¹ Kpaandi ki yigni boncianla; da ŋmini ka. duoni a nialu nani li naatunli yeni. kpaandi ki waani n niba bi yenyiema, ki waani Jakɔbo puolŋuani bi tuonbiadi. ² Ama, daali kuli, bi lingi mini i, ki bua ban bandi n sani, bi miadi nni ya buudi n tiegi ki bua nagni U Tienu kani nani ya nibuolu n ŋua mi teginma yeni, ki nan ŋa U Tienu ń bili bipo ya teginma bujiali yeni. ³ Bi buali bi pali nni, 'Mi ñɔlolma pia tipo be ya fuoma i,' 'Yinba wani na nua yo oo'? Ki ya wangi tiba fala mo pia be ya todma i, a yaa bani li po oo?' Diidi, li tie ke i ñɔlolma daali, i lingi i yuli po ñuadi, ki wangi i tuonsɔnba fala. ⁴ Diidi, i yi loli bu ñɔbu, ki lingi naani n pia ku fuugi, yeni li kɔnkɔnli, ki kudi i yaba a nukukubiara; I naa lolgi ñɔbu mɔla, ki bua i nialu ń pundi tanpoli ka. ⁵ Min den bili yi ya ñɔlolma buolu n yeni ii: ya daali ke yua kuli ba miini o yuli, ki tibni li yuli nani li kpekagli yeni, ki la li pabɔnli tiadi, ki pugi apo kuli mi fantanpienma yo oo? I yi lani mi ñɔlolma aa, ya daali n ba mangi O Diedo pali ii? ⁶ Diidi, min bua ya ñɔlolma buolu n ne: Ki luodi ki ŋa yin luoni yaaba a kpaadidiena nni, mi biadma po, ki landi ya piana n ye i yonbi tulu nni, ki puni mi faabma ban mabindi yaaba, ki faabi ban wangi yaaba fala buoli kuli. ⁷ Li tie yua n ba bɔgdi o jiema yeni mi koma ń pia yua, ki puni yua ki pia duankaanu u duanu. I ya la yua n ye mubili, yin yieni o, ki da buli a kpiilo a nunga. ⁸ Lanwani ii, i yenyenma ba yendi nani u yenpudkaagu yeni, i paagma mo kan waagi ki cua; I teginma ba ga i liiga, O Diedo kpigdi mo ń ya ŋua i puoli ki guu yi. ⁹ Lanwani ii, i ya yini, O Diedo ba tuo; i ya yigni, ki mia mi todma, o ba yedi yi, "Mini n ne." I ya kaadi i siiga nni, yaali n tie li mabinli, li jamuali yeni ku totabigu, yeni mi biadma maayuodi, ¹⁰ I ya puni mi koma ń pia yua yinba mɔno ń bua yaali, ki ñani talga payianu; lanwani ii, i yenma ba deli li biigli, i biigli mo ń ya tie nani ku yensiicocolgu yeni. ¹¹ Lanwani ii, O Diedo baa gobdi yi yognu kuli, ki ya dingi yi, bá naankani n tie tinkuonga, O baa pugdi i gbanu u fidu. I baa tie nani ban jɔgni ya gɔgdigu mi ñima yognu kuli yeni, nani ya ñinbunli ñima n ki ñuudi yeni i. ¹² I ya ŋanbli po i, ke bi ba guani ki maa a diegbenbuona nni; i ba guani ki fiina ya nifiima n pendi puoli po ya tanpuuna; Bi ba yini yi, "Yaaba n gani ki ŋanbi ki fiini a bilinguona, yaaba n guani ki ŋanbi i sani, ki cedi ke mi diema guani ki gbie yeni bi niba." ¹³ Li ya tie ke i guani ku kubi mi fuodma daali, ki ŋa li sancenli li daali, kaa tiendi yaali n mani i yuli po, n daagagdikaali daali. Li ya tie ke i pala mani mi fuodma daali po, ke li daali pia ti kpiagdi O Diedo po, ke i kpiagi li daali. Li ya tie ke i kpiagi mi fuodma daali, kaa ŋua i yuli po ñuadi, kaa lingi yaali n ba mangi i gbanu, kaa go maadi ti mayuodi. ¹⁴ Lanwani ii, i ba baa li pamanli O Diedo yeli po; N ba taa yi ki duoni mi diema yaa n kpedi a juana yuli po; N ba cedi yin di i yaaja Jakɔbo faali; kelima O Diedo ñɔbu n yaadi ki maadi yeni.