¹ U ñuñuunu ń pia yaaba yeni, cua mani mi ñima kani na, yinba yaaba n ki pia ligi, nagni mani ki di! Cua mani ki daa mi daama yeni mi naaŋanma ki da pa ligi, kaa pani liba mɔko. ² Be n cedi ke i cɔdi i ligi yaali n ki tie jiemɔndi po, be n cedi ke i tuuni yaali n kan guoni yi po oo? Diadi mani i tuba bonŋanla ki cengi nni, ki di yaali n tie jiemɔndi, ki go mani, i pala ba mangi, kelima, ya jiema n mani boncianla po. ³ Diadi mani i tuba ki cua n kani ki cengi nni, ki baa li miali yema! N ba loli yeni yi ya ŋantaado n ba waagi kaa miidi: min kuani ya ŋanbimɔnli ŋantaado yeni Dafiidi yeni po. ⁴ Diidi, N cedke o tua kasiedi, i nibuoli po, ki tie yudaano, ki go tie gobdika, i nibuoli po kuli. ⁵ Diidi, I ba yini yin ki bani ya nibuolu; ya nibuolu mo n ki bani yi ń sani ki cua i kani, kelima, O Diedo I Tienu, Israyeli Tienu yua n gagdi ki ŋani ki puni yi ti kpiagdi yeni po." ⁶ Lingi mani O Diedo, yin ba fidi ki la o ya yognu; jaandi mani ki mia o wan dá kɔbi yeni yi ya yognu. ⁷ O nibiado ń ŋa mi biadma sanu, ti tuonbiadi daano mo ń ŋa o maalbiidi. bi kuli ń lebdi ki guani O Diedo kani, O ba gbadi bipo mi niñima, ti Tienu mo ba di bipo ya sugli n ki pia gbenma. ⁸ Kelima N yantiana ki taa yeni i ya yantiana, N sani mo ki taa yeni i sani; O Diedo ń yedi ya maama n yeni; ⁹ Kelima, nani tanpoli ń fagi yeni ki tinga maama yeni, N sani mo fagi yeni i sani, ke n yantiana mo fagi yeni i yantiana yeni i. ¹⁰ Kelima, nani ki taaga yeni a taatana ń ña tanpoli ki baali maama yeni, ki kan guani ki lebdi kaa kaa muani ki tinga yeni, ki ba cedi ki tinga ń loni a luana, ki pudi, ki pa, ki bundi yua n buli po, ki puni yua lingi mi jiema yeni, ¹¹ lanwani ii, N maama, yaama n ñani n ñɔbu nni, kan guani ki lebdi n kani, kaa tieni min sɔni ma ke man tieni yaali kuli, ki go tieni ki tii min sɔni ma yaali ya po. ¹² Kelima, i ba ña i yonbidi kaanu, ban ciani yi yeni li pamanli; a juana yeni a juabila ba ga i liiga, ki kpaandi ki yigni i pamandanyigni, i kuani nni tiidi ń ya puogi ti nupuodi. ¹³ Sipri tiidi n ba pudi, ki ga i konkoni kaanu, mirtili tiidi mo ń pudi, ki ga a kongɔba kaanu, Yeni, li ba tua O Diedo po yeni o yeli yaali n ñani po, ya maalma n ki pia bodma hali ya yognu kuli."