O Diedo yedi ya maama ne, "Tanpoli tie n balkalkaanu, ke ki tinga mo tie n taaŋmaakaanu. I go ba fidi ki maa npo be ya diebuolu i? Bii, le n go ba fidi ki tua n fuodkaanu uu? ² Mini n tagi lanya bona kuli yeni n nuu; lan tieni maama n yeni, ke lanya bona kuli ye; O Diedo ñɔmaama n yeni. Diidi, n nuni ń ba maani yua ya po n ne, yua n tie o niñinnilo, yua n yi gbadi n maama ki ya digibi yeni. ³ Yua n yi kodi nua, ki padi li padli, ama, ki go kpa nilo; yua n yi badi pabiga, ki go kpa sangbanlo mɔko; bi ya caa yeni mi jiema paabu padli yeni ku ñinkpidigu, bi yi pia mi duosɔma mɔko, ki mii mii; Bi ya cua ki juu li ŋubli yeni tulaale, bi yi gbaani ki kpiagi o bulo mɔko. Landanba mangidi bi pala ban bua maama i, ke bi pala mo mani bi tuongunda po. ⁴ N mɔko baa mangidi n pali, ya yognu ke bi ye fala nni i; N ba jiini bipo yaali n tie bipo jawaanciandi. Kelima, N ya yini, bá niyendo ki tuoni; N ya maadi, bá niyendo ki cengi n maama. Bi tiendi ti tuonbiadi n nintuali, ki gandi ki tiendi yaali n gundi npo." ⁵ Yinba yaaba n gbia o maama, ki digibi ki tinga po ne, cengi mani O Diedo maama, "Diidi mani i kpiiba yaaba n nani yi, ki yaadi yi, ki dieli yi, Mini ya yeli po ne, bani n yedi ya maama ne, 'Cedi mani O Diedo ń dɔgidi ipo o kpiagidi, tin la pamanli ń ba dagdi maama!' Ama, bani n ba la i fee. ⁶ Bu tɔbu fuugu ña u dociamu po, u nialu ña U Tienu diegu nni, U tie O Diedo nialu i, ke o tuugi o yibalinba bi panli. ⁷ Ki sua ke o da ki gbadi madtugikɔnu, o den tuodi ki mali; ki sua ke madtugikɔnu da ki gbadi o, o den mali bonjaga. ⁸ ŋma n da kpeli ki gbadi li bonbuolu? ŋma n kpeli ki la lanya bonli liema? Bi ba fidi ki maa diema dayenli ii? Bi ba fidi ki maa ki kaani nibuolu yenma aa? Ama, lan tieni maama Siyɔn po n yeni, O li gbaani yeni wan mali o bila n yeni. ⁹ O Diedo buali, "N ba cedi o mado ń gbaani, ki go pani o ti madi ii? Bii, Mini yua n puuni ti madi yeni n go ba yie ke ban da maa aa?" ¹⁰ Yinba yaaba n kua u dogu nni, Mangi mani i pala Jerusalema dogu po, ki waani i pamanli yinba yaaba n kua u niinni. Yinba yaaba n den biidi i pala upo yeni, taani mani ki mangi i pala i dogu po! ¹¹ Kelima, i ba ŋadi o biili ki guo; i ba ŋadi o biima ki baa i baagi; kelima i ba ñu o biima ki guo, ki baa li pamankandi kaali, kelima o kpiagidi yaadi n yabi ki kandi yeni po. ¹² O Diedo ń yedi ya maama n ne, "Diidi, N ba cedi mi yanduanma ń puubi nani u kpenciamu yeni ki kua u niinni, ti kpiagidi mo ń ya puubi ki caa u niinni nani ya kpenu n gbie ki duodi ki yadi yeni. Bi baa ŋaandi yi, ki yugdi ki ŋmabi yi bi nui nni, ki kaandi yi bi pana po. ¹³ Nani binaa ń yi baagdi o biga maama yeni, N ba baagi yi, yi baa i baagi Jerusalema dogu nni." ¹⁴ I ba la lani, i pala ń mangi, i kpaba mo ń baa u fidu ki pugni nani ku muasɔangu yeni. O Diedo ba cedi o naacenba ń bandi o paaciamu, ama, o ba dɔgdi o pabiencianli o yibalinba po. ¹⁵ Kelima, diidi mani, O Diedo n kpendi yeni u mu yeni, ke o tɔturgu tiini ki kpendi nani ku taafaaciangu yeni, ki bua tuu o pabiencianli panli yeni u mupienu. ¹⁶ Kelima, O Diedo n juagi bi nisaalba buudi yeni u mu, yeni ki jugsiega. O Diedo ń ba kpa yaaba baa yabi. ¹⁷ Yaaba n gagdi ki ŋuudi, ki ŋanbi bi yula, ki bua kua ti gɔgirdi nni, ki sedi yua n ye siiga ni puoli po, bani yaaba n ŋmani ti duonandi yeni a tanbana, yeni yaali n jɔgni kuli yeni. "Bankuli ba bodi cain, O Di edo n yedi yeni." ¹⁸ Kelima, N bani bi tuada yeni bi yantiana. U yogu kpendi, ke N ba taani i nibuoli kuli yeni i maabuoli kuli. Bi ba cua ki la n kpiagdi. ¹⁹ Nn, N ba tieni bi siiga nni mi maalcianma. ki sɔni yaaba n sani ki ciadi, ki gedi i nilanbuoli po, nani: Taricici, Puti, yeni Ludi, a dabantuada yaaba n kpali, ki dadi bi dabanpiemi po, Tubali po, Jafani po, yeni ya kpendega n ye hali fagma, kaa kpeli ki gbadi n maama, kaa kpeli ki la n kpiagidi mo. Bani n ba yigni, ki kpaandi, ki waani n kpiagidi i nibuoli siiga. ²⁰ Bi ba guani yeni i kpiiba yaaba n ye i nilanbuoli diema nni, ki puni O Diedo nani paabu yeni. Bi ba jagni ba i taami po, yeni ti turdi nni, yeni ya turdi n liibi, i buomi po yeni ti yuoyuodi po, ki kpeni yeni ba n juali yaali n gagdi ki ŋani yeni po, Jerusalema nni; O Diedo n yedi yeni. Kelima Israyeli yaaba ba yidi mi jiema salga yeni ya tiadi n ŋani nni, U Tienu diegu nni. ²¹ Bi ya siiga i, ke N ba gandi salga yidikaaba, yeni Lefi buolu yaaba; O Diedo n yedi yeni. ²² Kelima, nani min tieni ya tanpopaano yeni ya tinpanga, ke bi baa ye li niinni, n ya nintuali; O Diedo ñɔmaama n yeni; Lanwani ii, a puolŋuani yeni i yela mo baa ye n nintuali yeni i. ²³ Lanwani ii, ŋmaapaano ń tuu ŋmaapaano kuli, fuodma daali ń tuu fuodma daali kuli, pia miali kuli ba cua ki gbaani n nintuali, ki pugi nni; O Diedo n yedi yeni. ²⁴ Bi ba ña niini, ki la yaaba n den fiini mi yenyiema npo yeni, kpe ki bibili lalala, kelima, ya nanguda n ŋmani bi nankpiendi yeni kan kpe, ya mu n juugi ba mo kan jundi; bi ba tua sinsini bonli nisaalo ń tuu nisaalo kuli po."