1 ŋma n den kuani o dandanli, ban den togdi ti yaali yeni ya po, O Diedo nuu paalu den dɔgdi ŋma ya po i? 2 Kelima, o den pani O Diedo nintuali nani li benkpeli yeni i, nani ya jiinli n pudi ki tinkuonga nni yeni; waa den pia ya nannanli ke nilo ba faadi ki ñuadi, waa den pia ŋamuba kuli, ke nilo ba diidi o. 3 Bi niba den fali o, ki nundi o, ki paadi ki sengi o, o baba, o den ye falabiado nni, ki maani yeni fala. O den naani ban buli yua ki nunga i, bi den nundi o, ki nua o ke waa pia mayuli, fanma bonli. 4 Ama, i mɔmɔni, o den ga ti ya fala i, ki tugi, o den tugi ti ya pabɔnli i; Ama, tinba wani den maali ke U Tienu n den ŋmiandi o o tuonbiadi pani, ki pua ki duoldi o, ki wangi o fala. 5 Ama, bi muu o ti ya yenyiema po i; bi den pua ki duoldi o, tinba ya tagli po i. Bi jia o buudi ki cuo o tinba ya po i, o ga ti ya gbantonli i, ki juodi yeni ti yiadi, ke ti baa mi faabma. 6 Ti kuli den yadi nani i pee yeni i; yua kuli den teli o kaanu i, ke O Diedo tugni wani, ti kuli ya tagli. 7 Bi den waani o fala boncianla; yeni lankuli, o den miini o yuli, o den ki luodi o ñɔbu; Nani ban caa yeni ya pabiga u yankodkaanu yeni, nani ban jiagi o pia kobdi ke o se ki ŋmini maama yeni, lanwani ii, waa den yaadi o ñɔbu. 8 Bi den jia o buudi yeni ku tugtongu, ki kpa o; o nifiima siiga, ŋma nan fiini opo oo? Ama bi den ñani o bi nifuodba siiga, kelima n niba biadma po i, bi den tugni o ya yuli po i i tagli kuli. 9 Bi den gbiidi o kakuli bi nibiadba siiga i, ki piini o a piada kakula nni, bá yeni wan den ki tieni biadmaba kuli, waa den tieni janbiba kuli, bɔndigu den ki ñani o ñɔbu nni. 10 Li den tie O Diedo buma po i, ke bi den pua ki mugi o, ke o yidi o miali salga, ki bua ti tuonbiadi po sugli, o ba baa o puolŋuani, o miali dana ba fagdi, O Diedo yanbuama ba tieni o ya po i. 11 Wan la fala o miali yema nni yeni, o ba la mi yenma, o yanfuoma po, o ba baa O Diedo ŋanbli. N naaciemo ba saa bi niba boncianla po i mɔmɔni, wani n ba taani bi tagli kuli, ki tugi. 12 Lanya po i ke n ba cedi wan kali ti kpiagciandi danba siiga, o ba bɔgdi yeni bi paatieba boncianla ŋalbalga biinu, kelima o luni o miali, ki kpe, ke bi taani o yeni bi nibiadba. Wani n tugi niba boncianla tuonbiadi, ki tua bi nibiadba po o candaano.