¹ Findi mani, findi mani, yinba Siyɔn yaaba! Fii mani yeni i fidu kuli, yie mani i badu tiaŋandi, yinba u dogagdiŋamu, Jerusalema yaaba; Kelima, nilamo, jɔgindi nilo ji kan kua i siiga hali bada. ² Yogi mani iba, ki ñani u tangungu, yinba, Jerusalema yaaba, fii ki kali mani; landi mani ya yonbipiali n luoli i tulu nni, yinba Siyɔn bisiaba yaaba n ye ti yonbidi yeni. ³ Kelima, O Diedo ń yedi ya maama n yeni, "Bi den kuadi yi, kaa ga pu kuli, bi ba daa ki faabi yi, ki kan pa ligi mo." ⁴ Kelima, ti Diedo ń yedi ya maama n yeni, "Hali mi cilma, n niba den jiidi k gedi Ejipti diema nni ki baan ya ye; li puoli po, Asiiri yaaba den maabni ba fanma fanma. ⁵ O Diedo yedi, "ban den ñani n niba fanma fanma yeni, N ba tieni be i mɔlane? Bi tugtondanba tandi bipo, ki sugdi ba, bi sugdi n yeli yognu kuli yeni daali kuli. ⁶ Lanya po i, ke n niba ba bandi n yeli; lanya po i, ke bi ba bandi li daali ke Mini n tie yua n den yedi, "Mini nba n maadi ki tua Mini n ne!" ⁷ Diidi mani yua n cuoni a juana po, ki caagi o laabaalŋamo ń ŋani maama! Yua n kpaandi ki wangi mi yanduanma laabaalo, yua n kpaandi ki wangi mi faabma laabaalo! Yua n yedi Siyɔn yaaba, "I Tienu n kaa ti badigbandi po yeni!" ⁸ Cengi mani yinba bi doguudiba, duoni mani i nialu, ki taani ki yigni yeni li pamanli, kelima, bi la yeni bi nuni, ke O Diedo lebdi ki guani Siyɔn o. ⁹ Taani mani ki yigni mi paadma yigni, ki yiini i pamandanyani, yinba yaaba n kua Jerusalema diegbendi nni; kelima O Diedo baagi o niba; o daa ki faabi Jerusalema. ¹⁰ O Diedo yugdi o buagu yaagu n gagdi ki ŋani yeni, ke diema kuli ń la gu; Ki tinga yeni i tinbiani kuli yaaba ba la ti Tienu faabma. ¹¹ gedi mani, gedi mani, ña mani Babiloni nni; da sii mani yaalin jɔgni kuli; ña mani mi diema yeni siiga; ŋuudi ki ŋanbi mani i yula, yinba yaaba n tugi O Diedo tadmu yeni! ¹² Kelima, yin da belibi ka ki ña, yin da sani ka ki ña; kelima, O Diedo n ba ga i liiga; Israyeli Tienu mo n baa ye i puoli po, ki guu yi. ¹³ Diidi, n naaciemo ne, o baa tuuni yeni mi yanfuoma, o yeli ba ña, ki do, o ba tua niciamo i, o bali ba do. ¹⁴ Nani wan den tie bi niba boncianla po jawaandi bonli maama yeni, waa go den naani yeni nisaalo mɔko, o nannanli mɔno den ki naani yeni nisaalo yaali. ¹⁵ Yeni lankuli, n naaciemo tuona po, li ba cuo i nibuoli po u yaalidgu, bi baditieba ba mubni bi ñɔna o ya po. Kelima, ban den ki kpeli ki togdi ba yaali, bi nuni ba la, ban den ki kpeli ki cengi yaali, bi ba gbadi, ki go bandi.