¹ "Fini ki ŋɔlga, fini yua n ki mali biga, yigni yeni li pamanli, yiini i pamanyani, kpaandi yeni u paalu, ki yigni, fini yua n ki bandi madtugikɔnu yeni. Kelima, o ponanbangu bila yabi ki cie o poŋamo, yua n den ye yeni o calo" O Diedo n yedi yeni. ² Dadi ki tandi a jongu, ki pugni u kaanu, dadi ki tandi ti kpaljɔnkaadi, ki pugni li yiali ku diegu nni; Pugni i baabi, ki kpaa a kpakpaana, ki loli lan ya paa. ³ Kelima a ba tandi u yekaanu jienu po yeni ganu po i, a puolŋuani ń diedi i nibuoli, ki guani ki cedi ya dogi n den ki pia niba ń guani ki kua ki gbie. ⁴ Da jie liba kuli, kelima a kan fiagi, a pali mo kan wadi, kelima, a kan ji di fee; a ba sundi a jifandi yognu, a kan ji tiadi a kpepuodi yognu fee. ⁵ Kelima, a tagdo n tie a calo; o yeli n tie O Diedo, U Paaciamu Kuli daano. Israyeli Tienu yua n gagdi ki ŋani yeni n tie i Daafaabika; bi yi o, ki tinga kuli Tienu." ⁶ Kelima, O Diedo guani ki tiadi apo nani ban ŋa ya pua ke o ye yeni li pabɔnli yeni i, nani ban yi kuani ya pua o jafandi nni, ki ti deli ki ñani o yeni," O Diedo n yedi yeni. ⁷ N den ñɔli ki ŋa a waamu, ama, mi niñincianma po, N ba guani yeni a n kani. ⁸ N pabiencianli nni, N den buli a n nunga yognuba waamu; ama, mɔla, n ba gbadi apo mi niñima, ki go ya pia apo ya buama n ki pia gbenma. Mini O Diedo, yua n daa ki faabi ŋa n yedi lanya maama. ⁹ Kelima, li tie npo nani Nowe taabaacianga yognu yeni i: N den poli, ki yedi ke Nowe yognu taabaabuolu, kan go tieni ki tinga po hali bada, lanwani ii, N poli ke N ji kan bieni n pali apo, n go kan fu yeni a mɔko. ¹⁰ Bá a juana ya bedi ki baali, ke a juabila migni, yeni lankuli, n kan wadi n buama apo, n yanduanma ŋantaado mo kan miidi bii ki ya lengdi Mini yeni fini siiga. O Diedo yua n gbia apo mi niñima n yedi yeni. ¹¹ Jerusalema, fini yua n la falaciamo, ku taafaaciangu ń den pua ku mudi yu yeni, Diidi, N ba biali a yani ya tana n pia mayuli, ki bili a tanpuuli yeni Saafiiri tana. ¹² N ba cedi ya tana n pia mayuli ń maani i bilinguona po, ki lindi, a bulñɔna mo ba kpaa yeni ya tana n ñilgi ki tuudi. ¹³ A bijaba kuli ba tua O Diedo ŋɔdkaaba; a bijaba baa ye mi yaduanma nni, bi baali ń yabdi ki pugni. ¹⁴ N ba guani ki kaani a mi teginma nni i. Fala yeni li mabinli ba sani ki fagdi a kani, kelima a kan ya jie liba kuli, ya bonli n n pia ti jawaandi kan ji nagni a kani ki jieni a. ¹⁵ Diidi, nilo ya tuogi a yeni tɔbu, laa ñani n kani ka, li nilo ba gbali ki baa ki gbaani a nintuali. ¹⁶ Diidi, Mini n tagi o maano, ke o juugi a kuana, ke o mu co, ke o tuuni, ki maa ti jatiadi, mini n go tagi o domudo, ke o pua ki mudi i dogi. ¹⁷ Ban ba taa ya jatiagu ki kɔni yeni a, ki paadi a ji ki ye; yua n ba tuogi a ti buudi ki bu ki cuo ŋa ji ki ye, fini n ba bu ki cuo o. Lani n tie O Diedo naacenba ń dini ya faali, lani n tie ban baa ya mɔmɔnsaali mini O Diedo kani. O Diedo ñɔmaama n yeni."