¹ O Diedo yedi ya maama ne, "Ya jiagi mani ti buudi yeni ti mɔnkundi, ki ya tiendi yaali n ŋua mi teginma; kelima n faabma nagni, ke n teginma dɔgdima yognu mo bua pundi. ² Li pamanli yeni mi yedŋanma baa ye yeni yua n cɔlni li bonli kuli, ki kubi ke li paa, ki cɔlni mi fuodma daali, ki fangi o yuli kaa tiendi yaali n bia." ³ Ya nilama n tua O Diedo ŋɔdka, ń da yedi, "Laa pia tama, O Diedo ba paadi ki seni nni, ki ñani nni o niba siiga." Ki mɔgiliga (badidiegu guudo) ń da yedi, (Diidi, mini wani tie tiikuonbu i." ⁴ Kelima O Diedo ń yedi ya maama n ne, "Yaaba n tie ya mɔglimu n cɔlni mi fuodma daali, ki ŋɔdi min bua yaali, ki cuoni n ŋantaado sanu nni, ⁵ Bi ya po, N ba puni ba n diegu nni yeni n bilinguona nni, ya kaanu yeni ya yeli n pia ti kpiagdi ki cie a bonjala yeni a bonpola. N ba teni ba ya yeli n ki pia piinma yeni sundma. ⁶ Yaaba n tie canba ki ŋua O Diedo sanu, ki ya tuuni O Diedo po, ki bua O Diedo yeli, ki gbaandi ki pugi o, yinba yaaba n cɔlni mi fuodma daali, ki kubu ya sanu n ki kan miidi li daali, ki cuoni n ŋantaado sanu nni bonŋanla; ⁷ N ba cua yeni yi n juagagdiŋanli po, ki cedi ban mangi bi pala n jaandidiogu nni; N ba ga bi paabu yeni bi pajuukaana, n padbinbindli po. Kelima, n diegu baa yi jaandidiegu, i nibuoli po kuli, ⁸ Ti Diedo, U Tienu, yua n taani ban luni Israyeli yaaba siiga nni yaaba, yedi ya maama ne, "N go ba taani nitɔba yeni Israyeli yaaba, ki pugni bipo." ⁹ Yinba i kuani nni muayandi kuli, yinba li fuali nni muayandi kuli, cua mani ki di! ¹⁰ Bi doguudba kuli tie juama i, baa go gbia mo. Bi tie sangbanmuula i, bi kan fidi ki gbegini. Bi faadi ti dangidi yeni mi guama, bi bua mi guama boncianla. ¹¹ Li sangbanli faadi mi jiema boncianla; baa guodi jiema; bi tie ya yankpaala n ki pia yanjagli i; bi siiga nni, yua kuli kubi o yanjagiceli i, yua kuli ŋua o yuli po ŋamu i. ¹² Bi tua, "Cua mani na, "Tin ñu ku daamɔngu yeni mi daapaama ki gaadi. Saala mo baa tie nani dinne yei i, kelima, yaali n sieni yabi hali boncianla."