ki faabi; o tubli mo naa kpaa ki kandi ka, ki kan fidi ki gbadi. ² Ama, i tagli n den tieni mi paadma, yinba yeni i Tienu siiga, i tuonbiadi n cedi ke o buli yi o nunga, kaa bua wan cengi yi mo. ³ Kelima i nuupangu nni jɔgni kelima mi sɔma po, ke i nubila mo tiendi ti tuonbiadi. I ñɔgbana pua mi tofaama, ke i lanbu mo bulni bulni mi maabiadma. ⁴ Oba kuli ki fu yeni o lielo yeni ti mɔnkundi, oba mo ki kua ti buudi nni yeni mi teginma. Bi dugi fanma fanma maayuodi po i, ki pua mi tofaama yaali n ki pia mayuli po; bi punbi tugtongu, ki mali tuonbiadi. ⁵ Bi wugni a waalabjena, ki lugi kpaldindia gaali. Yua n ŋmani li jena, o ba kpe i, jenli ya mudi mo, diwuuli n ba ña. ⁶ Bi caba kan fidi ki ŋali tiayiekaagu, bi kan fidi ki lugi ki pini bi gbanu. Bi tuona mo tie tuonbiadi baba i, jadi ya tuada baba n, gbie bi nui nni. ⁷ Bi taana tiini k caa mi biadma po i, bi tiini ki bua wuli yaaba n ki pia tagliba kuli ya sɔma i. Bi yantiana tie tuonbiadi ya yantiana i; u nufanu yeni mi bolinma baba n ye bi sani nni. ⁸ Bi naa bani yanduanma sanu, bi sanu nni mo ki pia mɔnkundi. Bi bili bi yula po sangolma i; yua n tɔgni lanya sanu kuli ki bani yanduanma ⁹ Lanya po i, ke ti mɔnkundi fagi yeni ti boncianla, ke mi teginma mo dá ki pundi ti kani. Ti den guu mi yenma i, ki sua bɔnbɔnbiigli;ti lingi yaali n yieni boncianla, ama ti nan cuoni biigli nni i. ¹⁰ Ti tulbi ki balgi li bilinguoli nani juama yeni i, nani yaaba n ki pia nuni yeni. Ti cuoni ki tuudi u yensiinu nani ti ye dajubɔngu yeni; bayeni tin pia laafia kuli, ti tie nani tinkpiba yeni i. ¹¹ Ti kuli duni nani ki fuayanbiadga ursi, ki bulni bulni yognu kuli nani mu kpajiemu yeni; Ti bo daani ti mɔnkundi i, ti naa baa pu; ki daani mi faabma, ama mi nan fagi yeni ti. ¹² Kelima, ti biadma yabi a nintuali, ti tuonbiadi mo n nuani ti; kelima ti biadma taabi ti, ke ti go bani ti tuonbiadi mo. ¹³ Ti den fiini mi yenyiema, ki fagdi yeni O Diedo, ki yie ke ti kan ŋɔdi ti Tienu. Ti maadi ya maabiadma n nua mi yenyiema yeni ku tugtongu po, ki pua mi tofaama, ki bulni ti pala nni yaali n bia. ¹⁴ N cedi ke ti mɔnkundi sani ki fagdi yeni yi, ke mi teginma mo jɔndi yeni yi; kelima, i mɔmɔni den tuudi ki baa ki daaga nni i, ke ti mɔnkundi mo kan fidi ki nagni yi. ¹⁵ Ti dudugdi sani ki yaadi, yua mo n sani ki ŋa mi biadma, ban janbi o, ki fagi o. O Diedo diidi ki sua ke li gundi yeni mɔnkundi ń ki ye bá waamu yeni po. ¹⁶ O diidi ki sua ke bá niyendo ki ye, ke o pali biidi yeni bá nilo ǹ ki ye, ki ba jaandi ki mia bipo. Lanwani ii, o buagu n todi o, yeni mi faabma, ke o teginma mo tua o dabanli yeni o fidu. ¹⁷ O lani mi teginma nani ti kudi liadli yeni, ki cibni o yuli mi faabma, nani kusanli yeni. O lani li pantuuli nani ki liadterga yeni, ki maani li nunponli mo nani li liadijali yeni. ¹⁸ O tuu ba li panli, nani ban tieni ya tuonbiadi yeni, ki buni bani yibalinba yeni li pabienli, ki cuo ba, o ba tuu a kpendega po yaaba mo bi panli nani bi panli ń dagdi ke ban dadi bi tuba maama yeni. ¹⁹ Ki cili nintuali po, bi ba fangi O Diedo lan buali maama, ki cili u yienu ń pudi naanpo mo, o kpigdi ba dɔgdi; yibali ya puubi ki cua nani kpenu yeni, O Diedo fuoma n ba deli o. ²⁰ "O daafaabka ba cua Siyɔn yeni, Jakɔbo puolŋuani siiga, yaaba n lebdi ki ŋa bi yenyiema tuada, ki ŋɔdi O Diedo sanu; O Diedo ñɔmaama n yeni. ²¹ O Diedo yedi, "Diidi, Mini wani ii, Min ba kuani ya ŋantaado yeni ba n ne: N fuoma yaama n ye a po yeni min kuani ya maama a ñɔbu nni yeni, kan ña a ñɔbu nni, mi kan ña a puolŋuani ñɔbu nni, mi kan ña a yaabila ya puolŋuani ya ñɔbu nni." O Diedo n yedi yeni, ki cili mɔlane hali yeni ya bina ń tuu ya bina.